ပဲခူးတိုင်း၊ ရန်ကုန်-ပြည်ကားလမ်းပေါ်မှာ နယ်မြေရှင်းလင်းရေးလုပ်ရင်း စစ်ကောင်စီတပ်သားနဲ့ ပျူစောထီးတွေကို တိုက်ခိုက်ခဲ့လို့ စစ်ကောင်စီဘက်က ၈ ယောက်သေဆုံး၊ ၄ ယောက် ဒဏ်ရာရတယ်လို့ သာယာဝတီခရိုင်၊ တပ်ရင်း ၃၈ဝ၂၊ တပ်ခွဲ ၂ က ဧပြီ ၂၃ ရက်မှာ ထုတ်ပြန်ပါတယ်။
သာယာဝတီခရိုင်၊ မင်းလှမြို့နယ်အပိုင် ရန်ကုန်-ပြည်ကားလမ်း အရှေ့ဘက်ကျေးရွာတွေမှာ လူငယ်တွေကို ပေါ်တာဆွဲဖမ်းဆီးဖို့ စစ်ကောင်စီတပ်တွေ လာမယ်ဆိုတဲ့သတင်းအရ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၂ နဲ့ တပ်ခွဲ ၃ က ရဲဘော်တွေ နှစ်ဖွဲ့ခွဲပြီး နယ်မြေရှင်းလင်းရေးလုပ်ခဲ့တယ်လို့ဆိုပါတယ်။
မနက် ၁၀ နာရီခွဲမှာတော့ အင်ကြင်းကုန်းအုပ်စု၊ အညာတန်းကြီးရွာ၊ ရန်ကုန်-ပြည်ကားလမ်းဘေးက 53 ထမင်းဆိုင်မှာ စစ်ကောင်စီတပ်သားတွေနဲ့ ပျူစောထီး အယောက် ၂၀ လောက် ထမင်းစားနေတာကိုတွေ့ရလို့ တပ်ခွဲ ၂ ရဲဘော်တွေက ရှောင်တခင်ပစ်ခတ်တိုက်ခိုက်ခဲ့တာကြောင့် ဖရိုဖရဲထွက်ပြေးကြတယ်လို့ ဆိုပါတယ်။
ထွက်ပြေးသွားသူတွေကို လိုက်လံတိုက်ခိုက်ခဲ့ရာမှာတော့ စစ်ကောင်စီတပ်သားနဲ့ ပျူစောထီး ၈ ယောက်သေ၊ ၄ ယောက် ဒဏ်ရာရခဲ့ပြီး မွန်းလွဲ ၂ နာရီ ၁၅ မိနစ်မှာ စစ်ကောင်စီတပ်က Mi 35 ရဟတ်ယာဉ်နဲ့ ရိုးမအစပ်က ပြည်သူတွေနေထိုင်ရာ နေရာတွေကို ဗုံးကြဲပစ်ခတ်တိုက်ခိုက်ခဲ့တယ်လို့ ထုတ်ပြန်ထားပါတယ်။
ထိတွေ့တိုက်ပွဲတွေ ဖြစ်ပွားလာနိုင်တာကြောင့် ပြည်သူတွေအနေနဲ့ စစ်ကောင်စီတပ်တွေနဲ့ နီးရာကို သွားလာတာ လုံးဝမလုပ်ဖို့၊ လေကြောင်းတိုက်ခိုက်လာနိုင်တာကြောင့်လည်း အထူးသတိထား နေထိုင်ကြဖို့ အသိပေးထားပါတယ်။
Photo : သာယာဝတီခရိုင်၊ တပ်ရင်း ၃၈ဝ၂၊ တပ်ခွဲ ၂
