မြန်မာပြည်တွင်း စစ်ကိုင်းမြို့အနီးကို ဗဟိုပြုပြီး မတ် ၂၈ ရက် ဒီနေ့မွန်းလွဲပိုင်းက  အင်အား ရစ်ချ်တာစကေး  ၇ ဒသမ ၇ ရှိ အင်အားပြင်း ငလျင်တခု လှုပ်ခတ်သွားတယ်လို့ အမေရိကဘူမိဗေဒလေ့လာရေးဌာနက ထုတ်ပြန်ထားပါတယ်။

အင်အာပြင်း ငလျင်ကြောင့် စစ်ကိုင်း၊ မန္တလေး၊ ပြင်ဦးလွင်၊ ကျောက်ဆည်၊ မကွေး၊  ရန်ကုန်၊ ပဲခူး၊ ရှမ်းပြည်နယ်တောင်ပိုင်းက အောင်ပန်း၊ တောင်ကြီး၊ အင်းလေး စတဲ့ မြို့တွေအတော်များများမှာ ငလျင်ဒဏ်ကို သိသိသာသာ ခံစားလိုက်ရတယ်လို့ ဒေသခံတွေက ပြောပါတယ်။

ငလျင်ဒဏ်ကြောင့် စစ်ကိုင်းတံတားဟောင်း ပြိုကျ ပျက်စီးသွားသလို မန္တလေးမြို့က နေအိမ်တိုက်တာ အဆောက်အဦတွေ၊ အောင်ပန်းမြို့က ဟိုတယ်နဲ့ လူနေအိမ်တွေ မြန်မာနိုင်ငံ ဒေသအနှံ့အပြားမှာ ဘုရားစေတီတွေ၊ ဘုန်းကြီးကျောင်းတွေနဲ့ သာသနိက အဆောက်အဦတွေ အများအပြား ပျက်စီးသွားပါတယ်။

စစ်ကိုင်းမြို့

အင်အားပြင်းငလျင်ကြီး လှုပ်ခတ်တဲ့အတွက် စစ်ကိုင်းမြို့နယ်၊ သောတာပန်ရပ်ကွက်မှာ အထပ်မြင့်တိုက် ပြိုကျပြီး လူ ၂ ယောက် သေဆုံးကာ ထိခိုက်ဒဏ်ရာရရှိသူတွေလည်း ရှိတယ်လို့ မြို့ခံတွေဆီက သိရပါတယ်။

ငလျင်ကြောင့် စစ်ကိုင်းတံတားအဟောင်း ပြိုကျခဲ့ပြီး စစ်ကိုင်းတံတားအသစ်ရဲ့ နံရံလည်း အက်သွားတဲ့အတွက် နေ့လယ် ၂ နာရီဝန်းကျင်ကစပြီး တံတားအသစ်ကို ဖြတ်သန်းသွားလာခွင့် ပိတ်ပင်ထားတယ်လို့ မြို့ခံတွေက ပြောပါတယ်။

စစ်ကိုင်းမြို့မှာ ငလျင်လှုပ်ပြီးနောက် မိုင်တဲဆင်းကတ်မှအပ တခြားဖုန်းလိုင်း ဆက်သွယ်မှုတွေလည်း ပြတ်တောက်နေတယ်လို့ သိရပါတယ်။

ဖုန်းလိုင်း၊ အင်တာနက်လိုင်း အခက်အခဲကြောင့် သေဆုံးထိခိုက်သူတွေနဲ့ ပတ်သက်တဲ့ အခြေအနေ အသေးစိတ်ကိုတော့ DVB က အတည်ပြုလို့ မရသေးပါဘူး။

ငလျင်ဗဟိုချက်ဟာ စစ်ကိုင်းတိုင်း၊ စစ်ကိုင်းမြို့နဲ့ ၁၂ ကီလိုမီတာအကွာဖြစ်ပြီး ငလျင်ကြောင့် မြန်မာ့အိမ်နီးချင်း ဘင်္ဂလားဒေ့ရှ်၊ အိန္ဒိယ၊ လာအို၊ ထိုင်းနဲ့ တရုတ်တို့မှာလည်း ထိခိုက်မှုတွေ ရှိခဲ့တယ်လို့ သိရပါတယ်။

