အမေရိကန်ပြည်ထောင်စု၊ တန်နက်ဆီ ပြည်နယ်မှာ ပြင်းထန်တဲ့မုန်တိုင်းတွေကြောင့် အနည်းဆုံး လူ ၅ ယောက် သေဆုံးခဲ့ရပြီး ရာနဲ့ချီတဲ့ ပြည်သူတွေဟာ ဓာတ်အားပြတ်တောက်နေပါတယ်။

နေအိမ်တွေလည်း သိသိသာသာ ထိခိုက်ပျက်စီးမှုတွေရှိခဲ့ပြီး သောက်ရေသုံးရေ အကြံပေးချက်တွေ ထုတ်ပြန်ထားရကြောင်း ပြည်နယ်တာဝန်ရှိသူတွေက ဧပြီ ၃ ရက်မှာ ပြောဆိုပါတယ်။

တန်နက်ဆီအရေးပေါ် စီမံခန့်ခွဲမှုအေဂျင်စီရဲ့ ဒါရိုက်တာ ပက်ထရစ်ရှီးဟန်ဟာ ကားရိုးလ်၊ မက်နေးရီ၊ အိုဘီယွန်နဲ့ ဖှယက်တ် ခရိုင်တွေမှာ ရာသီဥတုကြောင့် သေဆုံးမှု ၅ ခုကို အတည်ပြုခဲ့ပါတယ်။

အိမ်ခြေ ၇၅၀၀ ထက်မနည်း လျှပ်စစ်မီး ပြတ်တောက်နေဆဲဖြစ်ကြောင်းလည်း သိရပါတယ်။ အုပ်ချုပ်ရေးမှူး ဘေးလ်လီဟာ မက်နေးရီ ကောင်တီရှိ ပျက်စီးသွားတဲ့ ဆဲလ်မာမြို့ကို သွားရောက်ခဲ့ပြီး အဲဒီက အခြေအနေကို အိုးမဲ့အိမ်မဲ့ဖြစ်ခဲ့ရတဲ့ မိသားစုများစွာနဲ့အတူ အစစ်အမှန် ပျက်စီးဆုံးရှုံးမှုအဖြစ် ဖော်ပြခဲ့ပါတယ်။

အမျိုးသားမိုးလေဝသဌာနမှ မိုးလေဝသပညာရှင် ရိုင်ယန် ဟပ်စ်တပ်ကလည်း အထူးသဖြင့် ဧပြီ ၅ ရက်မှာ လျှပ်တပြက် ရေကြီးခြင်းနဲ့ ပိုမိုပြင်းထန်တဲ့ မိုးကြိုးမုန်တိုင်းတွေ ဖြစ်နိုင်ခြေ အပါအဝင် ဆက်လက်ဖြစ်ပွားနေတဲ့ ပြင်းထန်တဲ့ ရာသီဥတုအန္တရာယ်တွေကို သတိပေးခဲ့ပါတယ်။

တက္ကဆက်မှ အိုဟိုင်းယိုးပြည်နယ်အထိ ဖြန့်ကြက်ထားတဲ့ အမေရိကန်ပြည်ထောင်စုရဲ့ အစိတ်အပိုင်းတခုမှာ ကြာသပတေးနေ့က အားပြင်းတဲ့ နွေဦးမုန်တိုင်းကြောင့် လူ ၇ ယောက်ထက် မနည်းသေဆုံးပြီး လေဆင်နှာမောင်း တိုက်ခတ်ကာ မိုးကြိုးမုန်တိုင်းတွေလည်း ဖြစ်ပေါ်ခဲ့တာကြောင့် ရေကြီးမှုအန္တရာယ်လည်း မြင့်တက်လာပါတယ်။

အင်အားကြီး မုန်တိုင်းစနစ်ဟာ နိုင်ငံရဲ့အလယ်ဗဟိုမှာ ရပ်တန့်သွားဖွယ်ရှိကြောင်း အမျိုးသားမိုးလေဝသဌာနမှ ပြောကြားခဲ့ပါတယ်။

မိုးသည်းထန်စွာရွာသွန်းပြီး စိုစွတ်နေတဲ့ ဒေသတွေမှာ ရေလွှမ်းမိုးမှုတွေနဲ့ လေဆင်နှာမောင်းတွေ ဖြစ်နိုင်ကြောင်းလည်း ဆိုပါတယ်။

Source : Reuters