စစ်ကောင်စီက ပဲခူးတိုင်း၊ ပန်းတောင်းမြို့နယ်၊ ညောင်ကျိုးစခန်းခံစစ်အတွက် စစ်ကူပို့ထားတဲ့ တပ်မ ၇၇ လက်အောက်ခံ ခြေမြန်တပ်ရင်း ၂ ရင်းက တပ်သားတွေ ထွက်ပြေးသွားလို့ လက်ရုံးတပ်တွေနဲ့ထပ်ပြီး အင်အားဖြည့်ထားရတယ်လို့ စစ်ကောင်စီအုပ်ချုပ်ရေးနဲ့နီးစပ်တဲ့ သတင်းရင်းမြစ်တွေဆီက သိရပါတယ်။
ညောင်ကျိုးစခန်းသိမ်းတိုက်ပွဲဖြစ်နေချိန်မှာ တပ်မ ၇၇ လက်အောက်ခံ ခမရ ၇၀၁ နဲ့ ခမရ ၃၁၃ က တပ်သားတချို့ မတ် ၁၂ ရက်ညပိုင်းက ထွက်ပြေးသွားတာလို့ သတင်းရင်းမြစ်က DVB ကို ပြောပါတယ်။
“ညောင်ကျိုးစခန်းကို AA က ရ၊ မရတော့ မသိဘူး။ တပ်ဘက်က စစ်ကူပို့ထားတဲ့ တပ်မ ၇၇ က ထွက်ပြေးတာ ၁၀ ယောက်ကျော်ပြီ။ ဥသျှစ်ပင်နဲ့ ပန်းတောင်းကို လက်ရုံးတပ်တွေနဲ့ အင်အားဖြည့်နေတယ်” လို့ ရှင်းပြပါတယ်။
စစ်ခေါင်းဆောင်က မတ် ၂ ကနေ မတ် ၈ ရက်အထိ ညောင်ကျိုးစခန်းအတွက် ခမရ ၃၁၃၊ ခမရ ၇၀၁ နဲ့ ခမရ ၁၀၅ နဲ့ ခမရ ၁၀၆ တို့ကို စစ်ကူပို့ခဲ့တာ ဖြစ်ပါတယ်။
ညောင်ကျိုးစခန်းသိမ်းတာနဲ့ပတ်သက်ပြီး အာရက္ခတပ်တော် AA ဘက်ကရော စစ်တပ်ဘက်ကပါ တရားဝင်ထုတ်ပြန်ကြေညာတာ မရှိသေးပါဘူး။
ပြီးခဲ့တဲ့နှစ်ကစပြီး တောင်ကုတ်-ပန်းတောင်း ရိုးလမ်းပေါ်က စစ်စခန်းတွေကို ထိုးစစ်ဆင်ခဲ့တဲ့ အာရက္ခတပ်တော် AA အနေနဲ့ လက်ရှိမှာ တောင်ပုံကြီးစခန်း၊ ပုဂံကွဲစခန်း၊ မိုးထိတောင်စခန်းနဲ့ နတ်တောင်ကုန်းစခန်းတို့ကို သိမ်းပိုက် ရရှိထားပါတယ်။
ပန်းတောင်းတပ်နယ်ထဲမှာ စစ်လက်နက်ပစ္စည်းထုတ်လုပ်တဲ့ စက်ရုံတွေဖြစ်တဲ့ ကပစ ၃ ဆင်တဲ၊ ကပစ ၅ ထုံးဘို၊ ကပစ ၆ ဆင်ခြေထောက်၊ ကပစ ၉ ကျောက်ဖူး၊ ကထက ပြင်ကြီး (ကာကွယ်ရေးပစ္စည်းထုတ်လုပ်မှုတပ်ဖွဲ့ သင်တန်း) တို့ ရှိပါတယ်။
