ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့နယ် တောင်ညိုလေးဆည်ဝန်းကျင်ရှိ ကျေးရွာတွေကို မတ် ၂၄ ရက်က နယ်မြေရှင်းလင်းဖို့ စစ်ကြောင်းထိုးလာတဲ့ စစ်ကောင်စီ တပ်ဖွဲ့ဝင်တွေ တိုက်ခိုက်ခံရပြီ ၆ ယောက် သေဆုံးသွားတယ်လို့ သာယာဝတီခရိုင်တပ်ရင်း ၃၈၀၁ တပ်ခွဲ ၃ နတ်စစ်သည် အဖွဲ့ဆီက သိရပါတယ်။
မတ် ၂၄ ရက် မနက် ၈ နာရီလောက်က လယ်မအင်းရွာ ဘုန်းကြီးကျောင်းမှာ အင်အား ၇၀ လောက်နဲ့ စစ်ကောင်စီတပ်ဖွဲ့ဝင်တွေတပ်စွဲပြီး လမ်းသွားလမ်းလာပြည်သူတွေကို စစ်ဆေးနေချိန် အနီးကပ် အလစ်ငိုက်ချောင်းမြောင်းပစ်ခတ် မိုင်းဆွဲတိုက်ခိုက်ခဲ့တာလို့ နတ်စစ်သည် တပ်ဖွဲ့မှူး နတ်မင်းက ပြောပါတယ်။
“ဘုန်းကြီးကျောင်းနားမှာ ကင်းဝပ်နေတဲ့ စစ်သား ၅ ယောက်ကို ကျနော်တို့ ရဲဘော်တွေ အလစ်ဝင်ပစ်တာ၊ ကိုက် ၁၀၀ လောက်ပဲဝေးတယ်။ အဲဒီမှာ ၃ ယောက်က သေသွားတယ်။ ၂ ယောက်က ဒဏ်ရာရသွားတယ်။ ၃ မိနစ်လောက်ပဲကြာတယ်၊ ပစ်ပြီးကျနော်တို့ပြန်ဆုတ်လာတာ၊ အဲတော့မှ သူတို့ဘက်က လက်နက်ကြီးတွေ၊ လက်နက်ငယ်တွေနဲ့ ပြန်ပစ်တာတွေလုပ်တယ်။ ကျနော်တို့ အဝေးရောက်သွားတော့ ထိခိုက်မိတာမရှိပါဘူး။”
အထိနာသွားတဲ့ စစ်ကောင်စီ တပ်ဖွဲ့ဝင်တွေ မတ် ၂၄ ရက် ညနေပိုင်းမှာ ဆက်လက်စစ်ကြောင်းထိုးလာချိန် ထပ်မံမိုင်းဆွဲတိုက်ခိုက်ခဲ့တယ်လို့ တပ်ဖွဲ့မှူးနတ်မင်းက ပြောဆိုပါတယ်။
“ကျနော်တို့က ဒီကောင်တွေ လိုက်လာမယ်ဆိုတာသိလို့ လယ်မအင်းရွာ အနီးမှာပဲ မိုင်းကွင်းလုပ်ထားတာ။ ကျနော်တို့ မိုင်းကွင်းထဲရောက်တော့ မိုင်း ၃ လုံးဆွဲလိုက်တာ၊ သတင်းပေးတွေဆီက သိရတာတော့ ၃ ယောက်သေသွားတယ်၊ အဲဒီထဲ ဗိုလ်မှူးတယောက် ပါတယ်ပြောတယ်။ အဲဒါနဲ့ တပ်ကိုချက်ချင်း ပြန်ဆုတ်သွားတယ်။”
အခုစစ်ဆင်ရေးမှာ သာယာဝတီခရိုင် တပ်ရင်း ၃၈၀၁၊ တပ်ခွဲ ၃ နတ်စစ်သည်နဲ့ တပ်ခွဲ ၄ Bamar Revolution Army - BRA အဖွဲ့က ရဲဘော်တွေ ပူးပေါင်းပါဝင်ခဲ့တယ်လို့ ဆိုပါတယ်။
