တနင်္သာရီတိုင်း၊ ကော့သောင်းခရိုင်၊ ဘုတ်ပြင်းမြို့အခြေစိုက် ခလရ ၂၂၄ တပ်ရင်းက တပ်သားတယောက် ထွက်ပြေးလာပြီး ဧပြီ ၁၇ ရက် မနက် ၈ နာရီလောက်မှာ တော်လှန်ရေးပူးပေါင်းအဖွဲ့ထံ ဘက်ပြောင်းခိုလှုံလာတယ်လို့ KNLA တပ်ရင်း ၂၀၃ တပ်ခွဲ ၃ က ထုတ်ပြန်ထားပါတယ်။
စစ်မှုထမ်းကာလ တနှစ်ရှိတဲ့ တနင်္သာရီမြို့နယ်၊ တကူကျေးရွာသား အသက် ၃၄ နှစ်အရွယ် တပ်သား ကိုအောင်ကိုကိုဟာ ဧပြီ ၁၆ ရက်က ထွက်ပြေးလာတာဖြစ်ပြီး နောက်တရက်မှာ ဆက်သွယ်ခိုလှုံလာတာလို့ ပြောပါတယ်။
အဆိုပါတပ်သားဟာ စစ်ကောင်စီလက်အောက်မှာ မနေချင်တော့တဲ့အတွက် ထွက်ပြေးလာတာလို့ ကော့သောင်းခရိုင် အမှတ် ၁ တပ်ရင်းရဲ့ ပြန်ကြားရေးတာဝန်ခံ တယောက်က ပြောပါတယ်။
“သူက တပ်ထဲမှာ မနေချင်တော့ဘူး၊ အဲဒါကြောင့် အခွင့်အရေးရတာနဲ့ ထွက်ပြေးလာတယ်လို့ ပြောတယ်။ သူပြောပြတာတော့ နောက်ထပ် ထွက်ပြေးမယ့်သူတွေ ရှိသေးတယ်တဲ့၊ အခု သူ့ကို KNLA တပ်ရင်း ၂၀၃ တပ်ခွဲ ၃ မှာ ထားထားပါတယ်။”
အဲဒီ ဘက်ပြောင်းခိုလှုံလာတဲ့ တပ်သားနဲ့ပတ်သက်ပြီး ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၂၀၃ တပ်ခွဲ ၃ ကို ဆက်သွယ်မေးမြန်းထားပေမဲ့ လုံခြုံရေးအရ လောလောဆယ် ဖြေကြားချက်ကို ခဏစောင့်ဆိုင်းပေးပါလို့ ပြန်ကြားရေးတာဝန်ခံက ဖြေဆိုထားပါတယ်။
အဆိုပါ တရက်တည်းမှာပဲ ကော့သောင်းအခြေစိုက် ခလရ ၄၃၁ တပ်ရင်းက စစ်မှုထမ်း စုဆောင်းခံရပြီး စစ်သင်တန်းပို့ဆောင်ဖို့ လုပ်တဲ့သူတွေထဲက လူငယ် ၃ ယောက် ထွက်ပြေးလာကြပြီး အဲဒီထဲက ၂၄ နှစ်အရွယ် လူငယ်တယောက်ကတော့ ကော့သောင်း ပကဖ အဖွဲ့ထံ ဆက်သွယ်ခိုလှုံလာခဲ့တယ်လို့ ကော့သောင်းပကဖအဖွဲ့ တာဝန်ခံတယောက်က ပြောပါတယ်။
