မန္တလေးတိုင်း၊ မြင်းခြံမြို့နယ်၊ တလုပ်မြို့ကို ပြည်သူ့ကာကွယ်ရေးတပ်က စခန်းသိမ်းဖို့ တိုက်ခိုက်ခဲ့ပေမဲ့ လေကြောင်းကနေ အဆက်မပြတ်စစ်ကူပေးလို့ ပြန်ဆုတ်ခွာခဲ့ရပြီး တနင်္သာရီတိုင်း၊ တနင်္သာရီမြို့နယ်မှာတော့ စစ်ကူသွားတဲ့ စစ်ကောင်စီယာဉ်တန်း ၆ စီးကို ပြည်သူ့ကာကွယ်ရေးတပ်က မိုင်းဆွဲတိုက်ခိုက်ခဲ့ပါတယ်။

တလုပ်မြို့ကို ဖေဖော်ဝါရီ ၁ ရက်နေ့ မနက်အစောပိုင်း ၅ နာရီလောက်ကစလို့ ပြည်သူ့ကာကွယ်ရေးတပ်က ဝင်ရောက်တိုက်ခိုက်ခဲ့ပြီး စစ်တပ်ဘက်က Mi 35၊ Y8၊ Y12 လေယာဉ်တွေနဲ့ အဆက်မပြတ်ပစ်ကူပြီး စစ်ကူလာပေးခဲ့တယ်လို့ ဒေသခံတွေနဲ့ နယ်မြေခံ ပြည်သူ့ကာကွယ်ရေးတပ်ဖွဲ့ဝင်တွေဆီကနေ သိရပါတယ်။

မြောင် CDSOM အဖွဲ့ရဲ့ တာဝန်ရှိသူကို နွေဦးက “စစ်ကောင်စီဘက်က အထိအခိုက် အကျအဆုံးများပြီး တလုပ်မြို့ကို လက်လွှတ်ရတော့မယ့် အနေအထားတခုမှာ မနက် ၇ နာရီလောက်ကစပြီး ညနေ ၁ နာရီခွဲလောက်အထိ လေယာဉ်တစီးပြီးတစီး အဆက်မပြတ် တက်လာကာ ပြည်သူ့နေရာတွေပါမကျန် ပစ်ခတ်သွားတယ်။ ပစ်ခတ်တဲ့ လေယာဉ်အမျိုးအစားနဲ့ ပစ်ခတ်အကြိမ် အရေအတွက်တွေက Mi5 ၂ စီးနဲ့ ၈ ကြိမ် ပစ်ခတ်တယ်။ Y8 နဲ့ ၄ ကြိမ်၊ Y12 နဲ့ ၃ ကြိမ် ပစ်ခတ်တာလို့” ပြောပါတယ်။

စစ်ကောင်စီတပ်ဘက်က လေကြောင်းကနေ ဗုံးကြဲတိုက်ခိုက်တာအပြင် တလုပ်မြို့အနီး ဆီမီးခုံမှာရှိတဲ့ ရေတပ်စစ်သင်္ဘောကနေ လက်နက်ကြီးတွေနဲ့ ပစ်ကူပေးခဲ့သလို မြင်းခြံဘက်မှာလည်း ဟောင်ဝစ်ဇာနဲ့ ၁၀ ကြိမ်ထက်မနည်း ပစ်ကူပေးခဲ့တာကြောင့် မနက် ၉ နာရီလောက်မှာ တပ်တွေပြန်ဆုတ်ခဲ့ရတယ်လို့ ဒေသခံ ရဲဘော်တယောက်က ပြောပါတယ်။

အဲဒီတိုက်ပွဲကို တလုပ်ပြည်သူ့ကာကွယ်ရေးတပ်က ဦးဆောင်ပြီး မြောင် CDSOM အဖွဲ့၊ မြောင် ပလဖ ဗိုလ်ကျားသစ် စတဲ့အဖွဲ့တွေ ပူးပေါင်းတိုက်ခိုက်ခဲ့တာလို့လည်း သိရပါတယ်။

စစ်တပ်ရဲ့ လက်နက်ကြီးအပါအဝင် လေယာဉ်နဲ့ပစ်ခတ်လို့ ဒေသခံ အရပ်သား ၁ ယောက် သေဆုံးခဲ့ရတယ်လို့လည်း သိရပါတယ်။

တနင်္သာရီတိုင်း၊ တနင်္သာရီမြို့နယ်မှာတော့ ဇန်နဝါရီ ၃၁ ရက်နေ့ မွန်းလွဲ ၂ နာရီဝန်းကျင်အချိန် စစ်ကောင်စီယာဉ်တန်း ၆ စီးကို တနင်္သာရီမြို့နယ် ပကဖ က မိုင်းဆွဲတိုက်ခိုက်ခဲ့ပြီး စစ်ကား ၂ စီး ထိခိုက်ပျက်စီးခဲ့တယ်လို့ မြေပြင်ရဲဘော်တွေက ပြောပါတယ်။

ပြီးခဲ့တဲ့ ဇန်နဝါရီလ ၂၈ ရက်နေ့လောက်ကစပြီး စစ်ကောင်စီဘက်က မောတောင်ကို စစ်ကူယာဉ်တန်း သွားဖို့အတွက် လမ်းတွေမှာ စစ်ကြောင်းချီပြီး လမ်းတလျှောက် တပ်စိပ်အလိုက် ကင်းချထားတယ်လို့ တော်လှန်ရေးတပ်ဖွဲ့တွေက ပြောပါတယ်။

တော်လှန်ရေးတပ်ဖွဲ့တွေက စစ်ကောင်စီယာဉ်တန်းကို လုံခြုံရေးယူပေးတဲ့ စစ်ကောင်စီ တပ်စိပ်တွေကို ဒရုန်းနဲ့ ဗုံးသီး ၉ လုံးချတိုက်ခိုက်ခဲ့တယ်လို့ တနင်္သာရီမြို့နယ် ပကဖ ဇုန် ၅ တာဝန်ရှိသူက ပြောပါတယ်။

တနင်္သာရီမြို့နယ် ပကဖ ဇုန် ၅ သတင်းနဲ့ပြန်ကြားရေးတာဝန်ခံက “စကစဘက်က လမ်းကင်းယူပြီးမှ စစ်ကောင်စီယာဉ်တန်းကဖြတ်တာ။ ယာဉ်တန်းမဖြတ်ခင်မှာ စကစဘက်က ဒရုန်းနဲ့ တိုက်ခိုက်တာရှိတယ်။ လက်နက်ကြီးနဲ့ တောက်လျှောက်ပစ်တယ်” လို့ ပြောပါတယ်။

ပြီးခဲ့တဲ့ ဇန်နဝါရီ ၂၉ ရက်နေ့ကတော့ မော်တုန်းအခြေစိုက် ၃၀၆ အမြောက်တပ်ရင်းက တိုက်ပွဲဖြစ်ပွားတာ မရှိဘဲ ဒရုန်းနဲ့ ဗုံးသီးချ တိုက်ခိုက်တာကြောင့် ဒေသခံ အိမ် ၂ လုံး မီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။