မကွေးတိုင်း၊ ပွင့်ဖြူမြို့နယ်ထဲမှာ ဖြစ်ပွားခဲ့တဲ့ တိုက်ပွဲအတွင်း PDF ရဲဘော် တပ်ခွဲမှူးတယောက် ကျဆုံးခဲ့သလို ကမ္မမြို့မှာလည်း လမ်းမှားပြီးဝင်သွားတဲ့ PDF ရဲဘော်တယောက် ဖေဖော်ဝါရီ ၉ ရက် တရက်တည်းမှာပဲ ပစ်သတ်ခံခဲ့ရတယ်လို့ သိရပါတယ်။
မင်းဘူးခရိုင်အမှတ် ၅ တပ်ရင်း၊ ပြန်ကြားရေးတာဝန်ခံ JOKER က “စစ်ကောင်စီတပ်ဘက်နဲ့ အနီးကပ် ပစ်ခတ်တိုက်ပွဲထဲမှာ ရန်သူ့ရဲ့ လက်နက်ငယ်ကျည်က သူ့ခေါင်းကိုထိပြီး ကျဆုံးသွားခဲ့တာပါ။ စစ်ရေးအခြေအနေကြောင့် အဲဒီနေ့ ညနေပိုင်းမှာပဲ ကျနော်တို့ စိုးမိုးနယ်မြေထဲက နေရာတခုမှာ မီးသင်္ဂြိုဟ်ပြီး ဈာပနအခမ်းအနား ပြုလုပ်ပေးခဲ့ပါတယ်” လို့ ပြောပါတယ်။
ကျဆုံးသွားတဲ့ PDF ရဲဘော်ဟာ မင်းဘူးခရိုင် ပြည်သူ့ကာကွယ်ရေးတပ်မတော်၊ အမှတ် ၅ တပ်ရင်းရဲ့ တပ်ခွဲမှူး အသက် ၂၁ နှစ်အရွယ် နိုင်ထက်ဦး (ခေါ်) နဂါးလေး (ကိုယ်ပိုင်နံပါတ် P-14205080) ဖြစ်ပြီး ပွင့်ဖြူမြို့နယ်ထဲက လင်းဇင်းတိုက်နယ်၊ အုန်းတောကျေးရွာအနီးမှာ ဖြစ်ပွားခဲ့တဲ့ တိုက်ပွဲအတွင်း ကျဆုံးခဲ့ရတာလို့ ဆိုပါတယ်။
မင်းဘူးခရိုင်အတွင်းမှာ စစ်ကောင်စီတပ်နဲ့ ဖြစ်ပွားခဲ့တဲ့ တိုက်ပွဲတွေအတွင်း မင်းဘူးခရိုင် အမှတ် ၅ တပ်ရင်းက တပ်ခွဲမှူး နဂါးလေး အပါအဝင် တပ်ဖွဲ့ဝင်ရဲဘော် ၃ ယောက် ကျဆုံးခဲ့ရတယ်လို့လည်း သိရပါတယ်။
အဆိုပါနေ့ မနက် ၉ နာရီဝန်းကျင်မှာပဲ မကွေးတိုင်း၊ ကမ္မမြို့မှာလည်း PDF တပ်ဖွဲ့ဝင် ရဲဘော်တဦးဟာ ဆိုင်ကယ်စီးရင်း လမ်းမှားဝင်ပြီး စစ်ကောင်စီ လက်အောက်ခံ ရဲစခန်းရှေ့ကို ဖြတ်သန်းခဲ့တာကြောင့် ပစ်သတ်ခံခဲ့ရတယ်လို့ သိရပါတယ်။
“ပခုက္ကူခရိုင် တပ်ရင်း ၈ ရဲ့ ရဲဘော်က ကမ္မမြို့ပေါ်ကို လာရင်းနဲ့ လမ်းမှားပြီး ရဲစခန်းရှိတဲ့လမ်းထဲကို ဝင်သွားတာ။ အဲဒီရဲဘော်လေးက ပြောက်ကျားဘောာင်းဘီလည်း ဝတ်ထားတယ်။ ကျောပိုးအိတ် ပါတယ်။ စစ်သုံးဖိနပ်လည်း စီးထားတယ်ဆိုတော့ PDF ရဲဘော်မှန်း သိသာတာပေါ့ဗျာ။ သူ စီးလာတာက Super 4 ဆိုတော့ ဘေးကလူတွေက အဲဒီလမ်းထဲ မဝင်ဖို့ လှမ်းအော်တာကို မကြားဘဲ ဆက်မောင်းသွားတာမှာ ရဲစခန်းထဲကနေ လှမ်းပစ်လိုက်တာ။ သူ့အလောင်းနဲ့ ဆိုင်ကယ်ကိုတော့ ရဲစခန်းထဲကို ဆွဲယူသွားကြတယ်” လို့ ကမ္မအခြေစိုက် ပြည်သူ့ကာကွယ်ရေးတပ်ဖွဲ့ရဲ့ တာဝန်ခံတဦးက DVB ကို ပြောပါတယ်။
စစ်ကောင်စီထောက်ခံတဲ့ တယ်လီဂရမ်ချန်နယ်တွေမှာတော့ ကမ္မမြို့ရဲစခန်းကို လာရောက် တိုက်ခိုက်သူတွေကို ပြန်လည်ခုခံတိုက်ခိုက်ခဲ့တဲ့အတွက် PDF အလောင်း ၁ လောင်း၊ ပြောက်ကျားဝတ်စုံ ၂ စုံနဲ့ ဆိုင်ကယ် ၁ စီးတို့ သိမ်းဆည်းရမိတယ်လို့ ရေးသားဖော်ပြနေကြပါတယ်။
ပစ်ခတ်ခံရလို့ ကျဆုံးသွားတဲ့ PDF တပ်ဖွဲ့ဝင်ရဲဘော်ရဲ့ ရုပ်အလောင်းကို တော်လှန်ရေးတပ်ဖွဲ့တွေက ပြန်လည်တောင်းခံခဲ့ပေမဲ့ မရရှိခဲ့တာကြောင့် ဖေဖော်ဝါရီ ၉ ရက် နေ့လယ်ပိုင်းမှာ အဆိုပါ ကမ္မရဲစခန်းထဲကို ဒရုန်းနဲ့ ဗုံးကြဲတိုက်ခိုက်ခဲ့ကြတယ်လို့ ကမ္မအခြေစိုက် တော်လှန်ရေးအဖွဲ့တွေဆီကနေ သိရပါတယ်။
