ရှမ်းပြည်မြောက်ပိုင်း၊ လားရှိုးမြို့မှာ တရုတ်နိုင်ငံက ကောင်စစ်ဝန်ရုံးတခု ကြားခံထားပြီး MNDAA ကိုးကန့်အုပ်ချုပ်ရေးနဲ့ စစ်ကောင်စီ အုပ်ချုပ်ရေးတို့က ညှိနှိုင်းအုပ်ချုပ်ဖို့ ရှိနေတယ်လို့ MNDAAနဲ့ နီးစပ်သူတွေက ပြောပါတယ်။
တရုတ်နိုင်ငံရဲ့ ကြားဝင်ညှိနှိုင်းမှုကြောင့် ရှမ်းပြည်နယ်မြောက်ပိုင်းရဲ့ မြို့တော်လားရှိုးကနေ MNDAA ကိုးကန့်တပ်တွေဟာ ဧပြီ ၂၂ နောက်ဆုံးထားပြီး ဆုတ်ခွာပေးရမှာပါ။
ကိုးကန့်တပ် ဆုတ်ခွာသွားရင် လားရှိုးမှာ တရုတ်နိုင်ငံက ကောင်စစ်ဝန်ရုံးတခု ကြားခံထားပြီး MNDAA ကိုးကန့်အုပ်ချုပ်ရေးနဲ့ စစ်ကောင်စီ အုပ်ချုပ်ရေးတို့က ညှိနှိုင်းအုပ်ချုပ်ဖို့ ရှိနေတယ်လို့ ကိုးကန့်တပ်နဲ့ နီးစပ်တဲ့ လားရှိုးမြို့နေသူတယောက်က ပြောပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် တည်ရှိရာ လားရှိုးမြို့ကို ထိန်းချုပ်နိုင်ဖို့အတွက် MNDAA ကိုးကန့်တပ်နဲ့ အတူ ပြည်မက တော်လှန်ရေးအင်အားစုတွေ၊ ဒေသခံပြည်သူ့ကာကွယ်ရေးတပ်ဖွဲ့(PDF)တွေက ပူးပေါင်းတိုက်ပွဲဝင်ခဲ့တာဖြစ်ပြီး ထိခိုက်ဒဏ်ရာရ ကျဆုံးခဲ့တာတွေလည်း ရှိပါတယ်။
အသက်တွေ၊ ကိုယ်လက်အင်္ဂါတွေနဲ့ မိသားစုဘဝတွေကို ပေးပြီး သိမ်းယူခဲ့တဲ့ နယ်မြေတခုကို အခုလို စစ်ကောင်စီနဲ့ အုပ်ချုပ်ယန္တရားတွေ ပြန်လည်ဝင်ရောက် အခြေချခွင့်ပေးတာဟာ လုံးဝမဖြစ်သင့်ဘူးလို့ တော်လှန်ရေးရဲဘော်တယောက်က ပြောပါတယ်။
လားရှိုးမြို့ပေါ် ၁၂ ရပ်ကွက်မှာ စစ်ကောင်စီရဲ့ အုပ်ချုပ်ရေးယန္တရားတွေ ပြန်လည် လည်ပတ်ခွင့်ပြုမှဖြစ်ပြီး မြို့ရဲ့ ဝန်းကျင်မှာတော့ ကိုးကန့်တပ်တွေ ဆက်လက်ထိန်းချုပ်သွားမှာလို့ နီးစပ်သူတွေက ပြောပါတယ်။
ဒီကိစ္စနဲ့ ပတ်သက်ပြီး ကိုးကန့်ဘက်က တရားဝင်ထုတ်ပြန်တာ မရှိသေးပေမဲ့ လက်ရှိ လားရှိုးမြို့က ကိုးကန့် လက်အောက်ခံ ဝန်ထမ်းတွေဟာ ရွှေ့ပြောင်းဖို့ ပြင်နေကြပါတယ်။
MNDAA ကိုးကန့်တပ် ဦးဆောင်တဲ့ တော်လှန်ရေးအင်အားစုတွေဟာ လားရှိုးမြို့အပါအဝင် သိန္နီ၊ ကွမ်းလုံ၊ ချင်းရွှေဟော်၊ လောက်ကိုင်၊ ကုန်းကြမ်း၊ မော်ထိုက်၊ ဖောင်းဆိုင်၊ မုံးကိုနဲ့ ကြူကုတ်မြို့တွေကို ၂၀၂၃ အောက်တိုဘာ ၂၇ မှာ စတင်ခဲ့တဲ့ ၁၀၂၇ စစ်ဆင်ရေးကာလအတွင်း တိုက်ခိုက်သိမ်းပိုက်ထိန်းချုပ်ခဲ့တာ ဖြစ်ပါတယ်။