အောင်ပန်းမြို့

ရှမ်းပြည်နယ်တောင်ပိုင်း၊ အောင်ပန်းမြို့မှာ မတ် ၂၈ ရက် မွန်းလွဲ ၁ နာရီလောက်က အင်အားပြင်းတဲ့ ငလျင်လှုပ်ခတ်သွားတာကြောင့် ဟိုတယ်−အောင်ပန်း ပြိုကျပျက်စီးသွားတဲ့အပြင် လူ ၂ ဦးသေဆုံးပြီး ဟိုတယ်ဝန်ထမ်းတွေအပါအဝင် လာရောက်တည်းခိုတဲ့သူတွေ ပိတ်မိနေဆဲဖြစ်တယ်လို့ ကနဦး သိရ ပါတယ်။

ဟိုတယ်တခုလုံး ပြိုကျသွားတာကြောင့် သေဆုံးသူ ၂ယောက်လောက်ရှိနေတယ်လို့ ကနဦးသိရှိရပြီး ဟိုတယ်ဝန်ထမ်း ၇ ‌ယောက်အပါအဝင် ပိတ်မိနေတဲ့သူ ၂၀ ဝန်းကျင်ခန့်ရှိတယ်လို့ လူမှုကယ်ဆယ်ရေး လုပ်ဆောင်ပေးနေသူတွေနဲ့ ဒေသခံတွေဆီက သိရပါတယ်။

လက်ရှိမှာတော့ ကူညီကယ်ဆယ်ပေး‌ရေးအဖွဲ့တွေက ပိတ်မိနေသူတွေကို ကယ်ထုတ်ပေးနေကြပြီး ထိခိုက်ဒဏ်ရာရရှိသူတွေနဲ့ ပိတ်မိနေသူတွေအများအပြားရှိနိုင်တယ်လို့ ဆိုပါတယ်။

ကူညီကယ်ဆယ်ရေးလုပ်နေသူတယောက်က “လောလောဆယ်တော့ ကယ်ဆယ်ရေးတွေလုပ်နေပါတယ်၊ အထဲမှာ ပိတ်မိနေကြတာကို အဆောက်အဦက ၈ ထပ်လောက်ရှိတယ် အကုန်လုံးပြိုကျသွားတာပါ။ အထဲမှာ ဧည့်သည် ဘယ်နှယောက် ကျန်တာလဲတော့ တိတိကျကျမသိရသေးပါဘူး၊ ပျက်စီးမှုတော်တော်များပါတယ်။ အထဲမှာ ကယ်ဆယ်ရေးတွေတော့ လုပ်နေသေးတယ်၊ ၁၅ ယောက်၊ အယောက် ၂၀ လောက်တော့ရှိမယ် ထင်ပါတယ်၊ တိတိကျကျတော့ဘာမှမသိရသေးပါဘူး” လို့ ပြောပါတယ်။

ဒါ့အပြင် ငလျင်ဒဏ်ကြောင့် အောင်ပန်းမြို့က သားမိုင်းခမ်း ရွှေချမ်းသာဘုရားရဲ့ အုတ်တိုင်ပြိုကျ သွားခဲ့ပြီး နေအိမ်အအောက်အဦအချို့လည်း ထိခိုက်ပျက်စီးမှုတွေရှိနေတယ်လို့ သိရပါတယ်။

အောင်ပန်းနာရေးကူညီမှုအသင်းဝင်တယောက်က “အောင်ပန်းမြို့ရဲ့ အထင်ကရ အောင်ပန်းဟိုတယ်ကြီး ပြိုကျသွားတယ်။ အထဲမှာ တည်းခိုနေတဲ့ ဧည့်သည်နဲ့ ဝန်ထမ်းအချို့ ပိတ်မိနေပြီး ထိခိုက်ဒဏ်ရာရသူတွေလည်းရှိတယ်။ ပိတ်မိနေသူတွေကို အရေးပေါ်ကယ်ဆယ်ရေး လုပ်နေရတာ” လို့ ပြောပါတယ်။

