တရုတ်နိုင်ငံခြားရေးဝန်ကြီးဌာနရဲ့ အာရှရေးရာအထူးကိုယ်စားလှယ် မစ္စတာတိန့်ရှီကျွင်းဟာ နေပြည်တော်ကို ရောက်ရှိနေတာဖြစ်ပြီး မတ်လ ၁၁ ရက်က  စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ တွေ့ဆုံခဲ့ပါတယ်။

စစ်ခေါင်းဆောင်ရဲ့ ရုရှား ခရီးစဉ်အပြီး ချက်ချင်းဆိုသလိုပဲ မြန်မာနိုင်ငံကို တရုတ်ကိုယ်စားလှယ် ရောက်လာတာ ဖြစ်ပါတယ်။

စစ်ကောင်စီရဲ့ မီဒီယာမှာတော့ နှစ်ဖက်တွေ့ဆုံမှုအတွင်း ရွေးကောက်ပွဲကိစ္စ၊ ငြိမ်းချမ်းရေးကိစ္စ၊ ကျားဖြန့်နဲ့ အွန်လိုင်းလောင်းကစားကိစ္စ၊ မူးယစ်ဆေးဝါးတိုက်ဖျက်ရေးကိစ္စ၊ နယ်စပ်ကုန်သွယ်ရေးကိစ္စတွေကို ဆွေးနွေးခဲ့ကြတယ်လို့ ထုတ်ပြန်ထားပါတယ်။

တရုတ်အနေနဲ့ မြန်မာနိုင်ငံ တည်ငြိမ်ဖို့အတွက် အားထုတ်နေတာဖြစ်ပြီး အထူးသဖြင့် တရုတ်နယ်စပ်မှာရှိနေတဲ့ လက်နက်ကိုင်တော်လှန်ရေးအင်အားစုတွေနဲ့ စစ်ကောင်စီနဲ့အကြား တွေ့ဆုံမှုတွေ ပိုပြီးဖြစ်လာအောင် လာပြီးတွန်းအားပေးတဲ့သဘောလို့ လေ့လာသူတချို့က သုံးသပ်ကြပါတယ်။

ဒါ့အပြင် တရုတ် အကျိုးစီးပွားတွေရှိရာ ရခိုင်ပြည်နယ် ကျောက်ဖြူမှာလည်း တိုက်ပွဲတွေ ရှိလာတာကြောင့် အာရက္ခတပ်တော်နဲ့ စစ်ကောင်စီတို့ အကြား တွေ့ဆုံဆွေးနွေးပွဲတွေဖြစ်လာအောင် တွန်းအားပေးနိုင်တယ်လို့လည်း တရုတ်အရေးကျွမ်းကျင်သူ ဒေါက်တာလှကျော်ဇောကလည်း ပြောပါတယ်။

တရုတ်ရဲ့ခရီးစဉ်အပြီးမှာ တွေ့ဆုံဆွေးနွေးပွဲတွေ ပိုဖြစ်လာနိုင်စရာရှိပေမဲ့ တိုင်းရင်းသားတော်လှန်ရေးအင်အားစုတွေရဲ့ လိုလားချက်နဲ့ စစ်ကောင်စီရဲ့ လိုလားချက်ဟာ ထပ်တူမကျတာကြောင့် ပြေလည်နိုင်ဖို့တော့ မရှိဘူးလို့ သုံးသပ်ပါတယ်။

ရွေးကောက်ပွဲဖြစ်မြောက်ရေးကိစ္စမှာလည်း တရုတ်ရဲ့ မူဝါဒက ပါဝင်သင့် ပါဝင်ထိုက်သူတွေ အားလုံးပါဝင်ဖို့ ပြောဆိုထားပေမဲ့ စစ်ကောင်စီကတော့ သူတို့ အသက်ရှူချောင်ရေးအတွက် အဖြစ်သဘောသာ ဆောင်ရွက်ဖို့ရှိနေတာကြောင့် ဒီအပေါ်မှာလည်း ဆက်ပြီး ဆွေးနွေးစရာတွေရှိနေဦးမယ်လို့ ဆိုပါတယ်။

နောက်ထပ်အရေးကြီးတာကတော့ စစ်ခေါင်းဆောင်ရဲ့ ရုရှားခရီးစဉ် ကိစ္စပါ။ စစ်ကောင်စီက ရုရှားသမ္မတနဲ့ တွေ့ဆုံခဲ့ပြီး ထားဝယ်ရေနက်ဆိပ်ကမ်းစီမံကိန်း ပြန်စဖို့ကိစ္စနဲ့ နျူးကလီးယား ဓာတ်ပေါင်းဖိုကိစ္စတွေ ဆွေးနွေးခဲ့တာကြောင့် ဒီအပေါ်မှာ တရုတ်က ကျေနပ်မှာမဟုတ်ဘူးလို့ နိုင်ငံရေးလေ့လာသုံးသပ်သူ ဦးသန်းစိုးနိုင်က ပြောပါတယ်။

စစ်ခေါင်းဆောင်အနေနဲ့ နျူးကလီးယားဓာတ်ပေါင်းဖိုကိစ္စမှာ လျှပ်စစ်အတွက်လို့ ပြောပေမဲ့လည်း ဒီထက်ပိုတဲ့ ရည်ရွယ်ချက်ရှိနေသလို၊ ထားဝယ်ရေနက်ဆိပ်ကမ်းကို ရုရှား လွှမ်းမိုးသွားရင် အကျိုးစီးပွားအရရော၊ အင်ဒို-ပစိဖိတ်ဒေသ လုံခြုံရေးအရပါ ခြိမ်းခြောက်မှုတွေရှိလာနိုင်တာကြောင့် ဒီကိစ္စတွေအပေါ် လာရောက်စုံစမ်းမေးမြန်းတဲ့သဘောလို့လည်း ဆိုပါတယ်။

တရုတ်အထူးကိုယ်စားလှယ်ဟာ မတ် ၁၀ ရက်တုန်းကလည်း စစ်ကောင်စီ နိုင်ငံခြားရေးဝန်ကြီး ဦးသန်းဆွေနဲ့လည်း တွေ့ဆုံဆွေးနွေးခဲ့ကြပါတယ်။ 

ထက်အောင်