ဧရာဝတီတိုင်း၊ သာပေါင်းမြို့နယ်၊ မရမ်းချိုကျေးရွာရှိ သံပတ်ဘုန်းကြီးကျောင်းမှာ လာရောက်တပ်စွဲထားတဲ့ စစ်ကောင်စီတပ်က စစ်သား ၅ ယောက် မတ် ၁၁ ရက်က ထွက်ပြေးသွားတယ်လို့ ဒေသခံတွေထံက သိရပါတယ်။

မရမ်းချိုကျေးရွာမှာ စစ်ကောင်စီတပ်က အင်အား ၁၀၀ ကျော်နဲ့ လာရောက်တပ်စွဲထားပြီး စစ်သား ၅ ယောက် ထွက်ပြေးခဲ့ပြီးနောက် အနီးအနားကျေးရွာတွေကို စစ်ကြောင်းထိုးနေ ပါတယ်။

သာပေါင်းဒေသခံတယောက်က “မရမ်းချိုရွာက သံပတ်ကျောင်းမှာ လာတပ်စွဲထားတဲ့ စစ်တပ်က စစ်သား ၅ ယောက် ထွက်ပြေးသွားတာပါ။ လိုက်ရှာတာမလုပ်ဘူး၊ အနီးအနားရွာတွေက တောထဲ ဝါးခုတ်သွားမယ့် ဆိုင်ကယ်တွေ ဖမ်းတာ၊ ငွေတောင်းတာ လုပ်တယ်။ ရွာတွေထဲ ဆိုင်တွေ ဝင်စစ်သလို ငွေတောင်းတာလုပ်တယ်” လို့ ပြောပါတယ်။

သာပေါင်းမြို့နယ်ရှိ မရမ်းချို၊ ဘုရားကုန်း၊ ဘိုးတော်ကျေးရွာတွေက အနောက်ရိုးတက်မယ့် ဆိုင်ကယ်တွေကို စစ်ဆေး ငွေတောင်းပြီး စစ်တပ် တပ်လာစွဲရင်လည်း ကျေးရွာတွေက ချက်ကျွေးရကြောင်း ဒေသခံတွေက ဆိုပါတယ်။

သာပေါင်းမြို့နယ်ရှိ ကျေးရွာတွေမှာ ဇန်နဝါရီလက စတင်ပြီး စစ်ကောင်စီတပ်သားတချို့ ထွက်ပြေးတာတွေရှိပြီး တချို့ကိုတော့ ရပ်ကျေးအုပ်ချုပ်ရေးအဖွဲ့က ဖမ်းဆီးကာ သာပေါင်းမြို့မရဲစခန်းကို ပြန်ပို့လိုက်ပါတယ်။

အာရက္ခတပ်တော်၊ ပူးပေါင်းတပ်ဖွဲ့တွေနဲ့ စစ်ကောင်စီတပ်တို့ သာပေါင်းမြို့နယ်အတွင်း ဇန်နဝါရီလကစပြီး တိုက်ပွဲတွေ ဖြစ်ပွားခဲ့ပါတယ်။ တိုက်ပွဲတွေ ဖြစ်ပွားပြီးနောက် စစ်ကောင်စီတပ်သားတချို့ ထွက်ပြေးတာရှိကြောင်း ဒေသခံတွေထံက သိရပါတယ်။