ကရင်နီပြည်နယ်အတွင်း ကုန်စည်ကူးသန်းရောင်းဝယ်နေတဲ့ ကုန်ကားတွေအပေါ်မှာ လက်နက်ကိုင်ဆောင်တာ၊ ယူနီဖောင်း ဝတ်ဆင်တာတွေ မပြုလုပ်ကြဖို့ ကရင်နီပြည် ကြားကာလ အုပ်ချုပ်ရေးကောင်စီ IEC က မတ် ၃၁ ရက်မှာ ထုတ်ပြန်ထားပါတယ်။

မော်ချီးဒေသကို ကုန်စည်ကူးသန်းနေတဲ့ ကုန်ကားတွေပေါ်မှာ စစ်ယူနီဖောင်း ဝတ်တာ၊ လက်နက် ကိုင်ဆောင်သွားလာတာတွေ မပြုလုပ်ဘဲ သတ်မှတ်လမ်းကြောင်းအတိုင်း သွားလာကြဖို့ကို အသိပေးထားပါတယ်။

IEC အတွင်းရေးမှူး ၂ ဦးဗညားက “သေနတ်တွေ uniform တွေဆိုတာက ဂုဏ်သရေရှိတာတွေ ဖြစ်တာပေါ့နော်။ အဲဒါကို ပုံမှန်စီးပွားရေးလုပ်ငန်းတွေထဲမှာ တကားကားနဲ့ဆိုရင် လူထုအတွက်လည်း ကြည့်လို့မကောင်းသလို တော်လှန်ရေးအင်အားစုရဲ့ ပုံရိပ်ကိုလည်း ထိခိုက်နစ်နာစေတာပေါ့နော်”လို့ ပြောပါတယ်။

မော်ချီး သွားလာခွင့်ကို စစ်ရေးအရ မတ် ၅ ရက်က စတင်ပိတ်ထားခဲ့ပြီး အခုရက်ပိုင်းအတွင်းမှာ ပြန်လည်ဖွင့်လှစ်ပေးကာ အန္တရာယ်ကင်းတဲ့ လမ်းကြောင်းတွေကို ဖော်ဆောင်ထားပေးတယ်လို့ ဦးဗညားက ပြောပါတယ်။

ခရီးသွားလာနေသူတယောက်က "ကျမအထင်ကတော့ ကောင်းတယ်လို့ ထင်တယ်။ နေရာတိုင်းမှာ သေနတ်မှ မလိုတာ” လို့ ပြောပါတယ်။

ကုန်ကားတွေပေါ်မှာ စစ်ယူနီဖောင်းဝတ်တာ၊ သေနတ်ကိုင်ဆောင်တာ မပြုလုပ်ကြဖို့နဲ့ သတ်မှတ်ထားတဲ့ လမ်းကြောင်းအတိုင်း သွားလာခြင်းမရှိပါက ထိရောက်စွာ အရေးယူမယ်လို့ ထုတ်ပြန်ချက်မှာ ပါရှိပါတယ်။

မတ် ၇ ရက်က မော်ချီးဒေသတနေရာကို စစ်ကောင်စီတပ်က လေကြောင်းကနေ ဗုံးကြဲ တိုက်ခိုက်ခဲ့တဲ့အတွက် ပြည်သူ ၂ ယောက် သေဆုံးပြီး ၁၀ ယောက်လောက် ထိခိုက်ခဲ့ပါတယ်။