အမေရိကန်ပြည်ထောင်စု၊ နယူးယောက်မြို့ရှိ ဟဒ်ဆန်မြစ်ထဲကို ခရီးသွားရဟတ်ယာဉ်တစင်း ဧပြီ ၁၀ ရက်က ပျက်ကျခဲ့ပြီး ကလေး ၃ ယောက် အပါအဝင် လိုက်ပါလာသူ ၆ ယောက်စလုံး သေဆုံးခဲ့ကြောင်း နယူးယောက်မြို့တော်ဝန် အဲရစ်အဒမ်စ်က ပြောကြားခဲ့ပါတယ်။
သေဆုံးသူတွေဟာ စပိန်က မိသားစု ၅ ယောက်နဲ့ လေယာဉ်မှူးတို့ ပါဝင်တယ်လို့ ယူဆရကြောင်း မြို့တော်ဝန် အဒမ်စ်က သတင်းစာရှင်းလင်းပွဲမှာ သတင်းထောက်တွေကို ပြောပါတယ်။
Truth Social မှာ တင်ထားတဲ့ ပို့စ်တခုမှာ အမေရိကန်သမ္မတ ဒေါ်နယ်ထရမ့်ပ်က “ဟဒ်ဆန်မြစ်ထဲမှာ ကြောက်စရာကောင်းတဲ့ ရဟတ်ယာဉ်ပျက်ကျမှု ဖြစ်ပွားခဲ့ပြီးတော့ လူ ၆ ယောက်လုံး သေဆုံးသွားတယ်။ မတော်တဆမှုရဲ့ ဗီဒီယိုဖိုင်ဟာ အတော်ကို ကြောက်စရာ ကောင်းပါတယ်။ သယ်ယူပို့ဆောင်ရေးဝန်ကြီး ရှောင်န် ဒပ်ဖီနဲ့ သူ့ရဲ့ကျွမ်းကျင်ဝန်ထမ်းတွေလည်း အဲဒီနေရာကို ရောက်ရှိနေပြီဖြစ်ပြီး မကြာခင်မှာပဲ ဘာတွေဖြစ်ခဲ့တယ် ဆိုတဲ့ အသေးစိတ် ကြေညာချက်တွေ ထုတ်ပြန်လာပါလိမ့်မယ်” လို့ ရေးသားထားပါတယ်။
နယူးယောက် ဟယ်လီကော်ပတာ ခရီးသွားလုပ်ငန်းက Bell 206 အမျိုးအစား ရဟတ်ယာဉ်ဟာ မွန်းလွဲ ၂ နာရီ ၅၉ မိနစ်မှာ မြို့လယ်ရှိ ရဟတ်ယာဉ်ကွင်းမှ ထွက်ခွာခဲ့ပြီးနောက် ဟဒ်ဆန်မြစ်ပေါ်ကနေ မြောက်ဘက်ကို ပျံသန်းခဲ့တယ်လို့ နယူးယောက်ရဲမင်းကြီး ဂျက်ဆီကာ တစ်ရှ်က ပြောပါတယ်။
ဂျော့ခ်ျဝါရှင်တန်တံတားကို ရောက်တဲ့အခါ တောင်ဘက်ကို ပြန်လှည့်ပြီး မိနစ်ပိုင်းအကြာမှာပဲ ထိန်းမနိုင်သိမ်းမရဖြစ်ကာ ညနေ ၃ နာရီ ၁၅ မိနစ်လောက်မှာ မန်ဟက်တန်အောက်ပိုင်း နယ်မြေအနီးရှိ ရေထဲကို ဇောက်ထိုးကျသွားပြီး မြစ်အတွင်း နစ်မြုပ်သွားတယ်လို့ ဆိုပါတယ်။
လေယာဉ်မှူး၊ အရွယ်ရောက်ပြီးသူ ၂ ယောက်နဲ့ ကလေး ၃ ယောက်တို့ လိုက်ပါလာခဲ့ကြောင်း တာဝန်ရှိသူတယောက်က သတင်းထောက်တွေ ပြောကြားခဲ့ပါတယ်။
နယူးယောက်မြို့ ရဲတပ်ဖွဲ့က ရေငုပ်သမားတွေနဲ့ နယူးယောက် မီးသတ်ဌာန FDNY မှ ရေငုပ်သမားတွေက မြစ်ထဲ နစ်သွားသူတွေကို ရေထဲကနေ ကယ်ထုတ်နိုင်ခဲ့ပါတယ်။
၄ ယောက်က အခင်းဖြစ်နေရာမှာပဲ သေဆုံးသွားခဲ့ကြောင်း သိရှိရပြီး ကျန် ၂ ယောက်က ဒဏ်ရာတွေရထားလို့ နယ်မြေဆေးရုံကို ပို့ဆောင်ပေးထားခဲ့ကြောင်းလည်း သိရပါတယ်။
ရဟတ်ယာဉ်ဟာ ရေပြင်ကို ပြောင်းပြန် တိုက်မိခဲ့တာဖြစ်ကြောင်း တာဝန်ရှိသူတွေက ပြောကြားခဲ့ပါတယ်။
အမျိုးသား သယ်ယူပို့ဆောင်ရေး ဘေးကင်းရေးဘုတ်အဖွဲ့ NTSB က ဦးဆောင်ပြီး ဖက်ဒရယ် လေကြောင်းစီမံခန့်ခွဲရေး (FAA) နဲ့ စုံစမ်းစစ်ဆေးမှုကို လုပ်ဆောင်သွားမှာ ဖြစ်ပါတယ်။
အဲဒီရဟတ်ယာဉ်ဟာ ကြာသပတေးနေ့ရဲ့ တတိယမြောက်ခရီးစဉ်ဖြစ်ကြောင်း သတင်းရင်းမြစ်က ရိုက်တာကို ပြောပါတယ်။
ဘုရင်ခံကျွန်းပေါ်ကို ပျံသန်းခဲ့ပြီး လေဘာတီရုပ်တုအနီးကို ပျံသန်းခဲ့ကြောင်းလည်း CBS သတင်းဌာနက ဖော်ပြခဲ့ပါတယ်။
Source : Reuters
