ကျောက်တံခါးမြို့နယ်ရှိ ရထားသံလမ်း တံတားအမှတ် ၁၄၅၊ ၁၄၆၊ ၁၄၇၊ ၁၄၈၊ ၁၄၉ ရှိ စစ်ကောင်စီသံလမ်းကင်းတဲ စခန်းတွေကို ဖေဖော်ဝါရီ ၂၅ ရက် ည ၁၀ နာရီလောက်မှာ KNLA ပူးပေါင်းတပ်ဖွဲ့တွေက တပြိုင်တည်း ဝင်ရောက်တိုက်ခိုက်ခဲ့တယ်လို့ ပဲခူးခရိုင် အမှတ် ၂ တပ်ရင်း -P2-3702 က ထုတ်ပြန်ပါတယ်။
ဂိတ်ကင်းတဲစခန်းအားလုံးကို မီးရှို့ဖျက်ဆီးရှင်းလင်းခဲ့ပြီး တိုက်ပွဲအတွင်း P2 -3702 တပ်ရင်းမှ ရဲဘော်တဦး တိုင်းပြည်အတွက် မြင့်မြတ်စွာ အသက်ပေးလှူခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
အဲနေ့ည ၁၀း၁၅ မိနစ်လောက်ကလည်း ပိန်းဇလုပ်အခြေစိုက် ခလရ ၂၆၄ တပ်ရင်းအား KNLA တပ်ရင်း ၉ နဲ့ မဟာမိတ်ပူးပေါင်းအဖွဲ့တွေက ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့တယ်လို့ ဆိုပါတယ်။
ပြီးခဲ့တဲ့ ဖေဖော်ဝါရီ ၁၆ ရက် မနက်အစောပိုင်းကလည်း ပဲခူးတိုင်း ၊ ကျောက်တံခါးမြို့နယ် ၊ ပဲနွယ်ကုန်း - ကွင်းချောင်းဝ လမ်းပေါ်ရှိ အကြမ်းဖက် စစ်ကောင်စီရဲ့ အင်အား ၃၀ ခန့် ကာကင်းစခန်းကို ပဲခူးခရိုင် အမှတ် ၂ တပ်ရင်း P2-3702၊ ရိုးမ ၂ အထူးကွန်မန်ဒိုတပ်ရင်း P2-9914 နဲ့ Spring Warriors Column P2-7001 တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ခဲ့တယ်လို့ ထုတ်ပြန်ထားပါတယ်။
အဆိုပါတိုက်ပွဲမှာ ကျောက်တံခါးမြို့နယ်၊ ရွှေဝါရွာ အခြေစိုက် ခလရ ၃၀၇ တပ်ရင်းမှ လက်နက်ကြီး ပစ်ကူပေးခဲ့ပေမဲ့ စစ်ကောင်စီတပ်သားတွေ ဆုတ်ခွာထွက်ပြေးခဲ့ကြပြီး တိုက်ပွဲအတွင်းမှ ရန်သူ့အလောင်း ၅ လောင်း၊ ဘီအေ ၆၃ မောင်းပြန်ရိုင်ဖယ် ၂ လက်၊ MA 1 တလက်၊ ကျည်ကာဦးထုပ် ၃ လုံးနဲ့ ကျည် ၁၀၀ တို့ကို သိမ်းဆည်းရရှိခဲ့ပါတယ်။
