တနှစ်တာအတွင်း အမေရိကန်နိုင်ငံက ကြက်ဥစျေးနှုန်းဟာ ၂ ဆနီးပါး တက်လာတဲ့အလျာက် “ဥစားကြက် ငှားရမ်းတဲ့” ဖြေရှင်းနည်းကို အစားထိုး အသုံးပြုနေကြပြီ ဖြစ်ပါတယ်။

“Rent The Chicken” အမည်ရ စွန့်ဦးတီထွင်လုပ်ငန်းကို နယူးဟမ့်ရှား (New Hampshire) ပြည်နယ်မှာ ခရစ္စတင်းနဲ့ ဘရိုင်ယန် ဆိုတဲ့ တမ်ပဲလ်တန် (Templeton) စုံတွဲက စတင်ခဲ့တာပါ။

အခုလိုမျိုး “ဥစားကြက်ငှားရမ်းတဲ့” လုပ်ငန်းစဉ်ဟာ ရိုးရှင်းပြီး ကြက်မ ၂ ကောင်ကနေ ၄ ကောင်အတွက် လိုအပ်တဲ့အစာအားလုံး အပါအဝင် မွေးမြူရေးပစ္စည်းတွေ၊ နည်းလမ်းတွေနဲ့အတူ ဖုန်းဝန်ဆောင်မှုအထိ ပါဝင်မှာဖြစ်ပါတယ်။

၆ လစာ ငှားရမ်းခအတွက် အမေရိကန်ဒေါ်လာ ၆၀၀ ကျသင့်မှာဖြစ်သလို ကြက်မ ၂ ကောင်ကနေလည်း တပတ်ကို ကြက်ဥတဒါဇင်အထိ လတ်လတ်ဆတ်ဆတ် ရရှိနိုင်တယ်လို့ ဆိုပါတယ်။

ဂေါ့ဖ်တောင်း (Goffstown) မြို့ခံတွေဖြစ်ကြတဲ့ တမ်ပဲလ်တန် စုံတွဲကတော့ ကြက်မွေးမြူရေးကို လွယ်ကူစေရမယ်ဆိုပြီး အာမခံထားပါတယ်။

အဲဒီနောက် ဘရိုင်ယန် တမ်ပဲလ်တန်က “ဖောက်သည်အများစုဟာ ကြက်တွေအပေါ်​ သံယောဇဉ်ဖြစ်ပြီး သူတို့မွေးခဲ့တဲ့အကောင်ကိုပဲ ထပ်လိုချင်ကြတယ်။ ဒါကြောင့် ကြက်တွေရဲ့ ခြေချင်းဝတ်မှာ အရောင်တံဆိပ်လေးတွေနဲ့ မှတ်သားပေးထားတယ်” ဆိုပြီး ပြောပြပါတယ်။

အမေရိကန် စိုက်ပျိုးမွေးမြူရေး ဝန်ကြီးဌာန (USDA) ကတော့ ကြက်ဥဈေးနှုန်းကို ၁၅ ရာခိုင်နှုန်း အထိ ပြီးခဲ့တဲ့တလတည်းမှာ မြင့်တက်ခဲ့တဲ့အကြောင်း အတည်ပြုပါတယ်။

လက်ရှိဖြစ်ပွားနေတဲ့ ကြက်ငှက်တုပ်ကွေး ကူးစက်ပျံ့နှံ့မှုကို ဖြေရှင်းနိုင်ဖို့အတွက်လည်း ဒေါ်လာ ၁ ဘီလီယံအထိ သုံးစွဲသွားမယ်လို့ USDA အစိုးရအေဂျင်စီက အတည်ပြုပါတယ်။

Source : Reuters