ရခိုင်မှာ စစ်ကောင်စီတပ်နဲ့ အာရက္ခတပ်တော် (AA) တို့ တိုက်ပွဲအတွင်းမှာ AA က လက်ရဖမ်းဆီးမိခဲ့တဲ့ စစ်ကောင်စီ စစ်သုံ့ပန်းတွေနဲ့ စစ်သုံ့ပန်းမိသားစုတွေ ထားရှိတဲ့ နေရာတွေကို စစ်ကောင်စီက လေကြောင်းကနေ ဗုံးကြဲတိုက်ခိုက်မှုတွေကြောင့် သေဆုံးသူ ၁၀၀ ထက်မနည်းရှိလာပြီလို့ သိရပါတယ်။
ဇန်နဝါရီ ၁၈ ရက် ညနေ ၄ နာရီခွဲမှာ စစ်ကောင်စီက မြောက်ဦးမြိုနယ်၊ ရမ်းချောင်းအနီး စစ်သုံ့ပန်းမိသားစုဝင်တွေ ထားရှိတဲ့နေရာကို လေကြောင်းကနေ ဂျက်ဖိုက်တာနဲ့ ၃ ကြိမ် လာရောက်ဗုံးကြဲတိုက်ခိုက်ခဲ့ပါတယ်။
အဲဒီလို ဗုံးကြဲတိုက်ခိုက်မှုကြောင့် ကလေးငယ်နဲ့ အမျိုးသမီး စုစုပေါင်း ၂၈ ယောက် သေဆုံးခဲ့ပြီး ၂၅ ယောက် ပြင်းထန်ဒဏ်ရာရရှိခဲ့ပါတယ်။
အလားတူဘဲ စက်တင်ဘာ ၉ ရက် ည ၉ နာရီခွဲက မောင်တောမြို့၊ (၄) မိုင် (နခခ-၂) စခန်း စစ်သုံ့ပန်းတွေ ယာယီထားရှိတဲ့နေရာကို စစ်ကောင်စီက ဂျက်တိုက်လေယာဉ် ၂ စီးနဲ့ ဗုံးကြဲ တိုက်ခိုက်ခဲ့တာကြောင့် စစ်သုံ့ပန်း ၅၀ ကျော် နေရာမှာတင် သေဆုံးခဲ့ပြီး အမြောက်အမြား ထိခိုက်ဒဏ်ရာရရှိခဲ့ပါတယ်။
စက်တင်ဘာ ၈ ရက်ကလည်း ပေါက်တောမြို့နယ်၊ ရှင်ရွာ ကျေးရွာက စစ်သုံ့ပန်းတွေနဲ့ အကျဉ်းသားတွေ ဆေးကုပေးနေတဲ့နေရာကို စစ်ကောင်စီက ဂျက်တိုက်လေယာဉ်နဲ့ ၂ ကြိမ် ဗုံးကြဲတိုက်ခိုက်ခဲ့တာကြောင့် ၁၇ ယောက် သေဆုံးပြီး ၁၀ ယောက် ထိခိုက်ဒဏ်ရာရှိခဲ့ပါတယ်။
စစ်ကောင်စီအနေနဲ့ စစ်ရှုံးနေတာကြောင့် စာသင်ကျောင်းတွေ၊ ဆေးရုံ ဆေးခန်းတွေ၊ ဈေးတွေ၊ ဘာသာရေးအဆောက်အုံတွေ၊ လမ်းတံတားတွေ၊ စစ်ဘေးရှောင်စခန်းတွေနဲ့ လူနေထူထပ်တဲ့နေရာတွေကို ပစ်မှတ်ထား တိုက်ခိုက်နေတာလို့ AA က ဆိုပါတယ်။
၂၀၂၅ ခုနှစ်စပိုင်းကစပြီး လေကြောင်းတိုက်ခိုက်မှုတွေကို ပိုပြီးလုပ်ဆောင်လာနေတာကြောင့် လေကြောင်းရန် အန္တရာယ်ကို အရင်ကထက် ပိုပြီးသတိထားဖို့နဲ့ အင်တာနက်၊ ဖုန်းသုံးစွဲမှုတွေကို သတိထားသုံးစွဲကြဖို့ အာရက္ခတပ်တော် (AA) က သတိပေးတိုက်တွန်းထားပါတယ်။
ကေခိုင်
