ကရင်နီပြည်နယ်၊ ဒီးမော့ဆိုမြို့နယ် အနောက်ဘက်ခြမ်းမှာ မတ် ၂၈ ရက်နေ့က ငလျင်လှုပ်ခတ်ခဲ့ပြီး ငလျင်ရဲ့ နောက်ဆက်တွဲအနေနဲ့ တွင်းအနက်ကြီးတခု ဖြစ်ပေါ်လာခဲ့တယ်လို့ ဒေသခံနဲ့ စစ်ဘေးရှောင်ပြည်သူတွေဆီက သိရပါတယ်။

ဒေသခံအမျိုးသားတယောက်က “၂၉ ရက်နေ့ နေ့လယ်ပိုင်းက သစ်ပင်တွေ အောက်ထဲ ချိုင့်ဝင်ပြီး ပြိုကျတာ၊ ဒီနေ့အထိ တဖြည်းဖြည်းနဲ့ပြိုနေတုန်းပဲ။ ကျင်းက အောက်ထဲမမြင်ရတဲ့ထိ နက်တယ်” လို့ ပြောပါတယ်။

ကျင်းပေါက်ရဲ့အကျယ်က ပေ ၁၀၀ ဝန်းကျင်အထိရှိပြီး ၂၉ ရက် နေ့လယ်ကနေ ခုလက်ရှိအချိန်အထိ တအိအိနဲ့ ပြိုနေပြီး ခန့်မှန်းချေအရ ပေ ၁၀၀ လောက်ထိ နက်နိုင်တယ်လို့ ဆိုပါတယ်။

ငလျင်ကြောင့် ဒီးမော့ဆိုအနောက်ခြမ်းက ဒေသခံနဲ့ စစ်ဘေးရှောင်တွေ အားထားရတဲ့ ချောင်းရေလည်း ၃ ပေကျော် ကျဆင်းသွားခဲ့ပြီး ရေနောက်နေတာကြောင့် အသုံးပြုဖို့ခက်ခဲနေကာ သောက်သုံးရေလိုအပ်နေတယ်လို့ စစ်ဘေးရှောင်တွေက ပြောပါတယ်။

ဒါ့အပြင် ငလျင်ကြောင့် ဟိုဝမ်ဒေသမှာ Church ကျောင်းပြိုကျတာ၊ နန်းမယ်ခုံက ဆန်စက်နဲ့ နေအိမ်အုတ်နံရံတွေ ပြိုကျတာ၊ မော်ချီးက စာသင်ကျောင်းပျက်စီးတာတွေ ရှိတယ်လို့ ဒေသခံတွေဆီက သိရပါတယ်။