အဓမ္မစစ်မှုထမ်းနေရသူ ၂ ယောက် လက်နက်ခဲယမ်းတွေနဲ့အတူ အလင်းဝင်လာတယ်လို့ နေပြည်တော်တိုင်းစစ်ဌာနတပ်ရင်း ၉၀၁ က မတ် ၇ ရက်နေ့မှာ သတင်းထုတ်ပြန်ပါတယ်။

၉၀၁ တပ်ရင်းရဲ့ ပြန်ကြားရေးတာဝန်ခံက “အခုအလင်းဝင်လာတဲ့သူတွေက တပ်မ ၆၆ လက်အောက်ခံ ပဲခူးတိုင်း၊ မင်းလှမြို့နယ်၊ စိန်ကန့်လန့်ရွာအခြေစိုက်အမှတ် ၁  ခြေလျင်တပ်ရင်း (ခလရ ၁) ကနေ ထွက်ပြေးလာပြီးတော့ ကျနော်တို့ တပ်ရင်းကို အလင်းဝင်လာကြသူတွေဖြစ်တယ်” လို့ ပြောပါတယ်။

သူတို့ဟာ မတ် ၂ ရက်နေ့က အလင်းဝင်လာခဲ့တာဖြစ်ပြီး MA-3 မောင်းပြန်သေနတ် ၁ လက်၊ ကျည်ဘောက် ၁ ခု၊ လက်ပစ်ဗုံး ၁ လုံး၊ ၅ ဒသမ ၅၆(ဘားမား)ကျည် ၂၄ တောင့်ကို ယူဆောင်လာတယ်လို့ ဆိုပါတယ်။

၉၀၁ တပ်ရင်းရဲ့ တပ်ရေးအရာကို ဗိုလ်စနဲ က “သူတို့က စစ်မှုထမ်းအပတ်စဉ် ၂ သင်တန်းတက်ခဲ့ရတဲ့သူတွေပါ။ သူတို့က အခု ကျနော်တို့တပ်ရင်းထဲမှာပါ။ ကောင်းကောင်းမွန်မွန် စောင့်ရှောက်ထားပါတယ်။ ချီးမြှင့်ငွေပေးအပ်ဖို့ကိုလည်း ဆက်လက်ဆောင်ရွက်နေပါတယ်” လို့ DVB ကို ပြောပါတယ်။

စစ်ကောင်စီတပ်ရဲ့လက်အောက်မှာ ကျန်ရှိနေကြသေးတဲ့ စစ်ကောင်စီတပ်ဖွဲ့ဝင်တွေ၊ ပြည်သူ့စစ်တွေနဲ့ ပျူစောထီးတွေကိုလည်း အသက်အသေမခံဘဲ အမြန်ဆုံးအလင်းဝင်ကြဖို့ ဖိတ်ခေါ်ထားတယ်လို့ နေပြည်တော်တိုင်းစစ်ဌာနတပ်ရင်း ၉၀၁ ဆီကနေ သိရပါတယ်။