ဖြူးမြို့

အင်အားပြင်းငလျင်ကြောင့် ပဲခူးတိုင်း၊ ဖြူးမြို့မှာလည်း အနည်းဆုံး လူ ၄ ယောက်သေဆုံးပြီး အဆောက်အအုံတချို့ ပြိုကျပျက်စီးသွား ပါတယ်။

ဖြူးမြို့၊ ဘူတာမြောက်ရပ်ကွက်အတွင်း ငလျင်ကြောင့် လူနေအိမ်တလုံးရဲ့ နံရံဟာ တဖက်ဟာ နေအိမ်ဘက်ကို ပြိုကျခဲ့တာကြောင့် တဖက်အိမ်မှာရှိနေတဲ့ မိသားစုဝင် ၆ ယောက်ထဲက ၄ ယောက် သေဆုံးခဲ့ပြီး တယောက် ဒဏ်ရာရရှိခဲ့ပါတယ်။

နီးစပ်သူတယောက်က “ခေါင်းရင်းအိမ်ဘက်က နံရံက ပြိုကျတာ။ သူတို့က အိမ်နောက်ဘက် အဲဒီနံရံဘေးမှာ ဖျာခင်းပြီး ထမင်းစားနေကြတာ။ ၄ ယောက်ကတော့ သေသွားတယ်။ တယောက်ကတော့ ဒဏ်ရာရရုံပဲ၊ ကျန်တဲ့ ၄ ယောက်လုံးကတော့ နေရာမှာတင် ပိပြီးဆုံးသွားတယ်” လို့ ပြောပါတယ်။

သေဆုံးသူတွေဟာ အထက်တန်းပြဆရာမတယောက်အပါအဝင် သူ့ရဲ့ မိခင်၊ မတ်နဲ့ တူတော်စပ်သူတို့ ဖြစ်တယ်လို့ သိရပါတယ်။

ဖြူးမြို့အတွင်း ငလျင်ကြောင့် မီးသတ်ရေစင်၊ သက်တမ်းရင့်ရုပ်ရှင်ရုံတို့ အပါအဝင် အဆောက်အအုံ အများအပြား ပြိုကျပျက်စီးခဲ့သလို သေဆုံးမှုတွေလည်း ထပ်ရှိနေသေးတယ်လို့ သိရပါတယ်။

နေပြည်တော်

စစ်ကိုင်းကို ဗဟိုပြုပြီးလှုပ်ခတ်သွားတဲ့ ပြင်းအား ရစ်ချ်တာစကေး ၇ ဒသမ ၇ ရှိတဲ့ ငလျင်ကြောင့် နေပြည်တော်နဲ့ အမြန်လမ်းပိုင်းတချို့ ပျက်စီးခဲ့သလို ပျဉ်းမနား-တောင်ညိုလမ်းတလျှောက်၊ လမ်းမကြီးနဲ့ သပြေကုန်းစျေးရုံလည်း ပျက်စီးသွားပါတယ်။

ရန်ကုန်-မန္တလေး အမြန်လမ်း မိုင်တိုင်အမှတ် ၁၈၀ နဲ့ မိုင်တိုင်အမှတ် ၃၆၂ မိုင်မှာ မတ်လ ၂၈ ရက်နေ့ မွန်းလွဲပိုင်းက ငလျင်လှုပ်ခတ်ခဲ့တာ‌ကြောင်း လမ်းသားပြိုကျ ပျက်စီးမှုတွေ ဖြစ်ပွားခဲ့တယ်လို့ ခရီးသွားတွေဆီကနေ သိရပါတယ်။

