မန္တလေး၊ အိုးဘိုအကျဉ်းထောင်မှာ မတ် ၂၈ ရက်က လှုပ်ခတ်ခဲ့တဲ့ ငလျင်ကြောင့် အကျဉ်းသားတွေ အပါအဝင် အနည်းဆုံး အမျိုးသား/ အမျိုးသမီး ၄ ယောက် သေဆုံးပြီး ၁၁ ယောက် ဒဏ်ရာရရှိခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက် (PPNM) က ဧပြီ ၁ ရက်မှာ ထုတ်ပြန်ထားပါတယ်။
PPNM တာဝန်ရှိသူ ကိုသိုက်ထွန်းဦးက “အကျဥ်းဦးစီးဝန်ထမ်းလား၊ နိုင်ငံရေးအကျဥ်းသားလား၊ အကျဥ်းသားလား ဆိုတာ ခွဲခြားဖို့ခက်နေပါတယ်ဗျ။ အနည်းဆုံး သေဆုံးသူ ၄ ဦးရှိတယ်လို့ အတည်ပြုထားနိုင်ပါတယ်။ သေဆုံးမှုတွေက ဒီထက်ပိုများပြားတဲ့ အနေအထားလည်း ရှိနေပါတယ်” လို့ ပြောပါတယ်။
အိုးဘိုထောင်ထဲက အမျိုးသားအဆောင် အလုပ်ရုံပြိုကျတာကြောင့် အဆောင်တွေကြားမှာ ကာထားတဲ့ အုတ်နံရံတွေ ပြိုကျပြီး အမျိုးသားတယောက် သေဆုံးကာ တယောက်က ပြင်းထန်ဒဏ်ရာ ရရှိခဲ့တယ်လို့ သိရပါတယ်။
ဒါ့အပြင် အမျိုးသမီး အဆောင် ၁ နဲ့ ၂ ပြိုကျခဲ့တဲ့အတွက် အမျိုးသမီး ၂ ယောက် သေဆုံးပြီး ထိခိုက်ဒဏ်ရာရသူ ၁၀ ယောက်လောက်ရှိတယ်လို့ ဆိုပါတယ်။
အမျိုးသား (သို့မဟုတ်) အမျိုးသမီးလို့ အတည်မပြုနိုင်သေးသူ တယောက်လည်း သေဆုံးခဲ့ပြီး စုစုပေါင်း သေဆုံးသူ ၄ ယောက်ရှိနေကာ သေဆုံးသူတွေက အကျဥ်းထောင်ဝန်ထမ်းနဲ့ အကျဥ်းချခံရသူ ခွဲခြားဖို့ ခက်ခဲနေသေးတယ်လို့ သိရပါတယ်။
စစ်ကောင်စီတပ်က အကျဥ်းထောင်ထဲမှာ သေဆုံးရမှုတွေကို သတင်းထိန်ချန်ထားတာကြောင့် အတိအကျမသိရသေးဘဲ အကျဥ်းထောင်ထဲမှာ အတည်ပြုနေဆဲ သေဆုံးသူက ၁၂ ယောက်အထိ ရှိနိုင်တယ်လို့ ဆိုပါတယ်။
ဧပြီ ၁ ရက် နေ့လယ် ၁ နာရီအထိ DVB က ကောက်ယူထားတဲ့ စာရင်းတွေအရ ငလျင်ကြောင့် သေဆုံးသူပေါင်း ၃,၆၄၃ ယောက်၊ ထိခိုက်ဒဏ်ရာရ ၄,၅၇၅ ယောက်နဲ့ ပျောက်ဆုံးသူ ၇၀၅ ယောက် ရှိပါတယ်။
