တရုတ်အမျိုးသား ကမ်းလွန်ရေနံကော်ပိုရေးရှင်း (CNOOC) က တောင်တရုတ်ပင်လယ် အရှေ့ပိုင်းမှာ အကြီးစား ရေနံမြေတခုကို ရှာဖွေတွေ့ရှိခဲ့ပြီး တန်ချိန် သန်း ၁၀၀ ကျော်ရှိကြောင်း သက်သေပြခဲ့ပါတယ်။

အသစ်တွေ့တဲ့ ဟွေ့ကျိုး 19-6 ရေနံတွင်းဟာ တရုတ်နိုင်ငံရဲ့ ကမ်းလွန်ရေနံရှာဖွေရေးမှာ အောင်မြင်မှုတရပ် ဖြစ်ပြီး နိုင်ငံရဲ့ ပထမဆုံး အကြီးစား ကျောက်အကြေတွေ ပေါင်းစပ်ထားတဲ့ ကျောက်လွှာကြောထဲက ရေနံတွင်း ဖြစ်တယ်လို့ CNOOC က ပြောပါတယ်။

တရုတ်နိုင်ငံ တောင်ပိုင်း ကွမ်တုံပြည်နယ်က ရှန်းကျန်းမြို့ကနေ ကီလိုမီတာ ၁၇၀ အကွာမှာရှိတဲ့ ရေနံတွင်းဟာ ပျမ်းမျှရေအနက် မီတာ ၁၀၀ မှာ ရှိနေတာပါ။

စမ်းသပ်တူးဖော်မှုကနေ ရေနံစိမ်း စည်ပေါင်း ၄၁၃ စည်နဲ့ သဘာဝဓာတ်ငွေ့ ကုဗမီတာ ၆၈၀၀၀ ထုတ်လုပ်နိုင်ခဲ့ပြီး သူ့ရဲ့ အလားအလာကို သက်သေပြခဲ့ပါတယ်။

ကမ်းလွန်ရေနံနဲ့ သဘာဝဓာတ်ငွေ့ရှာဖွေရေးဟာ အပူချိန်မြင့်မားခြင်း၊ ဖိအားမြင့်ခြင်းနဲ့ ရှုပ်ထွေးတဲ့ အခြေအနေတွေ အပါအဝင် စိန်ခေါ်မှု အများကြီးကို ရင်ဆိုင်နေရတယ်လို့ ကုမ္ပဏီက ဆိုပါတယ်။

ဒီအတောအတွင်း၊ ပင်လယ်ရေနက် ဟိုက်ဒရိုကာဗွန်သိုက်တွေရဲ့ အရေးပါတဲ့ အစိတ်အပိုင်း ဖြစ်တဲ့ အနည်ကျကျောက်တွေ ရောထွေးပါဝင်နေတဲ့ ကျောက်လွှာတွေကြားက ရေနံလှောင်ကန်တွေဟာ ယေဘုယျအားဖြင့် စိမ့်ဝင်နိုင်မှုနည်းလို့ ရေနံနဲ့သဘာဝဓာတ်ငွေ့တွင်းကြီးတွေကို ဖော်ထုတ်ဖို့ ပိုခက်ခဲစေပါတယ်။

ဒီနေ့ခေတ် ကမ္ဘာ့မှာ အသစ်ရှာတွေ့ခဲ့တဲ့ ရေနံနဲ့ သဘာဝဓာတ်ငွေ့သိုက်တွေရဲ့ ၆၀ ရာခိုင်နှုန်းဟာ နက်ရှိုင်းတဲ့ အလွှာတွေမှာ တွေ့တာပါ။

တောင်တရုတ်ပင်လယ် အရှေ့ပိုင်းမှာ တရုတ်နိုင်ငံ ရေနံနှင့် သဘာဝဓာတ်ငွေ့ တူးဖော်ရေး လုပ်ငန်းဟာ အောင်မြင်မှုတွေ ဆက်တိုက်ရခဲ့ပြီး တန်ချိန် သန်း ၁၀၀ ကျော် သိုမှီးထားတဲ့ ရေနံတွင်းတွေကို နှစ်နှစ်ဆက်တိုက် ရှာဖွေတွေ့ရှိခဲ့ပါတယ်။

Source: Reuters