မကွေးတိုင်း၊ ယောဒေသဖြစ်တဲ့ ထီးလင်းမြို့နယ်ထဲကို စစ်ကောင်စီတပ်က မတ် ၁၀ ရက် နေ့လယ် ၁ နာရီခွဲဝန်းကျင်မှာ ဂျက်ဖိုက်တာနဲ့ ဗုံးကြဲချသွားတာကြောင့် ဒေသခံပြည်သူ ၂ ယောက် သေဆုံးကာ ဒဏ်ရာရသူတွေရှိသလို လူနေအိမ် ၅ လုံးထက်မနည်းလည်း ထိခိုက် ပျက်စီးသွားတယ်လို့ ဒေသခံတွေဆီကနေ သိရပါတယ်။

ယောအလင်းတန်းအဖွဲ့ရဲ့ တာဝန်ရှိသူ ကိုမင်းဒဿက “ထီးလင်းနယ်အရှေ့ခြမ်း ပုံတောင်ခြေရင်းမှာရှိတဲ့ ရွာတရွာကို စစ်တပ်ရဲ့ A5 Bomber အမျိုးအစား ဂျက်ဖိုက်တာနဲ့ ဗုံးကြဲသွားတာပါ။ ရွာခံအမျိုးသားတယောက်နဲ့ အမျိုးသမီးတယောက် သေဆုံးတယ်။ ပျက်စီးမှုကတော့ အိမ် ၅ လုံးထက်မနည်းဘူးလို့ သိရတယ်ဗျ” လို့ ပြောပါတယ်။

စစ်ကောင်စီတပ်ရဲ့ လေကြောင်းကနေ ဗုံးကြဲတိုက်ခိုက်သွားတဲ့ အဆိုပါကျေးရွာမှာ တိုက်ပွဲဖြစ်နေတာ မရှိသလို တော်လှန်ရေးတပ်စခန်းတွေလည်း မရှိဘဲ အကြောင်းမဲ့ ဗုံးကြဲတိုက်ခိုက်သွားတာ ဖြစ်တယ်လို့ ဆိုပါတယ်။

ထီးလင်းမြို့နယ် ပြည်သူ့အုပ်ချုပ်ရေးအဖွဲ့ ပြန်ကြားရေးတာဝန်ခံက “အဲဒီရွာနာမည်က မြောင်းကြီးရွာတဲ့။ ​စစ်ရေးနယ်မြေတွေနဲ့ နီးကပ်တဲ့ရွာလို့ ပြောလို့ရပေမဲ့ အဲဒီရွာမှာတော့ တိုက်ပွဲဖြစ်တာမရှိဘဲ စစ်တပ်က ရည်ရွယ်ချက်ရှိရှိ လေယာဥ်နဲ့ ဗုံးကြဲသွားတာပါ။ ဗုံးက ရွာတောင်ပိုင်းမှာ ဘုရားပွဲဆိုလား၊ အလှူပွဲဆိုလား လုပ်နေတဲ့ အဲဒီအိမ်ပေါ်ကို ကျတာ။ ဗုံးကျတဲ့အိမ် အပါအဝင် အိမ် ၂ လုံး မီးလောင်တယ်။ ဘေးအိမ် ၃ လုံး ပျက်စီးတယ်။ အသက် ၂၅ နှစ်လောက်ရှိသေးတဲ့ လူငယ်တယောက်ကတော့ ခေါင်းပြတ်ပြီး နေရာမှာတင် ပွဲချင်းပြီး ဆုံးသွားပြီး နောက်ထပ် အသက် ၂၀ ကျော် အမျိုးသမီးတယောက်ကတော့ ဒဏ်ရာပြင်းထန်လို့ ဆေးကုနေရင်း ဆုံးသွားတာပါ” လို့ DVB ကို ပြောပါတယ်။

မြောင်းကြီးကျေးရွာကို စစ်ကောင်စီတပ်ရဲ့ လေကြောင်းတိုက်ခိုက်မှုအတွင်း ဒဏ်ရာရရှိသူ ၅ ယောက်ထက်မနည်း ရှိခဲ့တာကြောင့် ဆေးကုသမှု ခံယူနေကြကာ အသက်အန္တရာယ် စိုးရိမ်ရသူတွေ မပါဝင်ဘူးလို့လည်း သူက ဆက်ပြောပါတယ်။

ယောဒေသမှာရှိကြတဲ့ ပြည်သူတွေအနေနဲ့ စစ်ကောင်စီတပ်ရဲ့ လေကြောင်းရန် အန္တရာယ်တွေကြောင့် လူစုလူဝေးတွေ မပြုလုပ်ကြဖို့နဲ့ တော်လှန်ရေးတပ်ဖွဲ့တွေဘက်က အချိန်နဲ့တပြေးညီ ထုတ်ပြန်ပေးနေတဲ့ လေကြောင်းရန်သတိပေးချက်တွေကို အတိအကျ လိုက်နာကြဖို့လည်း တော်လှန်ရေးတပ်ဖွဲ့တွေဘက်က တိုက်တွန်းထားပါတယ်။