
ကရင်နီပြည်နယ်၊ လွိုင်ကော်မြို့ထဲ ပြန်လည်ဝင်ရောက်လာသူတွေကို စစ်ကောင်စီတပ်က စစ်ဆေးရေးတွေ ပြုလုပ်ပြီးနောက် ခုရက်ပိုင်းအတွင်း ဖမ်းဆီးခံရသူတွေ ရှိနေတယ်လို့ ဒေသခံတွေက ပြောပါတယ်။
Kpay အကောင့်တွေကို တိုက်ဆိုင်စစ်ဆေးတာတွေ၊ CDM သို့မဟုတ် ၅၀၅ နဲ့ ညိသူတွေ၊ ဒေသခံမဟုတ်သူတွေကို စစ်ဆေးပြီး ဖမ်းဆီးတာတွေရှိနေပြီး မတ်လ တတိယအပတ်အတွင်း ဖမ်းဆီးခံရသူ ၃ ယောက်ထက်မနည်း ရှိနေတယ်လို့ သိရပါတယ်။
ဖြစ်စဥ်ကိုသိတဲ့ ဒေသခံအမျိုးသမီးတယောက်က “ကယား(ကရင်နီ)က လူက ရှမ်းပြည်မှာမိရင် ကယားကို ပြန်ပို့တယ်။ ရှမ်းပြည်ကလူက ကယားမှာမိရင် ရှမ်းကိုပြန်ပို့တယ်။ ပြီးတော့ သူတို့က Kpay ကို လှမ်းထောက်တယ်၊ ဒီအကောင့်က ကင်းလား မကင်းလားဆိုပြီး။ ကင်းရှင်းကြောင်း မကင်းရှင်းကြောင်းကို Kpay က ပြန်ချပေးတယ်။ တကယ်လို့ မကင်းရှင်းဘူးဆို သူတို့က ဖမ်းလိုက်ပြီဆိုရင် ကမ္ဘောဇဘဏ်ကို ဖုန်းဆက်တယ်၊ ဒီအကောင့်ကို ဖမ်းလိုက်ပြီ၊ ပိတ်လိုက်တော့ ဆိုတာမျိုး။ KBZ ဘဏ်နဲ့ ညှိပြီးလုပ်နေကြတာ” လို့ ပြောပါတယ်။
မှတ်ပုံတင်စစ်ဆေးတာတွေ၊ Kpay စစ်ဆေးတာတွေကနေ ဖမ်းဆီးခံရသူတွေကို ထောင်ကို တိုက်ရိုက်မပို့သေးဘဲ ရဲစခန်းအချုပ်မှာ စစ်ဆေးတာ၊ ငွေညှစ်တာတွေ ပြုလုပ်ပြီးမှ ထောက်ပို့အနေနဲ့ အမှုစွဲ ထောင်ချမယ်လို့ သိရပါတယ်။
စစ်ကောင်စီတပ်က ဖယ်ခုံမြို့နယ်နဲ့ ညောင်ရွှေမြို့နယ်မှာ စစ်ဘေးရှောင်နေကြတဲ့ ပြည်သူတွေကို နေရပ်ပြန်နေဖို့အတွက် ဖိအားပေး ခြိမ်းခြောက်နေပြီး တဖက်မှာလည်း ဖမ်းဆီးတာတွေ ပြုလုပ်နေတယ်လို့ သိရပါတယ်။
ရှမ်းပြည်နယ်နဲ့ ကရင်နီပြည်နယ်ကြားက ဆီဆိုင်-လွိုင်ကော် လမ်းမတလျှောက်မှာ စစ်ကောင်စီတပ်နဲ့ PNO ပြည်သူ့စစ်တွေရဲ့ စစ်ဆေးရေးဂိတ် ၁၅ ခုထက်မနည်း ရှိနေပြီး အချက်အလက်တွေ တိုက်ဆိုင်စစ်ဆေးမှုကိုတော့ အားကာသိပ္ပံကျောင်းမှာ ပြုလုပ်လေ့ရှိတယ်လို့ ကန္တာရဝတီတိုင်း သတင်းဌာနက ဖော်ပြထားပါတယ်။