မလေးရှားနိုင်ငံမှာ လူဝင်မှုကြီးကြပ်ရေး ဥပဒေနဲ့ ဖမ်းဆီးထိန်းသိမ်းထားတဲ့ မြန်မာရွှေ့ပြောင်းလုပ်သား ၈၃ ယောက်ကို စစ်ကောင်စီထံ ပြန်လည်လွှဲပြောင်းပေးခဲ့တယ်လို့ မလေးရှားရောက်မြန်မာနိုင်ငံသားတွေအရေး အကူအညီပေးနေသူတွေက ပြောကြပါတယ်။
မတ်လ ၂၄ ရက်နေ့မှာ ဂျိုဟိုးပြည်နယ်၊ ဂျိုဟိုးလေဆိပ်ကနေတဆင့် ဖမ်းဆီးအကျဉ်းကျခံခဲ့ရပြီး ထောင်က လွတ်လာတဲ့ မြန်မာရွှေ့ပြောင်းလုပ်သားတွေကို ပြန်ပို့ခဲ့တာပါ။
ပြန်ပို့ခံခဲ့ရသူတွေဟာ ၂၀၂၄ ခုနှစ် ဒီဇင်ဘာလနဲ့ ၂၀၂၅ ဇန်နဝါရီလမှာ အော်ပါရာစီဝင်ရောက်ဖမ်းဆီးမှုကြောင့် အဖမ်းခံခဲ့ရပြီး လူဝင်မှုကြီးကြပ်ရေးဥပဒေနဲ့ ထောင်ဒဏ်ကျခံခဲ့ရသူတွေဖြစ်တယ်လို့ သိရပါတယ်။
မြန်မာလုပ်သားအရေး အကူအညီပေးသူတယောက်က “အခုပြန်ပို့ခံခဲ့ရသူတွေက အထောက်အထားမရှိဘဲ စားသောက်ဆိုင်တွေ၊ စက်ရုံတွေမှာ အော်ပရာစီနဲ့ ဝင်ပြီးအဖမ်းခံခဲ့ရသူတွေဖြစ်ပါတယ်။ အခုပြန်ပို့တဲ့အထဲ အမျိုးသမီးတွေလည်း ပါပါတယ်၊ အရင်ကဆို အဖမ်းခံရသူတွေက ထောင် နှစ်နဲ့ချီ ချပြီးမှ ညှိနှိုင်းမှုတွေလုပ်ပြီးမှ ပြန်ပို့တာပေ။ အခုတော့ ထောင် ၂ လ၊ ၃ လချပြီး စစ်ကောင်စီနဲ့ တိုင်ပင်ပြီး ပြန်ပို့တဲ့သဘော ဖြစ်နေပါတယ်။ မလေးရှားမှာတော့ နိုင်ငံခြားသားတွေနေတဲ့နေရာတွေကို ဆက်တိုက်ဆိုသလို ဖမ်းနေပါတယ်၊ လမ်းတွေမှာပါ ဂိတ်ချပြီး ဖမ်းဆီးတာတွေရှိပါတယ်” လို့ ပြောပါတယ်။
ရွှေ့ပြောင်းလုပ်သားတွေ ပြန်ပို့ခံရတဲ့ မတ် ၂၄ ရက်နေ့မှာပဲ မလေးရှားနိုင်ငံဆိုင်ရာ မြန်မာသံအမတ် ဦးအောင်စိုးဝင်းနဲ့ မလေးရှားအာဏာပိုင်တွေ ဂျိုဟိုးပြည်နယ်မှာ တွေ့ဆုံဆွေးနွေးခဲ့တယ်လို့ သိရပါတယ်။
ပြန်ပို့ခံခဲ့ရတဲ့ ရွှေ့ပြောင်းလုပ်သားတချို့ဟာ မိသားစုနဲ့ အဆက်အသွယ်မရတာတွေ ရှိနေပြီး သူတို့ကို စစ်မှုထမ်းဥပဒေနဲ့ စစ်သင်တန်းတွေ ပို့ဆောင်ခံရမှာကို အကူအညီပေးနေသူတွေက စိုးရိမ်နေကြပါတယ်။
