မြန်မာနိုင်ငံဘက်က ကျားဖြန့်အွန်လိုင်းရာဇဝတ်ဂိုဏ်းတွေထဲ ဖမ်းဆီးခိုင်းစေခံထားရသူတွေ လွတ်မြောက်ရေးအတွက် ဂျကာတာမြို့က မြန်မာသံရုံးရှေ့မှာ အင်ဒိုနီးရှားရွှေ့ ပြောင်းအလုပ်သမားများသမဂ္ဂ (SBMI) နဲ့ ဒါဇင်နဲ့ချီတဲ့ အလုပ်သမားတွေ ဆန္ဒပြခဲ့ကြတယ်လို့ Tempo သတင်းမှာ ဖေဖော်ဝါရီ ၃ ရက်က ဖော်ပြပါတယ်။

အဆိုပါ ဆန္ဒပြပွဲမှာတော့ မြန်မာနိုင်ငံဘက်က ကျားဖြန့်ရာဇဝတ်ဂိုဏ်းတွေထဲ အဓမ္မ ခိုင်းစေခံခဲ့ရပြီး ပြန်လည်လွတ်မြောက်လာခဲ့တဲ့ အင်ဒိုနီးရှား ရွှေ့ပြောင်းလုပ်သား ၄၅ ဦး ပါဝင်တယ်လို့ SBMI ဥက္ကဌ ဟာရီယန်တို ဆူဝါနိုက ပြောပါတယ်။

မြဝတီမြို့က ကျားဖြန့်အွန်လိုင်းရာဇဝတ်ဂိုဏ်းတွေမှာ လူကုန်ကူးခံခဲ့ရတဲ့ အင်ဒိုနီးရှားနိုင်ငံသား ၄၅ ဦးရှိတဲ့အကြောင်း SBMI က ပြီးခဲ့တဲ့  ၂၀၂၄ ခု ဒီဇင်ဘာလ အစီရင်ခံစာမှာ ဖော်ပြထားပါတယ်။ 

အင်ဒိုနီးရှား အမျိုးသား လူ့အခွင့်အရေးကော်မရှင်ရဲ့ ညှိနှိုင်းရေးမှူး အန်နစ်စ် ဟီဒါယာက တော့ မြန်မာနိုင်ငံထဲက ကျားဖြန့်ရာဇဝတ်ဂိုဏ်းတွေထဲ လူကုန်ကူးခံရသူတွေဟာ ဂျကာတာ၊ မြောက်ဆူမတ်တြား၊ ကာလီမန်တန်နဲ့ အနောက်ဂျာဗားလို နေရာတွေက ဖြစ်တယ်လို့ ပြောပါတယ်။

ဒါ့အပြင် ကျားဖြန့်အွန်လိုင်းရာဇဝတ်ဂိုဏ်းတွေထဲ လူကုန်ကူးခံရသူတွေထဲက တချို့ဟာ အချိန် ၆ လလောက်ကနေ အဲဒီထက် ကြာမြင့်နိုင်တယ်လို့ ပြီးခဲ့တဲ့ ဇန်နဝါရီ ၇ ရက်က အင်တာဗျူးတခုမှာ အန်နစ်စ်က ဖြေကြားခဲ့သလို ကျားဖြန့်ဂိုဏ်းထဲ သားကောင်အဖြစ် ကျရောက်ရသူတွေရဲ့ တိုင်ကြားမှုတွေဟာ လတိုင်းနီးပါး ရှိခဲ့တယ်လို့ ပြောပါတယ်။

လူကုန်ကူးမှုဖြစ်စဉ်တွေမှာ တရားမဝင် လမ်းကြောင်းတွေကို ဆက်လက်အသုံးပြုနေပေမဲ့ ခုချိန်မှာ ဒါတွေကို တရားဝင်လူဝင်မှုကြီးကြပ်ရေး လမ်းကြောင်းတွေကတဆင့် ဖြတ် သွားနေတာကို တွေ့ရတာဟာ ဒီကိစ္စတွေမှာ အစိုးရအရာရှိတွေရဲ့ ပါဝင်မှုကြောင့် ဖြစ်ကြောင်းလည်း သူက ထောက်ပြထားပါတယ်။

Source: Tempo