အင်အားပြင်းငလျင်ဒဏ်ကို ကြုံခဲ့ရပြီးနောက် တပတ်အတွင်း စစ်ကောင်စီက လေကြောင်း၊ လက်နက်ကြီးတွေနဲ့ တိုက်ခိုက်တာကြောင့် ကလေးအပါအဝင် ပြည်သူ ၆၈ ယောက် သေဆုံးခဲ့ရတယ်လို့ အမျိုးသားညီညွတ်ရေးအစိုးရ(NUG) က ဧပြီ ၅ ရက်မှာ ထုတ်ပြန်ပါတယ်။
ဧပြီ ၄ ရက် ည ၁၁ နာရီခွဲအချိန်အထိ လူ့အခွင့်အရေးဆိုင်ရာဝန်ကြီးဌာနက အတည်ပြုထားတဲ့ အချက်အလက်တွေအရ ထုတ်ပြန်လာတာဖြစ်ပြီး လေကြောင်းက ၄၈ ကြိမ်၊ လက်နက်ကြီးနဲ့ ၁၅ ကြိမ်၊ စုစုပေါင်း ၆၃ ကြိမ်တိုက်ခိုက်လို့ ကလေးငယ် ၁ ယောက်၊ အမျိုးသမီး ၁၅ ယောက်အပါအဝင် စုစုပေါင်း အရပ်သားပြည်သူ ၆၈ ယောက် အသက်ဆုံးရှုံးခဲ့ရတယ်လို့ ဆိုပါတယ်။
ငလျင်ဘေးဒဏ်ကို အဆိုးဝါးဆုံးခံစားခဲ့ရတဲ့ စစ်ကိုင်းတိုင်းကို လေကြောင်း၊ လက်နက်ကြီး ၁၃ ကြိမ်နဲ့ အများဆုံးတိုက်ခိုက်ခဲ့ပြီး မန္တလေးတိုင်းကိုလည်း ၈ ကြိမ် တိုက်ခိုက်ခဲ့ပါတယ်။
ရန်ကုန်နဲ့ တနင်္သာရီတိုင်းကလွဲလို့ နိုင်ငံအနှံ့ကို တိုက်ခိုက်ထားတာဖြစ်ပြီး ဒဏ်ရာရသူပေါင်း ၆၆ ယောက်ရှိပါတယ်။
ဒါဟာ ဝန်ကြီးဌာနက ကောက်ယူအတည်ပြုထားတဲ့ အချက်အလက်တွေပဲ ဖြစ်ပြီး အပစ်ရပ်တယ်လို့ ကြေညာထားတဲ့ စစ်ကောင်စီဟာ ဧပြီ ၅ ရက် ဒီနေ့အထိ လေကြောင်းနဲ့ရော လက်နက်ကြီးနဲ့ပါ တိုက်ခိုက်နေတာ ဖြစ်ပါတယ်။