မိုင်တိုင်အမှတ် ၁၈၀ နဲ့ မိုင်တိုင်အမှတ် ၃၆၂ မိုင်မှာ ပြင်းအားမြင့်တဲ့ မြေငလျင်လှုပ်ခတ်ခဲ့တာကြောင့် လမ်းပျက်စီးသွားတာကြောင့် ခရီရှေ့ဆက်မရတော့ပဲ ရောက်တဲ့နေရာမှာ စီးလာတဲ့ကားတွေ ရပ်ထားရတယ်လို့ ဆိုပါတယ်။

ရန်ကုန်မြို့ကိုကားနဲ့ပြန်လာသူတဦးက”ငလျင် အကြီးအကျယ်လှုပ်တာ ကြောက်စရာကြီး။ ခုရောက်နေတဲ့ မိုင်တိုင်အမှတ် ၃၆၂ မှာတော့ လမ်းပျက်စီးသွားလို့ ရှေကိုလည်း ဆက်လို့မရဘူး။ လမ်းကျိုးကျတဲ့နေရာမှာ ပိတ်မိနေတယ်။ အခြားနေရာတွေလည်း ပျက်စီးဖို့ များတယ် လို့ DVBကို ပြောပါတယ်။

ငလျင်လှုပ်ခတ်မှုကြောင့် ရန်ကုန်- နေပြည်တော် လမ်းပိုင်းမှာ တံတားတွေအပါအဝင် ၈ နေရာလောက် ပျက်စီးသွားတာရှိပြီး တချို့ လမ်းတံတားပိုင်းတွေမှာ ဆိုးဆိုးဝါးဝါး ပျက်စီးတာကြောင့် ကားတောင် ဖြတ်မောင်းလို့ အဆင်မပြေဘူးလို့ အမှတ် ၁၉၄ မိုင်မှာ ကားပိတ်မိနေတဲ့ ခရီးသွားတဦးက ပြောပါတယ်။

အင်းလေးဒေသ

ရှမ်းပြည်နယ်တောင်ပိုင်း၊ အင်းလေး ဟဲယာရွာမနဲ့ ဇရပ်ကြီးမှာ ငလျင်ဒဏ်ကြောင့် လူ ၄ ယောက် သေဆုံးခဲ့ပြီး ရွာတရွာလုံးနဲ့ ဖောင်တော်ဦးဘုရား၊ ဇရပ်ကြီးကျောင်းတို့လည်း ထိခိုက် ပျက်စီး ခဲ့တယ်လို့ ဒေသခံတွေက ပြောပါတယ်။

ဒီနေ့ မွန်းလွဲ ၁၂ နာရီ ၅၃ မိနစ်မှာ လှုပ်ခဲ့တဲ့ ငလျင်ကြောင့် နေအိမ် ၁၀၀ ကျော် ပျက်စီခဲ့တဲ့အပြင် လူထိခိုက်တာလည်း ရှိတယ်လို့ သိရပါတယ်။

ကယ်ဆယ်ရေးအဖွဲ့ဝင် တယောက်က "ကြာတောရွာက ထိခိုက်မှု အများဆုံးပဲ။ အိမ်တွေ စောင်းသွားတာ များတယ်။ အကုန်ပြိုကျတာလည်း များတယ်။ လောလောဆယ်တော့ စာရင်းအတိအကျ မရသေးဘူး"လို့ ပြောပါတယ်။

လူထိခိုက်တဲ့အပြင် လူအသွားများတဲ့ ဖောင်တော်ဦးဘုရား ရင်ပြင်လည်း အက်သွားပြီး မြို့ပေါ်က မြို့မရန်ကုန်ကျောင်းလည်း ပျက်စီးခဲ့သလို တခြားဘုန်းကြီးကျောင်း ၅ ကျောင်းလည်း ပျက်စီးခဲ့တယ်လို့ ပြောပါတယ်။

ဇရပ်ကြီးရွာ ဘုန်းကြီးကျောင်းက ဆရာတော်တပါးက “ကျောင်းကတော့ ဘာမှမရတော့ဘူး အကုန် ပျက်စီးသွားပြီ။ ရွာမှာလည်း တရွာလုံးပါကုန်တယ်၊ တရွာလုံး တအိမ်မှ အကောင်း မကျန်ဘူး။ လောလောဆယ် သေလူ ၄ ဦးလောက်ရှိတယ်” လို့ ပြောပါတယ်။

