ကရင်နီပြည်နယ်၊ လွိုင်ကော်မြို့၊ ခရပ်ကွက်၊ နောင်ယားကန်အနီးက စာရင်းစစ်ရုံးမှာ မတ် ၂၇ ရက် ညနေ ၃ နာရီကျော်လောက်က အရပ်သားတယောက် မိုင်းထိမှန်ခဲ့လို့ ကယ်ဆယ်ရေး လုပ်ဆောင်ခဲ့ရတယ်လို့ မြေပြင်ကူညီပေးခဲ့သူတယောက်က ပြောပါတယ်။

မိုင်းထိမှန်ခဲ့သူဟာ ဧရာဝတီတိုင်းကနေ ပန်းရန်လာလုပ်တဲ့ အသက် ၂၇ နှစ်အရွယ် ကိုကျော်သူ ဖြစ်ပြီး စာရင်းစစ်ရုံးရဲ့ အုတ်တံတိုင်းကာလုပ်ငန်းတွေ လုပ်ကိုင်ပေးနေတဲ့ ဆောက်လုပ်ရေးလုပ်သားတယောက် ဖြစ်ပါတယ်။

မြေပြင်ကူညီပေးခဲ့သူက “ဒီလိုဖြစ်တာကို သိတာက ဖုန်းဆက်ခေါ်လို့ သိတာ။ ညာဘက်ခြေထောက် ပြတ်ထားတယ်။ သူက ဒီဒေသက မဟုတ်ဘူး။ ဘုန်းကြီးကျောင်းမှာ နေတာ။ မိသားစုဝင်တွေက သိထားပြီးပါပြီ” လို့ ပြောပါတယ်။

မြေမြှုပ်မိုင်း ထိမှန်ခဲ့တာကြောင့် ညာဘက်ခြေချင်းဝတ် ပြတ်တောက်ဒဏ်ရာ၊ ဘယ်မျက်စိ မိုင်းစမှန်ဒဏ်ရာနဲ့ မျက်နှာ မိုင်းစဝင်ဒဏ်ရာတွေ ရရှိသွားပါတယ်။

အရေးပေါ်ကယ်ဆယ်ရေးကို မြို့ခံအရပ်ဘက်အသင်းဖြစ်တဲ့ ရွှေညောင်ပင်အသင်းပိုင် လူနာတင်ယာဉ်နဲ့ လွိုင်ကော်ပြည်သူ့ဆေးရုံကို ပို့ဆောင်ပေးထားပြီး မိသားစုဝင်တွေနဲ့ အဆက်အသွယ်ရရှိပြီလို့ သိရပါတယ်။

အလားတူ ကရင်နီပြည်နယ်၊ နန်းမယ်ခုံမြို့နယ်မှာလည်း  နန်းစံခမ်းကျေးရွာက လယ်တောတနေရာမှာ မတ် ၂၆ ရက်က စစ်ကောင်စီထောင်ထားတဲ့ မိုင်းကို အမျိုးသမီးတယောက် နင်းမိပြီး ခြေထောက်တဖက် ဖြတ်လိုက်ရတယ်လို့ အားမာန်သစ် ပရဟိတအသင်းက ကူညီကယ်ဆယ်ပေးခဲ့သူတွေက ပြောပါတယ်။

မတ် ၂၆ ရက် မနက်ပိုင်းက လယ်တောထဲမှာ ကြက်သွန်လိုက်ကောက်ဖို့ သွားရင်းကနေ မိုင်းနင်းမိတာကြောင့် ညာဘက်ခြေထောက် အရင်းနားလောက်ကနေ ဖြတ်တောက်ရတယ်လို့ သိရပါတယ်။

ကူညီပေးခဲ့သူတယောက်က “အဲဒီအဒေါ်က ခြေထောက်တော့ ဖြတ်လိုက်ရတယ်။ အဲဒီနေရာက အရင်ကတည်းက စစ်ကောင်စီက ဖြတ်သွားဖြတ်လာ လုပ်ခဲ့တဲ့နေရာမို့လို့လေ၊ စစ်ကောင်စီနဲ့ နီးတဲ့နေရာတခုလည်း ဖြစ်ထားတဲ့အခါကျတော့ ဒီဘက်က တတ်နိုင်သလောက် မိုင်းရှင်းပေမဲ့ မိုင်းကျန်နေတဲ့ အနေအထားပေါ့။ လယ်ကွက်ထဲမှာဆိုတော့လေ” လို့ ပြောပါတယ်။

အဆိုပါအမျိုးသမီးက ကလေးငယ်ကို ရှာဖွေကျွေးမွေးနေရတဲ့ အသက် ၄ဝ ဝန်းကျင် ဒေါ်မူလုံး ဖြစ်ပြီး လီဝိုးဇာတိသူဖြစ်ကာ ခုလက်ရှိမှာတော့ ဒေါ်ပေါ်ကူးရွာမှာ နေထိုင်ရင်း အသိမိတ်ဆွေဆီ အလည်လာပြီး ကြက်သွန်ရှာချိန် ဖြစ်သွားခဲ့တာလို့ သိရပါတယ်။

မတ် ၂၇ ရက်ကလည်း လွိုင်ကော်မြို့နယ်၊ နောင်ယားကန်အနီးနားမှာ အမျိုးသားတယောက် မြေမြှုပ်မိုင်းနင်းမိတာကြောင့် ခြေထောက်ပြတ်ပြီး မျက်နှာမှာ မိုင်းထိမှန်ခဲ့ပါတယ်။