ဧရာဝတီတိုင်း၊ သာပေါင်းမြို့နယ်၊ ကျားခေါင်ကျေးရွာမှာ အာရက္ခတပ်တော် (AA)၊ ပူးပေါင်းတော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်ပွားခဲ့ပြီး သာပေါင်းမြို့မစခန်းမှူး ဒုရဲမှူး ဝင်းနိုင်ဦး စနိုက်ပါထိမှန်ပြီး နေရာမှာတင် ပွဲချင်းပြီး သေဆုံးခဲ့တယ်လို့ သာပေါင်းမြို့မရဲစခန်းနဲ့ နီးစပ်သူတွေဆီက သိရပါတယ်။
ဇန်နဝါရီ ၂၈ ရက်က ကျားခေါင်ရွာတိုက်ပွဲမှာ အင်အားဖြည့်တင်းထားတဲ့ သာပေါင်းမြို့မစခန်းက ရဲတပ်ဖွဲ့ဝင်တွေနဲ့အတူ တိုက်ပွဲအတွင်း စနိုက်ပါထိမှန် သေဆုံးခဲ့တာလို့ ဆိုပါတယ်။
သာပေါင်းရဲစခန်းနဲ့ နီးစပ်သူတယောက်က “ဇန်နဝါရီလ ၂၆ ရက်နေ့တည်းက တိုက်ပွဲဖြစ်နေတာ။ ဇန်နဝါရီလ ၂၈ ရက်နေ့ ကျားခေါင်ရွာ တိုက်ပွဲမှာ ဒုရဲမှူး ဝင်းနိုင်ဦး စနိုက်ပါထိမှန်ပြီး နေရာမှာတင် သေဆုံးသွားခဲ့တယ်” လို့ DVB ကို ပြောပါတယ်။
ရခိုင်ပြည်နယ်နဲ့ ဧရာဝတီတိုင်း နယ်နိမိတ်ချင်း ထိစပ်နေတဲ့ ဘောမိကျေးရွာ၊ ရွှေသောင်ယံနဲ့ သာပေါင်းမြို့နယ်တွေမှာ အာရက္ခတပ်တော် (AA) ပူးပေါင်းတော်လှန်ရေးတပ်ဖွဲ့တွေ ထိုးစစ်ဆင် တိုက်ခိုက်ခဲ့တာကြောင့် ဘောမိကျေးရွာနဲ့ မကျီးစင်ကျေးရွာအတွင်းကနေ ထွက်ပြေးသွားတဲ့ ရဲတပ်ဖွဲ့ဝင်တွေကို သာပေါင်းမြို့မရဲစခန်းမှာ ထိန်းသိမ်းထားတယ်လို့လည်း ဆိုပါတယ်။
ဘောမိကျေးရွာနဲ့ မကျီးစင်ကျေးရွာ တိုက်ပွဲအတွင်းကနေ ထွက်ပြေးလာတဲ့ ရဲတပ်ဖွဲ့ဝင်တွေကို သာပေါင်းမြို့မစခန်းမှာ ဖမ်းဆီးချုပ်နှောင်ထားပြီး စနိုက်ပါထိမှန် သေဆုံးခဲ့တဲ့ သာပေါင်းစခန်းမှူး ဒုရဲမှူးဝင်းနိုင်ဦးကပဲ စစ်ဆေးတာတွေ ပြုလုပ်ခဲ့တယ်လို့ ဆိုပါတယ်။
ဧရာဝတီတိုင်းအတွင်း စစ်ကောင်စီတပ်က လုံခြုံရေးအင်အား မလုံလောက်တာကြောင့် ရဲ၊ ပြည်သူ့စစ်၊ မီးသတ်တပ်ဖွဲ့တွေကိုပါ လက်နက်တပ်ဆင်ပေးထားပြီး နယ်စပ်ကျေးရွာတွေမှာ ကင်းပတ်တာ၊ ကင်းပုံးဝပ်တာတွေကိုပါ လုပ်ဆောင်ခိုင်းထားတယ်လို့ စစ်ကောင်စီနဲ့ နီးစပ်သူတွေဆီက သိရပါတယ်။
