ကရင်နီပြည်နယ်၊ ဘောလခဲမြို့နယ်ထဲက ဝမ်မလန်းစခန်းကုန်းစစ်ဆင်ရေးမှာ အမှတ် ၁၁၀၅ တပ်ရင်း၊ ဘောလခဲပြည်သူ့ကာကွယ်ရေးတပ်က ရဲဘော် ၃ ယောက် ကျဆုံးခဲ့တယ်လို့ တပ်ရင်းက ဧပြီ ၄ ရက်နေ့မှာ ထုတ်ပြန်ထားပါတယ်။

ရဲဘော် ဒဲနီယယ်လေး(ခ)ခွါးဒို၊ ရဲဘော် ပိုင်သိန်းချစ်(ခ)ရှမ်ဖူး၊ ရဲဘော် အယ်ဒိုထူးတို့ဟာ မတ် ၁၂ ရက်နေ့မှာ ကျဆုံးခဲ့ရပြီး ၁၄ ရက်နေ့မှာ ကောင်းကောင်းမွန်မွန်သင်္ဂြိုဟ်ပေးခဲ့တယ်လို့ ဆိုပါတယ်။

ဘောလခဲ PDF တာဝန်ရှိသူက “ရဲဘော်ခွားဒိုက စီနီယာရဲဘော်တယောက်လည်းဖြစ်တယ်။ ၄ နှစ်နီးပါး တာဝန်ထမ်းဆောင်ခဲ့တာပေါ့နော်။ ကျန်ရဲဘော် ၂ ယောက်ကတော့ တာဝန်ထမ်းဆောင်တာ လပိုင်းပဲရှိပါသေးတယ်။ ဝမ်မလန်းစခန်းကုန်းစစ်ဆင်ရေးမှာ ကျဆုံးသွားခဲ့ပါတယ်။ အသေးစိတ်ကိုတော့ စစ်ရေးအရ ပြောခွင့်မရှိသေးပါ” လို့ ပြောပါတယ်။

ကျဆုံးသွားရတဲ့ရဲဘော်တွေကို အာဇာနည်သူရဲကောင်း အဖြစ် အသိအမှတ်ပြုပြီး လေးစားဂုဏ်ယူကာ ကျဆုံးရမှုအတွက် မိသားစုနဲ့ထပ်တူ ဝမ်းနည်းရတယ်လို့ ဆိုပါတယ်။

ဝမ်မလန်းစခန်းကုန်းကို မတ် ၃၀ ရက်နေ့မှာ ကရင်နီပူးပေါင်းတပ်ဖွဲ့တွေက တိုက်ခိုက်သိမ်းပိုက်နိုင်ခဲ့ပြီး စစ်ကောင်စီတပ်ဘက်က အလောင်း ၄ လောင်းနဲ့ လက်နက်ခဲယမ်းတွေကို သိမ်းဆည်းရမိခဲ့တယ်လို့ သိရပါတယ်။

ဘောလခဲမှာရှိတဲ့ စစ်ကောင်စီတပ်ရဲ့ကာကင်း စခန်း ၅ ကို ကရင်နီပြည်တပ်ပေါင်းစုံ စစ်ဦးစီးအဖွဲ့က မတ်လထဲမှာ သိမ်းပိုက်နိုင်ခဲ့ပြီး စစ်ကောင်စီတပ်ဘက်က အယောက် ၆၀ သေဆုံး၊ တချို့ကိုအရှင်ဖမ်းမိပြီး လက်နက်အစုံ အလက် ၄၀ နဲ့ ကျည်အမျိုးအစားအစုံကို သိမ်းဆည်းရမိတယ်လို့ ဧပြီ ၂ ရက်နေ့က ထုတ်ပြန်ထားပါတယ်။

ကရင်နီပြည်က တော်လှန်ရေးတပ်ဖွဲ့တွေ၊ ပြည်သူ့ကာကွယ်ရေးတပ်ဖွဲ့ ပေါင်းစုံပါဝင်ပြီး ဘောလခဲနဲ့ ဖားဆောင်းမှာရှိတဲ့ စစ်ကောင်စီတပ်တွေကိုတိုက်ခိုက်တဲ့ စစ်ဆင်ရေးတရပ်ကို ၂၀၂၅ ခုနှစ် မတ် ၄ ရက်နေ့မှာ စတင်ဆင်နွှဲခဲ့ပြီး စစ်ဆင်ရေးစတင်ချိန် ၁ လအတွင်း အကြမ်းဖက်စစ်ကောင်စီတပ်ရဲ့ ဗျူဟာတပ်အခြေစိုက် ကင်းတွေဖြစ်တဲ့ ဘောလခဲမြို့နယ်က အမှိုက်ကျင်း၊ ကျောက်ခွဲစက်၊ ရေကျော်၊ ရေနီပေါက်၊ ဝမ်ပလန်း စတဲ့ ကာကင်းစခန်းတွေကို တိုက်ခိုက်သိမ်းပိုက်လိုက်ပြီး ဖားဆောင်း မီးသတ်တိုက်နဲ့ ရေဆိပ်တွေကိုလည်း တိုက်ခိုက်ကန့်သတ်နိုင်ခဲ့တယ်လို့ ဆိုပါတယ်။