အင်းလေးက နေရာတော်တော်များများ ထိခိုက်ပျက်စီးခဲ့ရပြီး ပျောက်ဆုံးနေတဲ့သူတွေလည်း ရှိနေတယ်လို့ သိရပါတယ်။

ဒေသခံအမျိုးသားတယောက်က “ဟဲယာရွာမမှာက ဘုန်းကြီးကျောင်း ၈ ကျောင်း ၉ ကျောင်းလောက်က အပျက်အစီးများတယ်။ ရွာထဲမှာရှိတဲ့ အိမ်ခြေ ထောင်နဲ့ချီလည်း ပျက်စီးတယ်။ အသေအပျောက်တွေက ရှိတယ်၊ အတိအကျတော့ သတင်းမရသေးဘူး၊ ရှာဖွေနေဆဲပဲ” လို့ ပြောပါတယ်။

ဒါ့အပြင် အင်းလေးဒေသလုံးဆိုင်ရာ ပရိယတ္တိသာသနပါလ စာမေးပွဲ စာဖြေဆိုချိန် ငလျင်လှုပ် ပြီး ကျောင်းပြိုကျလို့ စာဖြေသံဃာ အနည်းငယ် ထိခိုက်ခဲ့တယ်လို့လည်း သိရပါတယ်။

ယခုမှာ ကယ်ဆယ်ရေးလုပ်နေဆဲဖြစ်လို့ ထိခိုက်မှု တိတိကျကျကို မသိနိုင်သေးဘူးလို့ ပြောပါတယ်။

အင်းထဲမှာ ရွာပေါင်း ၈၀ ကျော်လောက်ရှိနေပြီး ငလျင်ကြောင့် ထိခိုက်ပျက်စီးမှုများနေကာ ငလျင်က ထပ်လှုပ်နိုင်သေးတယ်လို့ ပြောဆိုနေကြတာကြောင့် တချို့က လယ်ကွင်းတွေ၊ ကွင်းပြင်တွေမှာ နေထိုင်နေကြတယ်လို့ သိရပါတယ်။

မိတ္ထီလာမြို့

မန္တလေးတိုင်း၊ မိတ္ထီလာမြို့မှာ  မတ် ၂၈ ရက် ဒီနေ့မွန်းလွဲပိုင်းက အင်အား ရစ်ချ်တာစကေး ၇ ဒသမ ၇ ရှိ ငလျင်လှုပ်ခတ်လို့ အဆောက်ဦအချို့ ပြိုကျပျက်စီးခဲ့ပါတယ်။

ငလျင်ကြောင့် မိတ္ထီလာကန်ဘောင် We Love Meikhtila ဆိုင်းဘုတ်အနီး မြေပြိုကွဲအပ်၊ ခြင်္သေ့ကြီး ၂ ကောင်အနက် တကောင်ပြိုကျခဲ့ပါတယ်။

အေးသုခမြိုင်တည်းခိုခန်း၊ ဝမ်းတော်ပြည့်ဘုရားမုခ်ဦးနဲ့ အိမ်အချို့ ပြိုကျပျက်စီးခဲ့ပြီး လူသေဆုံးမှုရှိခဲ့တယ်လို့ ဒေသခံတွေဆီက သိရပေမဲ့ အတည်ပြုနိုင်ခြင်း မရှိသေးပါဘူး။ ငလျင်လှုပ်ပြီးနောက်  မိတ္ထီလာကန်ဘောင်လမ်းကိုလည်း ပိတ်ထားတယ်တယ်လို့ သိရပါတယ်။

