လာအိုနိုင်ငံ TRIMAX အထည်ချုပ်စက်ရုံမှာ မြန်မာအလုပ်သမားတွေ လုပ်ခအပြည့်မရတာအပြင် အခွင့်အရေးချိုးဖောက်ခံရတာနဲ့ပတ်သက်လို့ ဆန္ဒပြတောင်းဆိုခဲ့ကြပြီး ပြေလည်ခဲ့ပြီလို့ ဗမာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ်(ABFTU)ဆီက သိရပါတယ်။ 

TRIMAX အထည်ချုပ်စက်ရုံက မြန်မာရွှေ့ပြောင်းအလုပ်သမားတွေအနေနဲ့ စာချုပ်ပါ လစာငွေ အပြည့်အဝမရတာ၊ စက်ရုံမှာ အခွင့်အရေးချိုးဖောက်မှုတွေကြုံရတာ၊ အလုပ်သမားချင်း ခွဲခြားဆက်ဆံခံရတာတွေကြောင့် မတ် ၂၁ ရက်မှာ ဆန္ဒပြတောင်းဆိုခဲ့ကြတာလို့ဆိုပါတယ်။ 

မြန်မာအလုပ်သမားတွေဟာ အလုပ်ခေါ်စဉ်က စာချုပ်ပါအတိုင်း တလလုပ်အားခ ဒေါ်လာ ၂၅၀ ရရှိရေး၊ လုပ်ငန်းခွင် ဖိနှိပ်မှုပြဿနာတွေဖြေရှင်းပေးရေး၊ မြန်မာအလုပ်သမားတွေကို ခွဲခြားဆက်ဆံတာမလုပ်ဘဲ တန်းတူ အခွင့်အရေးပေးရေး၊ စားသောက်စရိတ် လာအိုငွေ ၅ သိန်း ရရှိရေးတို့ကို တောင်းဆိုနေခဲ့ကြတာ ဖြစ်ပါတယ်။ 

အဲဒီ ဆန္ဒပြတောင်းဆိုချက်တွေနဲ့ပတ်သက်လို့ မတ် ၂၂ ရက်မှာ လုပ်ငန်းရှင်ဘက်က တာဝန်ရှိသူတွေနဲ့အလုပ်မားတွေ ရွေးချယ်ထားတဲ့ခေါင်းဆောင်တွေ ညှိနှိုင်းခဲ့ကြပြီး ပြေလည်မှု ရရှိခဲ့တာလို့ ABFTU က ဆိုပါတယ်။ 

စက်ရုံလုပ်သားတွေနဲ့နီးစပ်တဲ့ လာအိုရောက်မြန်မာလုပ်သားတယောက်က  “ဒီမှာလည်း ပြောထားတဲ့အတိုင်း အခွင့်အရေးအပြည့်မရတဲ့ဖြစ်ရပ်တွေရှိတယ်။ မြန်မာလုပ်သားတွေရဲ့ အခုလို ဆန္ဒပြတောင်းဆိုတာကတော့ ရှားရှားပါးပါးဖြစ်ရပ်လို့ပြောရမယ်။ တောင်းဆိုချက်တွေ ရသွားတယ်ဆိုတော့ဝမ်းသာပါတယ်” လို့ ပြောပါတယ်။ 

လာအိုနိုင်ငံဆီ မြန်မာလုပ်သားတွေကို မနှစ်ကစပြီး အေဂျင်စီကတဆင့် တရားဝင်စေလွှတ်ခဲ့တာဖြစ်ပါတယ်။ 

လုပ်သားစေလွှတ်ဖို့အတွက် စစ်ကောင်စီရဲ့ အလုပ်သမားဝန်ကြီးဌာနနဲ့ လာအိုအစိုးရတို့ သဘောတူလက်မှတ်ရေးထိုး စေလွှတ်နေတာဖြစ်ပြီး အဲဒီလို မစေလွှတ်ခင်ကပဲ နယ်စပ်ကတဆင့် မြန်မာလုပ်သားတွေ သွားရောက်လုပ်ကိုင်နေတာရှိသလို တရားမဝင်လုပ်ကိုင်လို့ ဖမ်းဆီးခံရတဲ့ ဖြစ်ရပ်တွေလည်း ရှိနေပါတယ်။