ကွန်ဂိုဒီမိုကရက်တစ်သမ္မတနိုင်ငံ (DRC ) အရှေ့ပိုင်းမှ တိုက်ပွဲတွေကနေ လွတ်မြောက်ဖို့ သီတင်း ၂ ပတ်အတွင်း လူပေါင်း ၄၀၀၀၀ ကျော် ထွက်ပြေးလာတာကြောင့် အရှေ့အာဖရိကမှ အိမ်နီးချင်းနိုင်ငံ ဖြစ်တဲ့ ဘူရွန်ဒီနိုင်ငံဟာ လူသားချင်းစာနာထောက်ထားမှု အခြေအနေ မြန်မြန်ဆန်ဆန် ဆိုးရွားလာမှုနဲ့ ရင်ဆိုင်နေရကြောင်း ကုလသမဂ္ဂက ဖေဖော်ဝါရီ ၂၁ ရက်မှာ ပြောကြားခဲ့ပါတယ်။ 

ကွန်ဂိုနိုင်ငံမှ လူပေါင်း ၉၀၀၀ ကျော်ဟာ ဘူရွန်ဒီကို နယ်စပ်ဖြတ်ကျော်ဝင်ရောက်လာခဲ့ကြတယ် လို့ ဘူရွန်ဒီရှိ UNHCR ကိုယ်စားလှယ် ဘရစ်ဂျစ်ဒ် မူကန်ဂါအီနိုက အခုသီတင်းပတ်အစောပိုင်းမှာ ဂျီနီဗာမှာ သတင်းထောက်တွေကို ပြောပါတယ်။   

ဘူရွန်ဒီနိုင်ငံအနောက်မြောက်ပိုင်းရှိ ဒေသအများအပြားမှာ လူတွေနဲ့ ပြည့်နှက်နေပြီး သူတို့ထဲက တချို့ဟာ အကြိမ်ကြိမ် အိုးမဲ့အိမ်မဲ့ဖြစ်ခဲ့ရပြီး တချို့တွေလည်း ထိခိုက်ဒဏ်ရာတွေနဲ့ ရောက်ရှိ လာပြီးတော့ တချို့လည်း ဝက်သက်လို ကျန်းမာရေးပြဿနာတွေနဲ့ ရောက်ရှိလာခဲ့ကြကြောင်း UN က ဆိုပါတယ်။

လူပေါင်း ၃၆၀၀၀  လောက်ဟာ ဘူရွန်ဒီကို ထွက်ပြေးခဲ့ပြီး တချို့က ၂ နိုင်ငံကို ပိုင်းခြားထားတဲ့ ရုဆီဇီ မြစ်ကိုဖြတ်ပြီး လက်လုပ်လှေတွေနဲ့ ကူးဖြတ်ကြကြောင်း မူကန်ဂါအီနို က ပြောဆိုပါတယ်။ 

လူ ၆၀၀၀ လောက်ကတော့ ဖေဖော်ဝါရီ ၁၄ ရက် ကတည်းက ဘူဂျွန်ဘူရာ တရားဝင်နယ်စပ်ဂိတ် မှတစ်ဆင့် ဝင်ရောက်လာခဲ့တယ် လို့လည်း ဆိုပါတယ်။

UNHCR ဟာ လေဟာပြင် အားကစားကွင်းတွေ၊ စာသင်ကျောင်းတွေနဲ့ ဘုရားကျောင်းတွေထဲမှာ ယာယီ နေထိုင်နေရတဲ့ ရွှေ့ပြောင်းဒုက္ခသည်တွေကို လူသားချင်းစာနာထောက်ထားမှုဆိုင်ရာ စောင့်ရှောက်မှု ပေးနိုင်တဲ့ မြေနေရာ တခုကို ရွှေ့ပြောင်းပေးဖို့ စီစဉ်နေပါတယ်။ 

အေဂျင်စီဟာ ဘူရွန်ဒီ၊ တန်ဇန်းနီးယားနဲ့ ဇမ်ဘီယာနိုင်ငံတွေထဲကို ဒုက္ခသည် ၂၅၈၀၀၀  လောက် အစုလိုက်အပြုံလိုက် ဝင်ရောက်လာဖွယ်ရှိတဲ့ ဒုက္ခသည်တွေကို အသက်ကယ် ကူညီပံ့ပိုးပေးနိုင်ဖို့ ဒေါ်လာ ၄၀ ဒသမ ၄ သန်းအတွက် အရေးပေါ် အယူခံဝင် တောင်းဆိုခဲ့ပါတယ်။ 

ဘူရွန်ဒီနိုင်ငံဟာ အစပိုင်းတုန်းက ဘူရွန်ဒီယားသူပုန်တွေကို နှိမ်နင်းဖို့ နှစ်ပေါင်းကြာရှည် ကွန်ဂို အရှေ့ပိုင်းမှာ ကိုယ်ပိုင်စစ်သားတွေ တပ်ချထားခဲ့ပေမဲ့ မကြာသေးခင်ကမှ M23 ကို တိုက်ဖျက်ရာမှာ အကူအညီပေးဖို့လည်း လုပ်ဆောင်ခဲ့ပါတယ်။ 

Source : Reuters