ချင်းပြည်နယ်၊ ဖလမ်းမြို့သိမ်းတိုက်ပွဲမှာ သွားရောက်အင်အားဖြည့် တိုက်ခိုက်ခဲ့ကြတဲ့ မန္တလေးတိုင်းအတွင်းက တော်လှန်ရေးတပ်ဖွဲ့ဝင်တွေကို ဧပြီ ၂၀ ရက် မနက် ၁၁ နာရီက မြို့နယ် ၃ မြို့နယ်က ဒေသခံပြည်သူတွေ ကြိုဆိုဂုဏ်ပြုခဲ့ကြတယ်လို့ တော်လှန်ရေးတပ်ဖွဲ့တွေဆီက သိရပါတယ်။

မန္တလေးတိုင်း၊ စစ်ကိုင်းတိုင်းနဲ့ မကွေးတိုင်းအတွင်းမှာရှိတဲ့ မြို့နယ် ၃ မြို့နယ်က ဒေသခံပြည်သူတွေနဲ့အတူ မြင်းခြံ MBT တော်လှန်ရေးတပ်ဖွဲ့ တာဝန်ရှိသူတွေက ကြိုဆိုခဲ့ကြတယ်လို့ ဆိုပါတယ်။

Myingyan Black Tiger တာဝန်ရှိသူ ဗိုလ်မိုက်ခဲက “ဖလမ်းမြို့သိမ်းတိုက်ပွဲကနေ မိမိတပ်ရင်းဌာနချုပ်ကို ပြန်လာတဲ့ခရီးမှာ ကြိုဆိုတာပါ။ တိုက်ပွဲအတွင်း ဒဏ်ရာရရှိခဲ့တဲ့ တော်လှန်ရေးတပ်ဖွဲ့ဝင်တွေကိုလည်း ဆေးကုသမှုတွေ ပြုလုပ်နေပြီး မြို့နယ် ၃ မြို့နယ်က ပြည်သူလူထုက သောင်းသောင်းဖြဖြ ကြိုဆိုတာတွေ ပြုလုပ်ခဲ့တာ” လို့ DVB ကို ပြောပါတယ်။

ရှေ့တန်း စစ်မြေပြင်မှာတော့ ရဲဘော်တွေက တောင်တန်း မြေပြန့် မခွဲခြားဘဲ မဟာမိတ်ဆိုတာထက် ကိုယ့်ရဲဘော်ရဲဘက် တဖွဲ့တည်းဆိုတဲ့ သဘောမျိုးနဲ့ စစ်အာဏာရှင် အမြစ်ပြတ်ရေးကိုသာ ရည်ရွယ်တိုက်ခိုက်ခဲ့ကြတာလို့ ဆိုပါတယ်။

ဖလမ်းမြို့သိမ်းတိုက်ပွဲကို ဧပြီ ၉ ရက်မှာ ချင်းညီနောင် တော်လှန်ရေးတပ်ဖွဲ့တွေနဲ့အတူ မန္တလေးတိုင်း၊ မကွေးတိုင်းနဲ့ စစ်ကိုင်းတိုင်းအတွင်းမှ တော်လှန်ရေး တပ်ရင်းတပ်ဖွဲ့ဝင်တွေ ပူးပေါင်းတိုက်ခိုက်ခဲ့ကြတာပါ။

ဖလမ်းမြို့ကို ချင်းညီနောင် တော်လှန်ရေးတပ်ဖွဲ့တွေက ထိန်းချုပ်ထားနိုင်ခဲ့ပြီး ဒေသအသီးသီက မဟာမိတ် တော်လှန်ရေးတပ်ဖွဲ့တွေက မိခင်တပ်ရင်းတွေကို ပြန်လည်ရောက်နေပြီလို့ တော်လှန်ရေးတပ်ဖွဲ့တွေဆီက သိရပါတယ်။