မြန်မာ-တရုတ်နယ်စပ်တလျှောက် ငြိမ်းချမ်းရေးနဲ့ တည်ငြိမ်ရေးအတွက် တရုတ်နိုင်ငံရဲ့ အထူးကိုယ်စားလှယ် မစ္စတာတိန့်ရှီကျွင်းနဲ့ စစ်ကောင်စီနိုင်ငံခြားရေးဝန်ကြီးတို့ တွေ့ဆုံဆွေးနွေး ခဲ့တယ်လို့ စစ်ကောင်စီ နိုင်ငံခြားရေးဌာနက သတင်းထုတ်ပြန်ပါတယ်။

စစ်ကောင်စီခန့် ဒုတိယဝန်ကြီးချုပ်နဲ့ နိုင်ငံခြားရေးဝန်ကြီး ဦးသန်းဆွေနဲ့ တရုတ် နိုင်ငံခြားရေးဝန်ကြီးဌာန၊ အာရှရေးရာအထူး ကိုယ်စားလှယ် မစ္စတာ တိန့်ရှီကျွင်းတို့ မတ် ၁၀ ရက် မနက်က  နေပြည်တော်ရှိ နိုင်ငံခြားရေးဝန်ကြီးဌာနမှာတွေ့ဆုံခဲ့တာဖြစ်ပါတယ်။

အဲဒီတွေ့ဆုံမှုမှာ နှစ်နိုင်ငံ နယ်စပ်ဒေသတလျှောက် ငြိမ်းချမ်းရေးနဲ့ တည်ငြိမ်ရေးကို ပိုမိုမြှင့်တင်ဖို့အတွက် ဆက်လက် ပူးပေါင်းဆောင်ရွက်သွားရေး၊ ပြည်တွင်းငြိမ်းချမ်းရေးနဲ့ အမျိုးသားပြန်လည် သင့်မြတ်ရေးလုပ်ငန်းစဉ် နောက်ဆုံးဖြစ်ပေါ်တိုးတက်မှုအခြေအနေတွေ၊ မြန်မာပြည်တွင်း ရေရှည်တည်တံ့ခိုင်မာတဲ့ ငြိမ်းချမ်းရေးနဲ့ ပြည်သူတွေရဲ့ လူမှု-စီးပွား ဖွံ့ဖြိုးတိုးတက်ရေး ကြိုးပမ်းအားထုတ်မှုတွေမှာ တရုတ်နိုင်ငံက အပြုသဘော ဆက်လက်ကူညီ ဆောင်ရွက်ပေးသွားမယ့် ကိစ္စရပ်တွေ ဆွေးနွေးခဲ့တယ်လို့ ဆိုပါတယ်။

ဒါ့အပြင် နယ်စပ်ဒေသမှာ တိုးမြင့်လာနေတဲ့ အွန်လိုင်းလောင်းကစားနဲ့ လိမ်လည်မှုကွန်ရက်တွေ ပူးပေါင်းတိုက်ဖျက်ရေးအတွက် နှစ်နိုင်ငံရှိ သက်ဆိုင်ရာအဖွဲ့အစည်းတွေအကြား ပူးပေါင်း ဆောင်ရွက်မှုမြှင့်တင်ဖို့၊ ဒေသတွင်းနဲ့ နိုင်ငံတကာမျက်နှာစာမှာ နှစ်နိုင်ငံ အပြန်အလှန် ထောက်ခံရပ်တည်သွားရေးနဲ့ နှစ်နိုင်ငံ အကျိုးတူကိစ္စရပ်တွေအပေါ် ဆွေးနွေးခဲ့တယ်လို့ ထုတ်ပြန်ချက်မှာ ဖော်ပြပါတယ်။

တရုတ်အထူးကိုယ်စားလှယ် မစ္စတာတိန့်ရှီကျွင်းဟာ စစ်ကောင်စီနဲ့ တိုင်းရင်းသား လက်နက်ကိုင်အဖွဲ့တွေအကြား တွေ့ဆုံဆွေးနွေးဖို့  ညှိနှိုင်းပေးနေသူလည်း ဖြစ်ပါတယ်။

လာမယ့်ဧပြီလမှာလည်း တရုတ်နိုင်ငံ ကူးမင်းမြို့နယ်မှာ ပြုလုပ်မယ့် စစ်ကောင်စီနဲ့ ပလောင်ပြည်နယ်လွတ်မြောက်ရေးတပ်ဦး (PSLF/TNLA) တို့ ဒုတိယအကြိမ် တွေ့ဆုံဆွေးနွေးဖို့လည်း  ဦးဆောင် ညှိနှိုင်းနေသူလည်း ဖြစ်ပါတယ်။