မကွေးတိုင်း၊ ထီးလင်းမြို့နယ်ထဲက အလယ်ဘန်းကျေးရွာကို စစ်ကောင်စီတပ်က မတ် ၂၀ ရက် မနက် ၂ နာရီဝန်းကျင်မှာ လေ​ကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူတချို့နဲ့ အိမ်မွေးတိရစ္ဆာန်တချို့ ထိခိုက်သေဆုံးခဲ့သလို လူနေအိမ်အများအပြားလည်း ထိခိုက်ပျက်စီးကုန်တယ်လို့ ထီးလင်း ပကဖ ဆီကနေ သိရပါတယ်။

အလယ်ဘန်းရွာထဲ တည့်တည့်ကို ပြည်သူတွေ အိပ်မောကျနေတဲ့ ညဥ့်နက်ပိုင်းကြီးမှာ မကွေးလေတပ်က တက်လာတဲ့ ဂျက်ဖိုက်တာနဲ့ ပေါင် ၂၀၀ ဗုံးကြဲပြီး ဒုံးကျည်တွေနဲ့ကော စက်လတ်တွေနဲ့ ပစ်သွားတာလို့ ထီးလင်း ပကဖရဲ့ ပြန်ကြားရေးတာဝန်ခံက ပြောပါတယ်။

“ရွာခံပြည်သူတွေထဲက ၄ ယောက်က ပွဲချင်းပြီးဆုံးသွားတယ်။ အမျိုးသား တယောက်၊ အမျိုးသမီး တယောက်နဲ့ ကျန်တဲ့ ၂ ယောက်က G12 ကျောင်းသူမလေး ၂ ယောက်ပါဗျ။ ၂၅ ယောက်လောက် ဒဏ်ရာရတယ်။ ဒဏ်ရာရတဲ့အထဲမှာ စိုးရိမ်ရတဲ့သူတွေလည်း ၆ ယောက် ၇ ယောက်လောက်ရှိတယ်။ ဗုံးတွေမကွဲသေးတာတွေ ရှိနေသေးလို့ ကျန်တဲ့သူတွေကတော့ ရွာပြင်နဲ့ တခြားနေရာတွေမှာ ပြောင်းရွှေ့နေနေကြရတယ်။ မကွဲသေးတာ သုံးလေးလုံးလောက် ကျန်တယ်ဗျ။”

အဆိုပါ ဗုံးကြဲတိုက်ခိုက်ခဲ့တာကြောင့် လူနေအိမ်အလုံး ၅၀ ကျော် ပျက်စီးခဲ့ပြီး အဲဒီထဲက လူနေအိမ် ၁၀ လုံးနီးပါးကတော့ လုံးဝ မီးလောင်ပျက်စီးသွားကာ အိမ်မွေးတိရစ္ဆာန် ၁၅ ကောင်ထက်မနည်းလည်း ထိခိုက်သေဆုံးခဲ့သလို အကောင် ၂၀ ကျော် ဒဏ်ရာရရှိခဲ့ပါတယ်။

ထီးလင်းမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူ ဦးဘုန်းက “စစ်တပ်နဲ့ ကာကွယ်ရေးတပ်ဖွဲ့တွေ မြေပြင်မှာ တိုက်ပွဲဖြစ်တာမရှိဘဲနဲ့ လေကြောင်းကနေ တိုက်ခိုက်ပြီး ပြည်သူကို သက်သက်မဲ့ သတ်ဖြတ်ပြီး ပြည်သူပိုင်ပစ္စည်းတွေကို ဖျက်ဆီးနေတာဟာ ကျနော်တို့ ယောနယ်မှာ နေ့တိုင်းလိုလို ဖြစ်နေပါတယ်။ သူတို့စစ်တပ်ရဲ့ လုပ်ရပ်တွေကြောင့်မို့ ပြည်သူတွေဟာလည်း အိပ်ကောင်းခြင်းမအိပ်ရ၊ စားကောင်းခြင်း မစားရတဲ့ဘဝတွေ ဖြစ်နေကြတယ်” လို့ DVB ကို ပြောပါတယ်။

ယောနယ်မှာရှိကြတဲ့ ဒေသခံပြည်သူတွေအနေနဲ့ စစ်ကောင်စီတပ်ရဲ့ ​လေကြောင်းရန်ကို ကာကွယ်နိုင်မယ့် ကတုတ်ကျင်း တူးတာတွေအပြင် ပြည်သူ့ကာကွယ်ရေးတပ်ဖွဲ့တွေရဲ့ လေကြောင်းရန်သတိပေးချက်တွေကို အထူးအလေးထား လိုက်နာကြဖို့ တိုက်တွန်းထား ပါတယ်။

စစ်ကိုင်းတိုင်းနဲ့ ချင်းပြည်နယ်တွေနဲ့ ထိစပ်နေတဲ့ မကွေးတိုင်း​အထက်ပိုင်းက ယောဒေသဟာ မကွေးတိုင်းအတွင်း တော်လှန်ရေးအင်အားကောင်းတဲ့ ဒေသတခုဖြစ်ပြီး အာဏာသိမ်း စစ်ကောင်စီဟာ ယောဒေသက ထီးလင်း၊ ဂန့်ဂေါ၊ ဆော၊ ကျောနဲ့ ကျောက်ထုမြို့နယ်တွေကို ဖုန်းလိုင်းနဲ့ အင်တာနက်လိုင်းတွေ ဖြတ်တောက်ထားကာ လေကြောင်းတိုက်ခိုက်မှုတွေနဲ့ စစ်ရေးလှုပ်ရှားမှုတွေ ဆက်တိုက်လုပ်ဆောင်လာနေတယ်လို့လည်း ဒေသအခြေစိုက် တော်လှန်ရေးတပ်ဖွဲ့တွေဆီကနေ သိရပါတယ်။