ဧပြီ ၁၀ ရက်နေ့မှာ ကျရောက်တဲ့ ၁၆ နှစ်မြောက် အာရက္ခတပ်တော်နေ့ အခမ်းအနားကို ဂျပန်နိုင်ငံ တိုကျိုမြို့၊ နာဂိုယာမြို့နဲ့ အိုဆာကာမြို့တွေမှာ ဂျပန်နိုင်ငံမှာရောက်ရှိနေတဲ့ ရခိုင်လူမျိုးတွေက စည်ကားသိုက်မြိုက်စွာကျင်းပခဲ့တယ်လို့ ရက္ခိုင်အစည်းအရုံး (ဂျပန်) က သိရပါတယ်။
ရက္ခိုင့်အစည်းအရုံး (ဂျပန်) က ဦးဆောင်ပြီးတော့ ဧပြီ ၆ ရက် မွန်းတည့် ၁၂ နာရီကနေ ညနေ ၅ နာရီထိ မြို့ ၃ မြို့မှာ တပြိုင်တည်း ကျင်းပခဲ့ကြတာပါ။
အာရက္ခပြည်လွတ်မြောက်ရေးအတွက် ပေးဆပ်မှုများစွာနဲ့ အားသွန်ခွန်စိုက် ကြိုးပမ်းနေကြတဲ့ အာရက္ခတပ်တော်ကို ဂုဏ်ပြုချင်တာကြောင့် ၁၆ နှစ်မြောက် အာရက္ခတပ်တော်နေ့ကို ကျင်းပတာလို့ ဆိုပါတယ်။
ရက္ခိုင်အစည်းအရုံး (ဂျပန်) ရဲ့ တာဝန်ရှိသူတယောက်က “ဂျပန်မှာရောက်ရှိနေတဲ့ ရခိုင်ပြည်သူ/ပြည်သားတွေကို အာရက္ခအောင်လံတော်အောက်မှာ အမျိုးသားစည်းလုံးညီညွတ်ရေး၊ အာရက္ခပြည်လွတ်မြောက်ရေးနဲ့ တိုင်းပြည် ပြန်လည်ထူထောင်ရေး လုပ်ငန်းစဉ်တွေမှာ တယောက်မကျန် ပါဝင်လာနိုင်ဖို့၊ နှိုးဆော်တိုက်တွန်းနိုင်ဖို့အတွက် အခုလို ဂုဏ်ပြုပွဲကို ခမ်းခမ်းနားနား ကျင်းပပြုလုပ်ရတာပါ” လို့ ပြောပါတယ်။
အာရက္ခတပ်တော်နေ့ အခမ်းအနားကို ULA/AA ခေါင်းဆောင်အချို့က တက်ရောက်ဂုဏ်ပြု ချီးမြှင့်ခဲ့တယ်လို့ သိရပါတယ်။ဒါ့အပြင် အခမ်းအနားမှာ ဂျပန်ရောက် အာရက္ခလူငယ်မောင်မယ်တွေကနေ အကအလှတွေနဲ့ ဖျော်ဖြေတင်ဆက်ခဲ့ပြီး ပျော်ရွှင်စရာ ကံစမ်းမဲအစီစဉ်တွေလည်း ပါဝင်ခဲ့တယ်လို့ ဆိုပါတယ်။
ကေခိုင်
