ရုရှားက ယူကရိန်းကို ကျူးကျော်တိုက်ခိုက်ခဲ့ပြီးတဲ့နောက် စစ်သုံ့ပန်း အပြန်အလှန် ဆက်တိုက်လဲလှယ်ခဲ့တာမှာ ဧပြီ ၁၉ ရက်က ယူကရိန်းနဲ့ ရုရှားတို့ဟာ စစ်သုံ့ပန်း ၅၀၀ ကျော်ကို ထပ်မံလဲလှယ်ခဲ့ပါတယ်။
ယူကရိန်းဝန်ဆောင်မှုဝန်ထမ်း ၂၇၇ ယောက် ရုရှားနိုင်ငံမှာ ဖမ်းဆီးခံထားရာက ခုတော့ နေရပ်ကို ပြန်လာခဲ့ပြီလို့ ယူကရိန်းသမ္မတ ဗိုလိုဒီမာ ဇလန်းစကီးက တယ်လီဂရမ်မှာ ပြောပါတယ်။
ယူကရိန်းအစိုးရကလည်း ရုရှားစစ်မှုထမ်း ၂၄၆ ယောက်ကို လွှဲပြောင်းပေးခဲ့တယ်လို့ ရုရှား ကာကွယ်ရေးဝန်ကြီးဌာနက ပြောပါတယ်။
နောက်ထပ် ဒဏ်ရာရ ယူကရိန်းစစ်သုံ့ပန်း ၃၁ ယောက်ကို ယူကရိန်းဆီ လွှဲပြောင်းပေးခဲ့ပြီး ဒဏ်ရာရရှိသူ ရုရှားစစ်မှုထမ်း ၁၅ ယောက်ကိုလည်း ယူကရိန်းအစိုးရက ပြန်အပ်ခဲ့ပါတယ်။
၂၀၂၂ ခုနှစ် ဖေဖော်ဝါရီလမှာ ရုရှားက စတင်ကျူးကျော်ချိန်ကစပြီး အစိုးရဝန်ထမ်းနဲ့ ပြည်သူတွေ အပါအဝင် ယူကရိန်းနိုင်ငံသား စုစုပေါင်း ၄,၅၅၂ ယောက်ကို ယူကရိန်းဆီ ရုရှားက ပြန်အပ်ခဲ့တယ်လို့ ဇလန်းစကီးက ပြောပါတယ်။
သုံ့ပန်းလဲလှယ်ဖို့ စီစဉ်ပေးတဲ့ အာရပ်စော်ဘွားများပြည်ထောင်စုကို ရုရှားနဲ့ ယူကရိန်း နှစ်ဖက်စလုံးက ကျေးဇူးတင်တယ်လို့ ပြောခဲ့ကြပါတယ်။
Source : Reuters
