အမေရိကန်ကိုယ်စားလှယ်တွေနဲ့ ရုရှားကိုယ်စားလှယ်နဲ့ ဆွေးနွေးပြီး နောက်ပိုင်းမှာ ယူကရိန်းနဲ့ အမေရိကန်အဖွဲ့တွေ ထပ်မံတွေ့ဆုံခဲ့ပြီး စစ်မှန်တဲ့ ငြိမ်းချမ်းရေး၊ အာမခံချက်ရှိတဲ့ လုံခြုံရေးကို ဦးတည်တဲ့ လှုပ်ရှားမှုတွေ လိုအပ်နေပါတယ်လို့ ယူကရိန်းသမ္မတ ဗိုလိုဒီမာ ဇလန်းစကီးက မတ် ၂၄ ရက်မှာ ပြောပါတယ်။

ယူကရိန်းကိုယ်စားလှယ်အဖွဲ့ဟာ ဆော်ဒီအာရေဗျကို ရောက်ရှိနေတာဖြစ်ပြီး အဲဒီက ဆွေးနွေးမှုတွေ တိုးတက်မှုဟာ ယူကရိန်း၊ ဥရောပ၊ အမေရိကနဲ့ ကမ္ဘာပေါ်က နိုင်ငံတကာဆက်ဆံရေး တည်ငြိမ်မှုကို ရှာဖွေနေတဲ့ လူတိုင်းအတွက် လိုအပ်တဲ့ကိစ္စပါလို့လည်း ဇလန်းစကီးက ပြောပါတယ်။

အမေရိကန်နဲ့ ရုရှား တာဝန်ရှိသူတွေဟာ ပိုမိုကျယ်ပြန့်တဲ့ ငြိမ်းချမ်းရေးဆွေးနွေးပွဲတွေ ဖြစ်ပေါ်လာနိုင်မလား မျှော်လင့်ပြီး ပင်လယ်ပြင်မှာ အပစ်အခတ်ရပ်စဲရေးဆိုင်ရာ အတိအကျ အဆိုပြုချက်ကို ဆွေးနွေးခဲ့ကြတယ်လို့ ဆိုပါတယ်။

ဒီဆွေးနွေးပွဲဟာ တခြားကိစ္စရပ်တွေအကြားမှာ ပင်လယ်နက်ရေကြောင်းဆိုင်ရာ အပစ်အခတ်ရပ်စဲရေး သဘောတူစာချုပ်ကို အကောင်အထည်ဖော်ဖို့ အာရုံစိုက် ကြိုးပမ်းနေတာ ဖြစ်ပါတယ်။

အဲဒီဆွေးနွေးပွဲဟာ ၃ နှစ်ကြာစစ်ပွဲကို အဆုံးသတ်မယ့် သမ္မတ ဒေါ်နယ်ထရမ့်ပ်ရဲ့ ကြိုးပမ်းမှု ခြေလှမ်းတရပ်အဖြစ် ဝါရှင်တန်က ပုံဖော်ထားပါတယ်။

ယူကရိန်းသမ္မတ ဇလန်းစကီးဟာ ရုရှားဒုံးကျည်တိုက်ခိုက်မှုကြောင့် ယူကရိန်းနိုင်ငံ အရှေ့မြောက်ပိုင်း ဆူမီမြို့မှာ စာသင်ကျောင်းတကျောင်းနဲ့ ဆေးရုံတရုံ ပျက်စီးခဲ့ပြီး ထိခိုက်ဒဏ်ရာရသူ အများအပြား ရှိနေကြောင်း ပြောပါတယ်။

ကလေးငယ် ၁၇ ယောက် အပါအဝင် လူ ၉၀ နီးပါး ဒဏ်ရာရရှိခဲ့ပြီးနောက် ကယ်ဆယ်ရေးလုပ်ငန်းကို ဆက်လက်လုပ်ဆောင်နေကြောင်းနဲ့ ယူကရိန်းနိုင်ငံတော် အရေးပေါ်ဝန်ဆောင်မှု၊ အမျိုးသားရဲတပ်ဖွဲ့၊ ဆေးဖက်ဝန်ဆောင်မှုတွေ၊ လူထုဝန်ဆောင်မှုတွေ လုပ်ပေးနေပါတယ်လို့လည်း ဆိုပါတယ်။

ရုရှားနယ်စပ်မှ ကီလိုမီတာ ၃၀ (၁၈ ဒသမ ၆ မိုင်) အကွာမှာရှိတဲ့ ဆူမီဒေသဟာ ရုရှားနိုင်ငံမှ ဒရုန်းတွေနဲ့ ဒုံးကျည်တွေ အဆက်မပြတ် တိုက်ခိုက်ခြင်းကို ခံနေရတာဖြစ်ပါတယ်။

Source : Reuters