တရုတ်ဒဏ္ဍာရီလာ ကောင်လေးတယောက်က နတ်ဆိုးကြီးတွေကို တိုက်ခိုက်ပြတဲ့  Ne Zha 2 (နီကျား−တူး)  ရုပ်ရှင်ဟာ ကမ္ဘာ့၀င်ငွေအကောင်းဆုံး အန်နီမေးရှင်းဇာတ်ကား ဖြစ်လာခဲ့ပါတယ်။

အဲဒီတရုတ်ရုပ်ရှင်က ယွမ်ငွေ ၁၂ ဒသမ ၃ ဘီလီယံ (ဒေါ်လာအားဖြင့် ၁ ဒသမ ၇ ဘီလီယံအထိ) ရရှိခဲ့သလို အမျိုးသားရေးစိတ်ဓာတ်ကိုလည်း မြှင့်တင်ပေးနိုင်ခဲ့တယ်လို့ ဆိုပါတယ်။

တချိန်တည်းမှာ Captain America : Brave New World ဇာတ်ကားအသစ်ဟာ ရုံတင်နေပြီ ဖြစ်တဲ့အလျောက် နီကျား−တူးရဲ့ ပြိုင်ဘက်အဖြစ် ရှုမြင်ခံထားရပါတယ်။

Captain America ရဲ့  ၄ ကားမြောက် ရုပ်ရှင်ဟာ အမေရိကန်ပြင်ပမှာ ဒေါ်လာ ၉၂ သန်းအထိ ရရှိခဲ့ပေမဲ့လည်း ဟောလိဝုဒ်ရဲ့ အကြီးမားဆုံး ပြည်ပဈေးကွက်ဖြစ်တဲ့ တရုတ်ပြည်မှာတော့ ဒေါ်လာ ၁၀ ဒသမ ၆ သန်းသာ ရရှိခဲ့ပါတယ်။

ဒါကြောင့် အပြန်အလှန်အနေနဲ့ မြောက်အမေရိကတိုက်က ရုပ်ရှင်ရုံကြီးတွေမှာ နီကျား−တူးကို ပြတာနည်းတယ်ဆိုပြီး ဝေဖန်ထားပါတယ်။

တရုတ်ပြည်တွင်းမှာတော့ ရုပ်ရှင်လောကရဲ့ တိုးတက်မှုပြယုဂ်အဖြစ် နီကျား−တူးကို ချီးကျူးနေကြပြီး ဟောလိဝုဒ်က ဇာတ်ကားတွေနဲ့ပါ ရင်ဘောင်တန်းနိုင်ပြီဖြစ်ကြောင်း ဖော်ပြထားပါတယ်။

အဲဒီနောက် “နီကျား−တူး-ရုပ်ရှင် ပြည်ပမှာ အလုပ်ဖြစ်တာ၊ မဖြစ်တာတွေ ဂရုမစိုက်ပါဘူး။ ဒါပေမဲ့ Captain America (4) ဇာတ်ကားတော့ တရုတ်ပြည်မှာ အလုပ်မဖြစ်စေရဘူး” ဆိုတဲ့ ဆောင်ပုဒ်တခုဟာ ဆိုရှယ်မီဒီယာပေါ် ပျံ့နှံ့နေပါတယ်။

ဒါ့အပြင် တရုတ် TikTok အဖြစ် သိထားကြတဲ့ တိုရင်း (Douyin) မှာလည်း “နီကျား−တူး မကြည့်ဖြစ်တာနဲ့ဘဲ မိတ်ဆွေတယောက်က ကျနော့်ကို မျိုးချစ်စိတ် မရှိဘူးလားလို့ ပြောလာတယ်” ဆိုပြီး သုံးစွဲသူတယောက်က ပို့စ်တင်ထားပါတယ်။

အဲဒီဇာတ်ကားရဲ့ ဝင်ငွေ ၉၉ ရာခိုင်နှုန်းကျော်ဟာ တရုတ်ပြည်တွင်းကနေ ရရှိခဲ့တာဖြစ်ပြီး အမျိုးသားရေးဝါဒကို စမ်းသပ်မှုတရပ် ဖြစ်လာခဲ့ပါတယ်။

ဒါက ၂၀၁၉ ခုနှစ်ထွက် နီကျားရုပ်ရှင်ရဲ့ နောက်ဆက်တွဲဖြစ်တဲ့အပြင် Inside Out 2 ကိုပါ ဝင်ငွေအရ ကျော်ဖြတ်နိုင်ခဲ့တာ ဖြစ်ပါတယ်။

Source : Reuters