မတ်လ ၂၈ ရက်က လှုပ်ခတ်ခဲ့တဲ့ အင်အားပြင်း မြေငလျင်ကြောင့် နမ့်ခမ်း၊ မိုးကုတ်၊ ကွတ်ခိုင်၊ သီပေါ၊ ကျောက်မဲ၊ နမ္မတူ၊ နမ့်ဆန်နဲ့ မန်တုံမှာ စေတီပုထိုးတွေနဲ့ နေအိမ်တွေ ထိခိုက်ပျက်စီးသွားတယ်လို့ PSLF/TNLA သတင်းနှင့်ပြန်ကြားရေးဌာနက ဒီကနေ့ ထုတ်ပြန်ပါတယ်။
မြေငလျင်ဒဏ်ကြောင့် မန်တုံမြို့နယ် ဟင်ဟောင်းကျေးရွာရှိ စေတီပြိုကျပျက်စီးခဲ့ပြီး၊ ဆိုင်းလိန်ကျေးရွာနဲ့ ထက်ကျက်ရွာရှိ ရှေ့ဟောင်း စေတီ ၂ ဆူလည်း ယိုင်လှဲသွားခဲ့သလို တာပုံကျေးရွာရှိ စေတီတဆူလည်း ထီးတော်မြေခခဲ့ရတယ်လို့ ဆိုပါတယ်။
နမ့်ဆန်မြို့နယ် အနောက်ကင်းကျေးရွာရှိ ရှေ့ဟောင်းစေတီပုထိုးတွေလည်း ကျိုးကျပျက်စီးပြီး၊ အာရမ်းကျေးရွာရှိ စာသင်ကျောင်းလည်း ပျက်စီးခဲ့တယ်လို့ သိရပါတယ်။
ဒါ့အပြင် မိုးကုတ်မြို့ရှိ ပြည်သူ့ဆေးရုံနေရာတချို့ ပြိုကျခဲ့လို့ လူထိခိုက်ဒဏ်ရာရရှိခဲ့ပြီး၊ မိုးမိတ်မြို့ရှိ မိုးမိတ်ရွှေဂူစေတီလည်း ယိုင်လှဲသွားခဲ့ကာ တချို့မြို့တွေမှာ ငလျင်ကြောင့် ဘာသာရေးကျောင်းနဲ့ သမိုင်းဝင် အဆောက်အအုံ၊ စေတီပုထိုးအချို့ ပြိုကျပျက်စီး၊ လူတချို့ ထိခိုက်ဒဏ်ရာရခဲ့တယ်လို့ ထုတ်ပြန်ထားပါတယ်။
နောက်ဆက်တွဲ ငလျင်ငယ်တွေလှုပ်ခတ်နိုင်လို့ အန္တရာယ်ရှိတဲ့ လုပ်ငန်းတွေ ရပ်နားထားဖို့၊ ယိုင်နဲ့ သွားတဲ့ အဆောက်အအုံတွေနဲ့ အထပ်မြင့်တွေမှာ ဆက်မနေကြဖို့ မိမိနေထိုင်တဲ့ အဆောက်အအုံ၊ နေအိမ်တွေ အက်ကွဲမှု ရှိ မရှိ စစ်ဆေးပြီး လိုအပ်ရင် ကြိုတင်ရွှေ့ပြောင်းကြဖို့ အကြံပြု တိုက်တွန်းထားပါတယ်။
Photo: PSLF/TNLA
