စစ်ကိုင်းတိုင်း၊ ကလေးမြို့နယ် တောင်ပိုင်းနဲ့ မကွေးတိုင်း၊ ဂန့်ဂေါမြို့နယ် မြောက်ပိုင်းမှာ ၂ လအတွင်း စစ်ကောင်စီရဲ့ တပ်စခန်း ၅ ခုကို မဟာမိတ်ပူးပေါင်းတပ်တွေနဲ့အတူ သိမ်းပိုက်နိုင်ခဲ့တယ်လို့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) က ဧပြီ ၁၆ ရက်မှာ သတင်းထုတ်ပြန်ပါတယ်။
ဧပြီ ၁၁ ရက်မှာလည်း မဟာမိတ်ပူးပေါင်းတပ်တွေနဲ့အတူ ကလေးနယ်မြို့နယ် တောင်ပိုင်းအဆုံး ကလေး-ဂန့်ဂေါ လမ်းမပေါ်က စစ်ကောင်စီတပ် အခိုင်အမာ နေရာယူထားတဲ့ ကြံသာကျေးရွာစခန်းကို သိမ်းပိုက်ထိန်းချုပ်နိုင်ခဲ့ပြီး လက်နက်ခဲယမ်း အမြောက်အမြား သိမ်းဆည်းရရှိခဲ့တယ်လို့လည်း ထုတ်ပြန်ချက်အရ သိရပါတယ်။
၂၀၂၅ ခုနှစ် ဖေဖော်ဝါရီ ၁၂ ရက်က ချင်းအမျိုးသားတပ်ဦး (CNA) ကွပ်ကဲမှုနဲ့ CDF-KKG က Major Operation အဖြစ် စတင်ခဲ့ပြီးချိန်မှာပဲ ကလေးမြို့နယ်တောင်ပိုင်းက ကမ်းပါးနီ စစ်ကောင်စီစခန်းကို သိမ်းဆည်းရမိခဲ့ပြီး လက်နက်ခဲယမ်း အမြောက်အမြားကိုလည်း သိမ်းဆည်းရရှိခဲ့တယ်လို့ ဆိုပါတယ်။
ဒါ့အပြင် ဖေဖော်ရီ ၁၅ ရက်နေ့မှာတော့ ကလေးမြို့နယ်နဲ့ ဂန့်ဂေါမြို့နယ်ကြားရှိ မှန်တောရွာနဲ့ အောင်သာယာ(အနောက်)၊ အောင်သာယာ(အရှေ့) ရွာတို့က စစ်ကောင်စီ ခြေကုပ်ယူထားတဲ့ တပ်စခန်းတွေကို ဆက်လက်တိုက်ခိုက် သိမ်းပိုက်နိုင်ခဲ့တယ်လို့ ဆိုပါတယ်။
၂ လဝန်းကျင် ကြာမြင့်တဲ့ စစ်ဆင်ရေးအတွင်းမှာ ABSDF က ရဲဘော် ၂ ယောက် ကျဆုံးခဲ့ပြီး ရဲဘော် ၆ ယောက် ဒဏ်ရာရရှိခဲ့တယ်လို့ ဆိုပါတယ်။
ဒါ့အပြင် CDF-KKG Major Operation လို တခြားစစ်ဆင်ရေးတွေကိုလည်း တော်လှန်ရေးမဟာမိတ်တပ်တွေနဲ့အတူ လက်တွဲညီညီနဲ့ ဆက်လက်ကြိုးပမ်းသွားမယ်လို့ ထုတ်ပြန်ချက်ထဲမှာ ဖော်ပြထားပါတယ်။
ကေခိုင်
