မတ် ၂၈ ရက်က လှုပ်ခတ်ခဲ့တဲ့ အင်အားပြင်းငလျင်ဒဏ်ကြောင့် မန္တလေးမြို့ သံဃာတော်တွေ စာဖြေဆိုနေတဲ့ ဦးလှသိန်းဗိမာန် ပြိုကျပျက်စီးပြီး  သံဃာတော်အပါး ၂၇၀ ကျော် ပိတ်မိခဲ့ပါတယ်။

ဦးလှသိန်း ဗိမာန် (မဟာအောင်မြေစာဖြေဌာန) တိုးချဲ့ဆောင် အဆောင် ၃ တခုလုံး ပြိုကျပျက်စီးခဲ့တာဖြစ်ပြီး သံဃာအပါး ၁၀၀ လောက်ပဲ ကယ်ထုတ်နိုင်သေးတယ်လို့  ဒေသခံတွေက ဆိုပါတယ်။

မန္တလေးမြို့ခံတယောက်က “လက်ရှိအချိန်ထိဆိုရင် ၁၀၀ နီးပါးလောက်ပဲ ထုတ်နိုင်သေးတယ်။ အဲဒီထဲမှာ သေဆုံးတဲ့ သံဃာအရေအတွက် ဘယ်လောက်ရှိသလဲတော့ မသိရဘူး။ တချို့တွေဆိုရင် တော်တော် အထဲမှာ ညပ်ပိတ်နေတာမျိုးတွေ ရှိတယ်ပေါ့နော်။ ဒါ ဦးလှသိန်း စာသင်ဆောင်မှာ ဖြေတဲ့ စာသင်သံဃာတွေပေါ့နော်” လို့ ပြောပါတယ်။

အင်တာနက် လူမှုကွန်ရက်စာမျက်နှာတွေမှာတော့ သံဃာတော် အပါး ၈၀ ကျော် ပျံလွန်သွားတယ်လို့ သတင်းတွေ ထွက်ပေါ်နေပေမဲ့ အတည်မပြုနိုင်သေးဘဲ DVB က ဆက်လက်စုံစမ်းနေဆဲ ဖြစ်ပါတယ်။

ဦးလှသိန်း ဗိမာန် ခေါ် သာမဏေကျော် ဗိမာန်တော်က မန္တလေးမြို့ ၃၄၊ ၃၅ လမ်းနဲ့ ၈၅ လမ်းမှာ ရှိတာဖြစ်ပြီး ငလျင်လှုပ်ခတ်ချိန်မှာ သံဃာတော်တွေ အစိုးရဓမ္မာစရိယတန်းစာမေးပွဲ ဖြေဆိုနေကြတာ ဖြစ်ပါတယ်။