မကွေးတိုင်း၊ နတ်မောက်မြို့နယ်နဲ့ မြိုင်မြို့နယ်တွေမှာ စစ်ကောင်စီတပ်ဖွဲ့ဝင်တွေ တိုက်ခိုက်ခံရပြီး တချို့ သေဆုံးဒဏ်ရာရရှိခဲ့ကြသလို လက်နက်ခဲယမ်းတချို့လည်း သိမ်းဆည်းခံခဲ့ရတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ဧပြီ ၁၀ ရက် မနက်စော ၃ နာရီဝန်းကျင်မှာ နတ်မောက်အခြေစိုက်တော်လှန်ရေးတပ်ဖွဲ့ဝင်တွေဟာ နတ်မောက်မြို့နားအထိကပ်လာပြီး မြို့ရဲ့တောင်ဘက်ရှိ စစ်သား၊ ရဲနဲ့ ပျူတွေဂိတ်ဖွင့်ပြီး ကားသမားတွေဆီကနေ ပိုက်ဆံတောင်းစားနေတဲ့နေရာအနီ ပေ ၁၅၀ လောက်အထိကပ်ပြီး ဝင်ရောက် ပစ်ခတ်ခဲ့တာ ဖြစ်ပါတယ်။

နတ်မောက် ပကဖ တာဝန်ခံ ကိုအဆိပ်သီးက  “ဝင်ပစ်တဲ့အချိန်က မနက်အစောကြီး ဖြစ်နေတော့ သူတို့ဘက်က ထိခိုက်သေဆုံးတဲ့အခြေအနေကို တန်းမသိခဲ့ရဘူး။ မိုးလင်းတော့မှ ၅ ယောက် သေပြီးတော့ ၇ ယောက် ၈ ယောက်လောက်ဒဏ်ရာရတယ်ဆိုတာ မြို့ပေါ်သတင်းပေးတွေဆီက တဆင့်သိရတာ” လို့ ပြောပါတယ်။

ဒီတိုက်ခိုက်မှုကို နတ်မောက် ပကဖ နဲ့ People's Defense Organization - Natmauk တို့ ပူးပေါင်းလုပ်ဆောင်ခဲ့တာဖြစ်ပါတယ်။

ဧပြီ ၉ ရက် မနက် ၇ နာရီဝန်းကျင်ကလည်း မြိုင်မြို့နယ်ထဲမှာ စစ်ကောင်စီတပ်ကို ကြားဖြတ်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် တယောက် သေဆုံးကာ ဒဏ်ရာရသူတွေလည်း ရှိကာ လက်နက်ခဲယမ်းတချို့ သိမ်းဆည်းရရှိခဲ့တယ်လို့ ဝံပုလွေ ပြောက်ကျားတပ်ဖွဲ့-မြိုင် ဆီကနေ သိရပါတယ်။

ဝံပုလွေ ပြောက်ကျားတပ်ဖွဲ့-မြိုင်ရဲ့ တာဝန်ခံ ဗိုလ်မီးပွားက “မြိုင် တောင်ဘက် ၄ မိုင်လောက်မှာရှိတဲ့ စက်မှု ၂ ထဲမှာ စစ်သား၊ ရဲနဲ့ ပျူ ၁၀၀ လောက် တပ်စွဲနေတယ်။ အဲ့ထဲကကောင်တွေက မနက်တိုင်း ဆိုင်ကယ်တွေ နဲ့ အပြင်ထွက်နေကြလို့ သတင်းရလို့ စက်မှု ၂ နဲ့ ကိုက် ၅၀၀ ကနေ ကြိုစောင့်ခဲ့တာ။ အဲ့ဒိနေ့က စစ်သား ၆ ယောက် ထွက်လာကြတာကို မြင်လို့ပစ်ခတ်ခဲ့တာ။ တယောက်ကတော့ အဲ့နေရာမှာသေတယ်။ ဒဏ်ရာရတဲ့ ၂ ယောက်ရယ် ကျန်တဲ့ ၃ ယောက်ရယ်က သူတို့နေတဲ့ စက်မှု ၂ ထဲဝင်ပြေးသွားကြပြီးတော့ ၆၀ မမ လက်နက်ကြီးတွေနဲ့ ပြန်ထုတယ်။ ကျနော်တို့ရဲဘော်တွေကလည်း သေတဲ့ကောင်ဆီက လက်နက်ခဲယမ်းတွေကောက်ပြီး ပြန်ဆုတ်လာခဲ့ကြတာ ထိခိုက်ဒဏ်ရာရတဲ့သူ မရှိခဲ့ဘူး”လို့ ပြောပါတယ်။

အဲ့ဒီတိုက်ခိုက်မှုကို ဝံပုလွေပြောက်ကျားတပ်ဖွဲ့-မြိုင်၊ မြိုင် ပကဖ၊ ကိုမုဆိုးအဖွဲ့၊ ကိုစတီး အဖွဲ့၊ ကိုကင်းအဖွဲ့၊ ဓားမင်းကြီးတပ်ဖွဲ့နဲ့ မြိုင်ညီညွှတ်ရေးတပ်ပေါင်းစုတို့ ပူးပေါင်း လုပ်ဆောင်ခဲ့ကြတာ ဖြစ်ပါတယ်။

အဲ့ဒိတိုက်ခိုက်မှုကနေ MA3 သေနက် ၁ လက်၊ ကျည်ဘောက် ၃ ခု၊ လက်ပစ်ဗုံး ၁ လုံးနဲ့ ၅ ဒသမ ၅၆ ကျည် ၁၀၀ ကျော်သိမ်းဆည်းရရှိခဲ့ပါတယ်။

မကွေးတိုင်းအတွင်း စစ်ရေးအရှိန်မြှင့်တင်တော့မှာဖြစ်လို့ ပြည်သူတွေအနေနဲ့ စစ်ကောင်စီ လက်အောက်ခံတွေနဲ့ နီးနီးကပ်ကပ်မနေကြဖို့ တိုက်တွန်းထားတယ်လို့ မကွေးတိုင်းအတွင်းက တော်လှန်ရေးတပ်ဖွဲ့ဝင်တွေဆီကနေသိရပါတယ်။