Home
မြန်မာသတင်း
မြန်မာငလျင်ဘေးအတွက် အမေရိကန်အစိုးရက ဒေါ်လာ ၂ သန်း ကူညီမည်
DVB
·
March 30, 2025
Photo: Aftermath of strong earthquake, in Mandalay. REUTERS/Stringer

မြန်မာနိုင်ငံ ငလျင်ဘေးအတွက် လူသားချင်းစာနာမှုဆိုင်ရာ အရေးပေါ်အကူအညီအဖြစ် အမေရိကန် အစိုးရက ဒေါ်လာ ၂ သန်း ကူညီပေးမယ်လို့ မတ်လ ၃၀ ရက်က ထုတ်ပြန် ကြေညာပါတယ်။

မတ်လ ၂၈ ရက်က ဖြစ်ပွားခဲ့တဲ့ စစ်ကိုင်းငလျင်အတွက် အရေးပေါ်တုံ့ပြန်မှုအနေနဲ့ အမေရိကန်ပြည်ထောင်စုက မြန်မာနိုင်ငံအခြေစိုက် လူသားချင်းစာနာမှုဆိုင်ရာ အကူအညီပေးတဲ့ အဖွဲ့အစည်းတွေကနေတဆင့် အမေရိကန် ဒေါ်လာ ၂ သန်းအထိ ပံ့ပိုးကူညီပေးအပ်သွားမယ်လို့ ရန်ကုန်ရှိ အမေရိကန်သံရုံးက ထုတ်ပြန်ပါတယ်။

ဒါ့အပြင် အမေရိကန် နိုင်ငံတကာ ဖွံ့ဖြိုးရေးအေဂျင်စီ (USAID) ရဲ့ အရေးပေါ်တုံ့ပြန်ရေးအဖွဲ့က အရေးပေါ် နားခိုစရာ၊ အစားအသောက်၊ ဆေးဝါးလိုအပ်ချက်နဲ့ ရေရရှိနိုင်မှု အပါအဝင် ငလျင်ဘေးသင့်ဒေသတွေရှိ မြန်မာပြည်သူတွေအတွက် အပူတပြင်း လိုအပ်ချက်တွေကို သုံးသပ်ဖော်ထုတ်ဖို့ မြန်မာနိုင်ငံသို့ ရောက်ရှိလာမယ်လို့လည်း သိရပါတယ်။

“အခုလို ခက်ခဲတဲ့ကာလမှာ မြန်မာပြည်သူပြည်သားတွေနဲ့ စည်းလုံးညီညွတ်စွာ ရပ်တည်ပြီး ပြန်လည်ထူထောင်ရေး ကြိုးပမ်းမှုကို ကူညီဖို့ အသင့်ရှိနေတယ်” လို့ အမေရိကန်သံရုံး အကြီးအကဲ ဆူဆန်စတီဗင်ဆင်က ဗီဒီယိုရုပ်သံကနေ သတင်းစကား ပြောထားပါတယ်။

ငလျင်ကြောင့် ပျက်စီးဆုံးရှုံးမှုတွေကနေ ပြန်လည်ထူထောင်ဖို့ ကြိုးပမ်းနေတဲ့ မြန်မာပြည်သူတွေနဲ့အတူ  အမေရိကန်ပြည်ထောင်စုက ရပ်တည်နေပြီး အခက်အခဲကာလအတွင်း အသက်ဆုံးရှုံးမှုတွေနဲ့ လမ်းပန်းဆက်သွယ်ရေး ပျက်စီးဆုံးရှုံးမှုတွေအတွက်  ဝမ်းနည်း စိတ်မကောင်း ဖြစ်ရတယ်လို့ အမေရိကန်သံရုံးက ထုတ်ပြန်ထားပါတယ်။

မတ်လ ၂၈ ရက်က မန္တလေးနဲ့ စစ်ကိုင်းကို ဗဟိုပြု လှုပ်ခတ်ခဲ့တဲ့ ရစ်ချ်တာစကေး ၇ ဒသမ ၇ ရှိတဲ့ အင်အားပြင်းငလျင်ကြောင့် နိုင်ငံအနှံ့ ထိခိုက်ပျက်စီးမှုတွေ ကြီးကြီးမားမားရှိခဲ့ပြီး ဒီကနေ့ မတ် ၃၀ ရက် မွန်းလွဲ ၃ နာရီအထိ DVB က ကောက်ယူရရှိတဲ့ စာရင်းအရ မြန်မာနိုင်ငံအနှံ့ သေဆုံးသူ ၂,၆၀၁ ယောက်အထိ ရှိလာပြီဖြစ်ပါတယ်။

ငလျင်ဘေးကူညီကယ်ဆယ်ရေးအတွက် စစ်ကောင်စီကရော အမျိုးသားညီညွတ်ရေးအစိုးရကပါ နိုင်ငံတကာကို အကူအညီတောင်းထားပြီး နိုင်ငံအသီးသီးက ကူညီကယ်ဆယ်ရေးအဖွဲ့တွေလည်း လာရောက်နေကြပါတယ်။

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024