တောင်ကိုရီးယားမှာ အပြင်းအထန် လောင်ကျွမ်းနေတဲ့ တောမီးကို ငြှိမ်းသတ်နေတဲ့ ရဟတ်ယာဉ်တစင်း မတ် ၂၆ ရက်မှာ ပျက်ကျခဲ့ပြီး ရဟတ်ယာဉ်မှူး သေဆုံးခဲ့တယ်လို့ မီးသတ်ဌာနက AFP သတင်းဌာနကို ပြောပါတယ်။
ဂျောင်းဘွတ်ခ် မီးသတ်ဌာန တာဝန်ရှိသူတယောက်က “တောမီးကို ငြှိမ်းသတ်နေတဲ့ ရဟတ်ယာဉ်တစင်း ယွီဆောင်မြို့နယ်မှာရှိတဲ့ တောင်တန်းတခုပေါ်မှာ ပျက်ကျခဲ့ပါတယ်” လို့ ပြောပါတယ်။
အခင်းဖြစ်ပွားရာနေရာမှာ သေဆုံးသွားတဲ့ လေယာဉ်မှူးတယောက်ရှိတယ်လို့ ကျနော်တို့ဆီ အကြောင်းကြားထားပါတယ်လို့လည်း ပြောပါတယ်။
ရဟတ်ယာဉ်တစီး ပျက်ကျပြီးတဲ့နောက် မီးငြှိမ်းသတ်နေတဲ့ ရဟတ်ယာဉ်တွေကို ရပ်နားထားရတယ်လို့ သစ်တောရေးရာဌာနကို ကိုးကားပြီး ယွန်ဟပ် သတင်းဌာနက ဖော်ပြပါတယ်။
လူအသေအပျောက်များတဲ့ တောမီးက အမြန်ကူးစက်ခဲ့ပြီး ဒေသခံ ၂၇,၀၀၀ ကျော် အိုးအိမ်စွန့်ခွာ ထွက်ပြေးခဲ့ရပါတယ်။
လေပြင်းတိုက်ခတ်မှုနဲ့ ခြောက်သွေ့တဲ့ ရာသီဥတုကြောင့် တောမီးက ရပ်ကွက်တခုလုံးကို မီးလောင်ကျွမ်းခဲ့တာပါ။
ကျောင်းတွေပိတ်ထားရပြီး အာဏာပိုင်တွေက ရာချီတဲ့ အကျဉ်းသားတွေကို အကျဉ်းထောင်တွေကနေ ပြောင်းရွှေ့ပေးခဲ့ရပါတယ်။
တောမီးလောင်ကျွမ်းမှုကို ကိုင်တွယ်ဖြေရှင်းဖို့ ရဟတ်ယာဉ် ဒါဇင်ပေါင်းများစွာ၊ မီးသတ်သမားနဲ့ စစ်သား ထောင်ပေါင်းများစွာကို ဖြန့်ကျက် တာဝန်ချထားခဲ့ရပါတယ်။
တောမီးကြောင့် မတ် ၂၆ ရက်ထိ လူ ၁၈ ယောက်ထက်မနည်း သေဆုံးခဲ့ပြီး ဒေသခံ ၂၇,၀၀၀ ကျော် အိုးအိမ်စွန့်ခွာ ထွက်ပြေးခဲ့ရတယ်လို့ တောင်ကိုရီးယားအစိုးရက ပြောခဲ့ပါတယ်။
Source : Reuters