မန္တလေး

ငလျင်လှုပ်ကြောင့် မန္တလေးမြို့မှာ လူနေအိမ်တွေတိုက်တာအဆောက်အဦးတွေပျက်စီးခဲ့သလို အထင်ကရ မစိုးရိမ်တိုက်ဟောင်း အပါအဝင် စေတီပုထိုးတွေလည်း ပြိုကျပျက်စီးခဲ့ပါတယ်။ ဒါ့အပြင် မန္တလေးအပြည်ပြည်ဆိုင်ရာလေဆိပ်မှာလည်း မျက်နှာကြက်တွေ ပြိုကျပျက်စီးမှု ရှိခဲ့ပါတယ်။

ရန်ကုန်

အင်အားပြင်းထန်တဲ့ ငလျင်လှုပ်ခတ်မှုကို ရန်ကုန်မြို့ခံ ပြည်သူတွေလည်း သိသိသာသာ ခံစားခဲ့ရပေမဲ့ အပျက်အစီးနဲ့ ပတ်သက်လို့ သိပ်မကြားရသလောက်ပဲလို့ ရန်ကုန်မြို့ခံတွေထံက သိရပါတယ်။

ဒီနေ့မွန်းလွဲပိုင်းမှာ စစ်ကိုင်းမြို့နားကို ဗဟိုပြုပြီး အင်အားပြင်းထန်တဲ့‌ ငလျင်လှုပ်ခတ်မှုကြောင့် တနိုင်ငံလုံး ငလျင်ဒဏ်ကို ခံစားခဲ့ရပြီး မန္တလေး၊ အောင်ပန်း၊ စစ်ကိုင်း၊ ကရင်နီ၊ အမြန်လမ်း နေရာတွေမှာ တိုက်တွေ ပြိုကျတာ၊ လမ်းတွေ ပျက်စီးတာ၊ တံ‌တားတွေ ပြိုကျခဲ့ပေမဲ့ ရန်ကုန်မှာတော့ အပျက်အစီးအထိအခိုက် မရှိသလောက်ပဲလို့ ရန်ကုန်မြို့ခံတွေက ပြောပါတယ်။

ဘားလမ်းမှာနေသူ တယောက်က  “စစလှုပ်တုန်းက စက္ကန့်ပိုင်းလောက် ဇဝေဇဝါ ဖြစ်နေ ကြသေးတယ်။ အရမ်းလှုပ်လာတော့ တိုက်ပေါ်ကနေ အကုန်ဆင်းပြေးကြတာ။ အပျက်အစီးရယ် လို့တော့ သိပ်မကြားရဘူး။ ဖုန်းလိုင်း တချို့တော့ ဖုန်းခေါ် မရတာမျိုးတွေ ဖြစ်တယ်” လို့ ပြောပါတယ်။

ရန်ကုန်မှာ အခုလို ပြင်းအားမြင့်တဲ့ ငလျင်ဒဏ်ခံစားခဲ့ရတာကြောင့် နောက်ဆက်တွဲ ငလျင်တွေ ထပ်မံလှုပ်ခတ်လာမှာကို ရန်ကုန်မြို့ခံတွေအနေနဲ့ စိုးရိမ်နေကြရပြီး အခုလှုပ်ခတ်သွားတဲ့ ငလျင်မျိုးသာ ရန်ကုန်ကုန်နီးကပ်မယ်ဆိုရင် ထိခိုက်ဆုံးရှုံးမှု များနိုင်တယ်လို့ အင်းစိန်မြို့နယ်က မီးသတ်တပ်ဖွဲ့ဝင် တယောက်က သုံးသပ်ပါတယ်။

ရန်ကုန်မှာ အဲ့ဒီငလျင်ဒဏ်ကြောင့် ပျက်စီးဆုံးရှုံးမှုအတွက် အဆင်သင့် တုံ့ပြန် ဆောင်ရွက်နိုင်ဖို့ စခန်းတိုင်းကို အရေးပေါ်တပ်လှန့်ထားတယ်လို့ သိရပါတယ်။

