မန္တလေး - မြစ်ကြီးနားလမ်းပိုင်းမှာ လက်နက်ကိုင်အဖွဲ့စုံ ဂိတ်တွေများပြားပြီး ငွေကြေးကောက်ခံတာကြောင့် အခက်အခဲတွေနဲ့ ရင်ဆိုင်နေရတယ်လို့ ယာဉ်မောင်းတွေက ပြောပါတယ်။ 

မန္တလေး - မြစ်ကြီးနားလမ်းပိုင်းမှာ ဂျူတီဆောင်ပြီး တက်လာတဲ့ ကုန်တင်ယာဉ်တွေဟာ စစ်ကိုင်း တံတားထိပ်ကစတင်ပြီး စစ်ကောင်စီတပ်နဲ့ ရဲ၊ ယာဉ်ထိန်းရဲတွေကို ငွေပေးဆောင်ခဲ့ပြီး မုံရွာလမ်းခွကနေ ရွှေဘိုအထွက် ကိုးပင်ဂိတ်အထိ ပျူစောထီးဂိတ်တွေကို ထပ်မံပေးဆောင်ရပါတယ်။ 

ဒါ့အပြင် ရွှေဘို-မြစ်ကြီးနားအထိ ပျူစောထီး၊ စစ်ကောင်စီတပ်ဂိတ်၊ ရဲဂိတ်တွေက ငွေကြေးကောက်ခံတာကြောင့် ၆ ဘီးကုန်တင်ယာဉ်တစီးကို ကျပ်သိန်း ၆၀ ကနေ ၈၀ အထိ ကုန်ကျတယ်လို့ ယာဉ်မောင်းတယောက်က ပြောပါတယ်။

“လမ်းကြေးတွေက ပျမ်းမျှ ဆိုတာကကွာ စစ်ကိုင်းတံတားရယ်၊ ကံဘလူ ဂိတ်ရယ် ဆိုလို့ရှိရင် သိန်း ၃၀ လောက် ရှိတယ်။ ၂ ဂိတ်ထဲကို ရှင်းဖို့ သိန်း ၃၀ တောင်းတယ်။ မြစ်ကြီးနားထိ ဆိုလို့ရှိရင်တော့ အသွား တကြောင်းတည်းကို သိန်း ၆၀၊ သိန်း ၈၀ အဲကြားမှာ ကုန်တာ။”

မန္တလေး - မြစ်ကြီးနားလမ်းပိုင်းမှာ ပြည်သူ့ကာကွယ်ရေးတပ်ဖွဲ့ (PDF) တွေကပါ ကုန်စည်ခွန် ဘိလပ်မြေ တအိတ်ကို ကျပ် ၅၀၀ ပေးဆောင်ရတဲ့အပြင် ကချင်လွတ်လပ်ရေးတပ်မတော် (KIA) တပ်ဂိတ်တွေမှာလည်း ထပ်မံပြီး မြစ်ကြီးနားထိ ကုန်စည်ခွန်အပါအဝင် လမ်းကြေး ၃ နေရာ ပေးဆောင်ရတယ်လို့ ယာဉ်မောင်းတွေက ပြောပါတယ်။ 

မန္တလေး - မြစ်ကြီးနားလမ်းပိုင်းမှာ စစ်တပ်နဲ့ ပျူစောထီးအဖွဲ့တွေက ငွေကြေးကောက်ခံရာမှာ သေနတ်တွေ မောင်းတင်ပြီး ခြိမ်းခြောက်တာတွေရှိတယ်လို့ ကုန်သည်တယောက်က ပြောပါတယ်။

“တကယ် ဓားပြတိုက်သလိုပဲ၊ အဆိုးဆုံးက ပျူစောထီးပဲ။ အဆုံးဆုံးက စစ်ကိုင်းနဲ့ ရွှေဘို ကြားပေါ့နော်။ ပျူစောထီး အဆိုးဆုံးပဲ။ ကားသမားကို ခြိမ်းခြောက်သလို စာရင်းသွားစစ်လို့ မရဘူး။ သေနတ်တွေ ဘာတွေ မောင်းတင်ပြီးတော့ ခြိမ်းခြောက်တယ်။”

မန္တလေး - မြစ်ကြီးနားလမ်းပိုင်းမှာ တိုက်ပွဲတွေကြောင့် မကြာခဏ ပိတ်ဆို့တာတွေကြောင့် ကုန်တင်ယာဉ်တွေဟာ အခက်အခဲအမျိုးမျိုးနဲ့ ရင်ဆိုင်ခဲ့ရပါတယ်။ ဂျူတီဆောင်ပြီး တက်လာတဲ့ ကုန်တင်ယာဉ်တွေဆီကနေ လက်နက်ကိုင်အဖွဲ့စုံဂိတ်တွေက ငွေကြေးအဆမတန်ကောက်ခံတာ တွေကြောင့် ကုန်စည်တင်ဆောင်ခတွေအပြင် ကုန်ပစ္စည်းအမျိုးမျိုး ဈေးနှုန်းတွေမြင့်တက်လာ တယ်လို့ ကုန်သည်တွေက ပြောပါတယ်။

အောင်ခန့်