ဧရာဝတီတိုင်း၊ ဖျာပုံမြို့နယ်မှာ စစ်ကောင်စီတပ်ထောက်ခံ လှည့်လည်ပွဲကို လူတယောက် ကျပ် ၁၀,၀၀၀ ပေး ခေါ်ယူပြီး လိုက်တဲ့သူတချို့နဲ့  မတ် ၂၇ ရက် နေ့လယ်ပိုင်းက တိတ်တဆိတ် လှည့်လည်ခဲ့တယ်လို့ ဒေသခံတွေဆီကနေ သိရပါတယ်။

စစ်ကောင်စီတပ်ထောက်ခံပွဲကို နေ့စားခ ကျပ် ၁၀,၀၀၀ ပေး ခေါ်ယူခဲ့ပေမဲ့ စစ်တပ်ထောက်ခံသူတချို့၊ ကြံ့ခိုင်ရေးပါတီဝင်တချို့နဲ့ မီးသတ်တပ်သားတွေသာ ဆိုင်ကယ်တွေနဲ့ လှည့်လည်ရာမှာ ပါဝင်ခဲ့ပြီး ပြည်သူ့စစ်တွေနဲ့ ရဲကားတချို့က ဝန်းရံပေးခဲ့တယ်လို့ ဆိုပါတယ်။

ဖျာပုံဒေသခံတယောက်က “ရဲကားတွေက အရှေ့က လှည့်လာတာ။ ကြောက်ကြောက်နဲ့ အမြန်လှည့်တဲ့ပုံစံပဲ၊ အရပ်သားတွေမပါဘူး။ စစ်သားတွေ၊ ရဲတပ်ဖွဲ့တွေနဲ့ မီးသတ်တွေနဲ့ ပြည်သူ့စစ်တွေပဲ တွေ့ရတယ်။ အခုလိုက်တဲ့သူတွေကလည်း ပစ်သတ်ခံရမှာ ကြောက်တယ်။ ငွေ ၁၀,၀၀၀ ရတော့ လိုက်တာလို့ ပြောတာကြောင့် သိရတာ” လို့ ပြောပါတယ်။

စစ်ကောင်စီတပ်ထောက်ခံပွဲကို စစ်ကား၊ ရဲကား ၃ စီး၊ ဆိုင်ကယ်အစီး ၁၀၀ လောက်နဲ့ ဖျာပုံ မြို့မဈေးပတ်ပတ်လည်မှာသာ လှည့်လည်ခဲ့တာဖြစ်ပြီး ဆိုင်ကယ်တွေနဲ့ ကားတွေကို အမြန်မောင်းပြီး အသံတိတ် လှည့်လည်ခဲ့တာလို့ ဆိုပါတယ်။

ဖျာပုံ မြို့မဈေးအနီး နေထိုင်သူတယောက်က “စစ်တပ်ထောက်ခံပွဲက အဖြစ်လောက်ပါပဲ။ အရင်လို အော်ဟစ် ထောက်ခံတာတွေ မလုပ်ဘူး။ အသံတိတ် လှည့်သွားတာ။ အနားရောက်တော့မှ မေးကြည့်တော့သိရတာ။ ငွေပေးငှားပေမဲ့ ဘယ်သူမှမလိုက်တဲ့သဘော ရှိတယ်” လို့ ပြောပါတယ်။

စစ်တပ်ထောက်ခံပွဲလုပ်ဖို့ မတ် ၂၇ ရက် မနက်ကတည်းက စစ်ကောင်စီတပ်က ဖျာပုံမြို့ အဝင် အထွက် ဂိတ်တွေမှာ ဆိုင်ကယ်တွေ၊ ကားတွေကို တင်းတင်းကျပ်ကျပ် စစ်ဆေးခဲ့တယ်လို့ သိရပါတယ်။