မြန်မာနိုင်ငံမှာ မတ် ၃၁ ရက်က စတင်ပြီး နေ့အပူချိန်တွေ ကျဆင်းလာပြီး ဧပြီ ၄ ရက်က စလို့  နိုင်ငံနေရာအနှံ့မှာ မိုးထစ်ချုန်းရွာနိုင်တယ်လို့ NUG ရဲ့ မိုးလေဝသနဲ့ ဇလဗေဒ ညွှန်ကြားမှုဦးစီးဌာနက ဒီကနေ့ ထုတ်ပြန်ပါတယ်။

စစ်ကောင်စီရဲ့ မိုးလေဝသနဲ့ ဇလဗေဒ ညွှန်ကြားမှုဦးစီးဌာနရဲ့ မတ် ၃၁ ရက် မနက် ၇ နာရီအချိန် ထုတ်ပြန်ချက်အရ တနင်္သာရီတိုင်းဒေသကြီး၊ ကချင်ပြည်နယ်၊ မွန်ပြည်နယ်နဲ့ ကရင်ပြည်နယ် တို့မှာ ရွာရန်ရာနှုန်း ၆ဝ နဲ့ နေရာကွက်ကျား မိုးအနည်းငယ်ရွာမယ်လို့ ထုတ်ပြန်ထားပါတယ်။

မြန်မာ့ပင်လယ်ပြင်မှာ လှိုင်းအနည်းငယ်မှ လှိုင်းအသင့်အတင့်ရှိမယ်၊ လှိုင်းအမြင့်မှာ မြန်မာ့ကမ်းရိုးတန်းတလျှောက်နဲ့ ကမ်းလွန်ပင်လယ်ပြင်မှာ ၄ ပေမှ ၇ ပေခန့် ရှိနိုင်တယ်လို့ ထုတ်ပြန်ပါတယ်။

မိုးလေဝသပညာရှင် ဦးဝင်းနိုင်ကတော့ ငလျင်ဘေးသင့်ဒေသတွေကို ရောက်လာဖွယ်ရှိတဲ့ မိုးရွာနိုင်မယ့် အနေအထားကို ကြိုတင်သတိပြုကာ ပြင်ဆင်နိုင်ဖို့ အသိပေး ထုတ်ပြန်ထားပါတယ်။

မတ် ၃၁ ရက် မြန်မာအချိန် ၁၂ နာရီ ၄၅ မိနစ် တိုင်းတာချက်အရ လေဖိအားနည်းရပ်ဝန်းဟာ ကနဦးမှန်းဆသလို ရခိုင်ကမ်းရိုးတန်းဘက် မသွား​တော့ဘဲ ဧရာဝတီတိုင်း​အောက်ဘက်က​နေ ရန်ကုန်ကို ဖြတ်သန်းသွားနိုင်တယ်လို့ ခန့်မှန်းထားပါတယ်။

မုန်တိုင်းဖြစ်မယ် မဖြစ်ဘူးဆိုတာတော့ ပြောလို့​တော့မရ​သေး​ဘဲ မိုးဇလဌာန ထုတ်ပြန်ထားတာကို သတိထားစောင့်ကြည့်ကြဖို့ အကြံပြု တိုက်တွန်းထားပါတယ်။