ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးတောင်ဘက်ခြမ်းမှာရှိတဲ့ ဘုရားတောင်ရွာ ရပ်ကွက် ၃ ကို စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တဲ့အတွက် နေအိမ်တလုံး ပျက်စီးခဲ့ရတယ်လို့ အင်းလေးဒေသလူ့အခွင့်အရေးအဖွဲ့တာဝန်ခံက မတ်လ ၂၆ ရက်က ပြောပါတယ်။

စစ်ကောင်စီတပ်နဲ့ PNO ပြည်သူ့စစ်က တိုက်ပွဲဖြစ်ပွားတာမရှိဘဲ ပြည်သူတွေနေတဲ့ နေအိမ်တွေ ရပ်ကွက်တွေထဲကို လက်နက်ကြီးအပြင် ၁၂၀ မမ ဒရုန်းဗုံးသီးနဲ့ ပစ်ခတ်တာကြောင့် ပျက်စီးခဲ့ရတယ်လို့ သိရပါတယ်။

အင်းလေးဒေသလူ့အခွင့်အရေးအဖွဲ့ တာဝန်ခံက "ငြိမ်နေတယ်လို့မဟုတ်ဘူး လက်နက်ကြီး ဒရုန်းကတော့ ရက်ဆက်တိုက်ခိုက်နေတာ ရှိသလို တရက်ခြား ၂ ရက်ခြား လာတိုက်ခိုက်နေတာလည်းရှိတယ်"လို့ ပြောပါတယ်။

ဘုရားတောင်ကျေးရွာနဲ့ ရေပူကျေးရွာတကြောက နေရာတွေကို PNO ပြည်သူ့စစ်က အပိုင်လိုချင်တဲ့အတွက် ဒေသခံ ပြည်သူတွေ နေထိုင်လို့မရအောင် လုပ်နေတယ်လို့ အင်းလေးပြည်သူ့ကာကွယ်ရေးတပ်က တာဝန်ရှိသူက ပြောပါတယ်။

“ပြည်သူတွေ မနေရအောင် ဒရုန်း Drop သီးတွေ ချတယ်၊ လက်နက်ကြီး ပစ်တယ်။ ခုက ဒေသခံတွေ ပြန်နေလို့ မရဘူးပေါ့။ ရှောင်တဲ့သူတွေက ညောင်ရွှေဘက် ရှောင်တာလည်း ရှိတယ်၊ ဖယ်ခုံမြို့နယ်ဘက် ရှောင်တဲ့သူလည်း ရှိတယ်။”

ညောင်ရွှေမြို့နယ် အင်းလေးဒေသထဲက ကျေးရွာတွေနဲ့ ဘီလူးချောင်းအရှေ့ဘက်ခြမ်း နန်းတုတ်ကျေးရွာတွေထဲကို စစ်ကောင်စီနဲ့ PNO တို့က လက်နက်ကြီး၊ လေယာဥ်၊ ဒရုန်းတွေနဲ့ ၁၃၉ ကြိမ်ထိ ပစ်ခတ်တာကြောင့် ဖေဖော်ဝါရီ အတွင်း ၁၀ နှစ်အရွယ် ကလေးငယ် အပါအဝင် ပြည်သူ ၅ ယောက် သေဆုံးခဲ့ရပြီး နေအိမ်တွေလည်း မီးလောင်ပျက်စီးမှုတွေ များတယ်လို့ အင်းလေးဒေသ လူ့အခွင့်အရေးအဖွဲ့က မတ် ၂ ရက်မှာ ထုတ်ပြန်ထားပါတယ်။