မီးသတ်တပ်ဖွဲ့ဝင် တယောက်က “ရန်ကုန်က အဖျားခတ်တဲ့ သဘောလောက်ပဲရှိတယ်။ အရေးပေါ်ထွက်ခွာဖို့ အဆင်သင့်ဖြစ်နေဖို့ စခန်းတိုင်းကို တပ်လှန့်ထားတယ်။ အခု သတင်းရသလောက်ကတော့ ရန်ကုန်မှာ ကြီးကြီးမားမားထိသွားတဲ့ သတင်းမျိုးမရသေးဘူး။ သတိထားရမှာက ညအချိန် ဒီအင်အားလောက်နဲ့နောက်ဆက်တွဲတွေ ဆက်ဖြစ်လာမယ်ဆိုရင်တော့ ရန်ကုန်လည်း စိုးရိမ်ရတဲ့အခြေအနေပါ” လို့ ပြောပါတယ်။

ရန်ကုန်မှာ ငလျင်ဒဏ်ကြောင့် ပျက်စီးဆုံးရှုံးမှု မများပေမဲ့ အခြေခံလူတန်းစားတွေ နေထိုင်တဲ့ ရပ်ကွက်တချို့မှာတော့ နေအိမ်တွေဟာ ပုံမှန်ထက် အနည်းငယ်ရွဲ့စောင်းတာမျိုးတွေ ဖြစ်‌ခဲ့တယ်လို့ သိရပါတယ်။ 

ဒီနေ့ငလျင်ကြောင့် ရန်ကုန်မြို့ထက် မန္တလေးမြို့ဟာ ထိခိုက်မှုအများဆုံး ဖြစ်နေတယ်လို့ လတ်တလော သိရပြီး လူသေဆုံးမှုတွေနဲ့ မီးလောင်တာတွေကြောင့် အကူအညီတွေ တောင်းခံ နေရတယ်လို့သိရပါတယ်။

ဘန်ကောက်

ထိုင်းနိုင်ငံ ဘန်ကောက် ကတူးကျတ်နယ်မြေထဲမှာ ဒီကနေ့မွန်းလွဲပိုင်းက လှုပ်ခတ်သွားတဲ့ အင်အားပြင်း ငလျင်ကြောင့် ဆောက်လက်စ အထပ် ၃၀ ရှိတိုက်ကြီး ပြိုကျခဲ့ပြီး လူ ၄၀ ကျော် ပိတ်မိနေတယ်လို့ ထိုင်း Today သတင်းမှာ ဖော်ပြပါတယ်။

ဖြစ်ဖြစ်ချင်း လူ ၅၀ ကျော် ပိတ်မိနေရာက   ၇ ဦး ထွက်ပြေးလွတ်မြောက်လာပြီး ၄၀ လောက် ကျန်နေတယ်လို့ သတင်းမှာ ဖော်ပြပါတယ်။

မန်နေဂျာအွန်လိုင်းသတင်းမှာတော့ အဲဒီတိုက်ထဲမှာ လူပေါင်း ၈၀ ကျော်ရှိနေကာ ၂ ဦးသေဆုံးခဲ့ပြီး ကယ်ဆယ်ရေးအဖွဲ့က ၁ ယောက်ရဲ့ အလောင်းကိုပဲ ယူထုတ်နိုင်ခဲ့ပေမဲ့ နောက်တလောင်းကို ထုတ်ယူ ဖို့ ဆက်ကြိုးစားနေတယ်လို့ ဖော်ပြပါတယ်။ 

အဲဒီအဆောက်အအုံဟာ ဘတ်သန်း ၂၁၃၆ သန်း အသုံးပြုတည်ဆောက်နေတဲ့ အထပ် ၃၀ ပါ ထိုင်းအစိုးရရဲ့ နိုင်ငံတော်ဘဏ္ဍာငွေ စစ်ဆေးရေးရုံးသစ်ဖြစ်ပြီး ပြီးလုနီးချိန် ခုလို သဘာဝဘေး အန္တရာယ်နဲ့ ကြုံရတာလို့  တာဝန်ရှိသူက ပြောကြောင်း သတင်းမှာ ဖော်ပြပါတယ်။