စစ်ကိုင်းတိုင်း၊ အင်းတော်မြို့မှာ စစ်အာဏာရှင်တပ်နဲ့ တော်လှန်ရေးတပ်တွေ ဒီနေ့ အောက်တိုဘာ ၂၂ ရက်မှာ တိုက်ပွဲဆက်ဖြစ်နေသလို စစ်တပ်ဘက်က လေယာဉ်နဲ့ ဗုံးကြဲတိုက်ခိုက်နေတယ်လို့ စစ်ရေးသတင်းအရင်းအမြစ်ဆီက သိရပါတယ်။
အင်းတော်မြို့ ကျောင်းကုန်းလမ်းဆုံ မရောက်ခင် ၄ မိုင်အကွာမှာ တိုက်ပွဲဖြစ်နေပြီး စစ်တပ်ဟာ အင်းတော်မြို့ မန္တလေး-မြစ်ကြီးနားလမ်းကို ထိန်းချုပ်လိုတာကြောင့် ကျောင်းကုန်းအထိ ထိုးစစ်ဆင်နေတာလို့ ဆိုပါတယ်။
စစ်ရေးသတင်းရင်းမြစ်တယောက်က “ဒီနေ့မနက် Y 12 တွေနဲ့ပတ်ကြဲနေတာ။ လေယာဉ်တွေကတော့ နေ့တိုင်းလို လာကြဲနေတာ။ သူတို့ အရမ်းအထိနာနေတယ်။ တော်တော်လေးသေနေတယ်။ သူတို့က ကျောင်းကုန်းကို ထိန်းချုပ်နိုင်ပြီဆိုတာနဲ့ အင်းတော်-မြစ်ကြီးနား ကားလမ်းကို သူတို့ ထိန်းချုပ်နိုင်ပြီလို့ ပြောလို့ရတယ်”လို့ ပြောပါတယ်။
စစ်အာဏာရှင်တပ်ဟာ အင်းတော်မြောက်ပိုင်း အင်းတော်ကနေ မော်လူးအထိ မန္တလေး-မြစ်ကြီးနား လမ်းပိုင်းကို ထိန်းချုပ်ထားပြီး လက်ရှိ အင်းတော်တောင်ဘက် မန္တလေး-မြစ် ကြီးနားလမ်းပိုင်းကို ထိန်းချုပ်ဖို့ ကြိုးစားလာတာကြောင့် ကျောင်းကုန်းမရောက်ခင် ဂျုံးဂျုံးကျရွာ ၁ မှာ တိုက်ပွဲဖြစ်နေတာပါ။
စစ်ကြောင်းထိုးလာတဲ့ စစ်တပ်ဟာ မန္တလေးတိုင်း သပိတ်ကျင်းမြို့နယ်ကနေ ထီးချိုင့်-ကသာ မှတဆင့် အင်းတော်မြို့နယ်ကို စက်တင်ဘာ ၃ ရက်မှာ ရောက်လာပြီးနောက် စက်တင်ဘာ ၄ ရက်ကတည်းက ဒီနေ့အထိ စစ်ကြောင်းထိုးလာတာ ဖြစ်ပါတယ်။
