ဧရာဝတီတိုင်းက ထွက်ရှိတဲ့ ဒေသထွက်ကုန် မျှင်ငါးပိတွေကို ပြည်တွင်းဈေးကွက် တခုတည်းကိုပဲ အားထားရောင်းချနေရတာကြောင့် ဈေးကောင်းမရဖြစ်နေတယ်လို့ မျှင်ငါးပိလုပ်ငန်းရှင်တွေဆီက သိရပါတယ်။

အရင်က မျှင်ငါးပိတွေကို ပြည်ပဈေးကွက်တွေအထိ တင်ပို့ရောင်းချနိုင်ခဲ့ပေမဲ့ အခုအခါ ပြည်ပဈေးကွက် အခက်အခဲတွေနဲ့ သယ်ယူပို့ဆောင်ရေးစရိတ်တွေ မြင့်တက်လာတာကြောင့် ဈေးကောင်းမရ ဖြစ်နေတယ်လို့ ဆိုပါတယ်။

မျှင်ငါးပိလုပ်ငန်းရှင်တယောက်က “မျှင်ငါးပိဈေးကွက်က တော်တော်လေး အခက်အခဲဖြစ်နေတယ်။ အခုက ပြည်တွင်းဈေးကွက်ကိုပဲ အားထားနေရတော့ ဈေးကောင်းမရဘူး။ သယ်ယူပို့ဆောင်ရေးစရိတ်တွေကလည်း များလာတော့ ရတဲ့ဈေးနဲ့ပဲ ရောင်းနေရတယ်” လို့ ပြောပါတယ်။

လက်ရှိ ပြည်တွင်းဈေးကွက်မှာ မျှင်ငါးပိတပိဿာကို ငွေကျပ် ၁၆,၅၀၀ ကနေ ၂၇,၀၀၀ ကျော်အထိသာ ဈေးရှိပြီး အရင်ကတော့ မျှင်ငါးပိအရည်အသွေးပေါ် မူတည်ပြီး တပိဿာကို ငွေကျပ် ၂၅,၀၀၀ ကနေ ၃၇,၀၀၀ အထိ ဈေးပေါက်ခဲ့တယ်လို့ သိရပါတယ်။

မျှင်ငါးပိလုပ်ငန်းရှင်တယောက်က “မျှင်ငါးပိဈေးကွက်က အရင်လို အဆင်မပြေတော့ဘူး။ ကုန်ကြမ်းရဖို့လည်း ခက်ခဲလာတယ်။ မျှင်ကောင်ရှာဖို့ စက်လှေတွေ အသုံးပြုရတဲ့အခါ စက်သုံးဆီ ဝယ်ယူရတာ အခက်အခဲရှိသလို ဆီဈေးလည်း တက်နေတော့ လုပ်ငန်းလုပ်ကိုင်ရတာ ပိုခက်လာတယ်” လို့ ပြောပါတယ်။

ဧရာဝတီတိုင်းမှာ မျှင်ငါးပိကို ရွှေသောင်မြို့၊ ပုသိမ်မြို့နယ်၊ ငပုတောမြို့နယ်၊ လပွတ္တာမြို့နယ်၊ ဟိုင်းကြီးကျွန်းမြို့၊ ဖျာပုံမြို့နယ်နဲ့ ဒေးဒရဲမြို့နယ်တို့မှာ အဓိကထုတ်လုပ်ကြတယ်လို့ သိရပါတယ်။

ဒါ့အပြင် မျှင်ငါးပိလုပ်ငန်းရှင်တွေအနေနဲ့ မျှင်ကောင်ရရှိမှု လျော့နည်းလာတာ၊ စက်သုံးဆီ ဝယ်ယူရ ခက်ခဲတာနဲ့ ဈေးနှုန်းမြင့်တက်လာတာတွေကြောင့် အရင်လို လုပ်ငန်းလုပ်ကိုင်နိုင်ခြင်းမရှိဘဲ အခက်အခဲတွေနဲ့ ရင်ဆိုင်နေရတယ်လို့ သိရပါတယ်။

မျှင်ငါးပိထုတ်လုပ်ရာမှာ ပင်လယ်ကနေ ဖမ်းယူရရှိလာတဲ့ မျှင်ကောင်တွေကို အရင်ဆုံး သန့်စင်ပြီး သဲ၊ အမှိုက်နဲ့ အခြားအညစ်အကြေးတွေကို ဖယ်ရှားရပါတယ်။ အဲဒီနောက် မျှင်ကောင်တွေကို နေလှန်းအခြောက်ခံပြီး ကြိတ်ထောင်းတာနဲ့ ဆားရောစပ်တာတွေ လုပ်ဆောင်ရပါတယ်။

ကြိတ်ထောင်းထားတဲ့ မျှင်အနှစ်ကို လိုအပ်သလို ထပ်မံပြုပြင်ပြီး သင့်တော်တဲ့အချိန်အထိ အချဉ်ဖောက်ထားရပါတယ်။ အချဉ်ဖောက်ပြီး ရင့်မှည့်လာတဲ့အခါ ငါးပိရဲ့ အနံ့၊ အရောင်နဲ့ အရည်အသွေးကို စစ်ဆေးပြီး ထုပ်ပိုးရောင်းချကြတာဖြစ်ပါတယ်။

မျှင်ငါးပိထုတ်လုပ်ရာမှာ ကုန်ကြမ်းသန့်ရှင်းမှု၊ ဆားအသုံးပြုမှုနဲ့ သိုလှောင်မှုတို့ကို စနစ်တကျ ဆောင်ရွက်ဖို့ လိုအပ်ပါတယ်။ ဒါပေမဲ့ လက်ရှိမှာ ကုန်ကြမ်းရရှိမှုနဲ့ စက်သုံးဆီ အခက်အခဲတွေကြောင့် မျှင်ငါးပိလုပ်ငန်း လုပ်ကိုင်သူတွေအနေနဲ့ ထုတ်လုပ်မှုနဲ့ ရောင်းချမှုအပိုင်းတွေမှာ အခက်အခဲတွေ ကြုံတွေ့နေရတယ်လို့ သိရပါတယ်။