စစ်ကောင်စီခန့် ဧရာဝတီတိုင်း၊ သာပေါင်းမြို့နယ်အုပ်ချုပ်ရေးမှူးက အရပ်သားတွေ စစ်ဘေး ကြိုရှောင်ရင် နေအိမ်ချိပ်ပိတ် သိမ်းဆည်းမယ်ဆိုပြီး ခြိမ်းခြောက်နေတယ်လို့ ဒေသခံတွေဆီက သိရပါတယ်။ 

သာပေါင်းမြို့နယ် စစ်ကောင်စီခန့် မြို့နယ်အုပ်ချုပ်ရေးမှူး မင်းဧရာထိုက်က ဇန်နဝါရီ ၂၁ ရက်က အစည်းအဝေးမှာ အရပ်သားတွေနဲ့ တွေ့ဆုံချိန် ပြောဆိုခဲ့သလို အသံချဲ့စက်နဲ့ပါ လိုက်လံလှည့်လည်ပြီး စစ်ဘေးကြိုတင်ရှောင်တိမ်းတာ လုံးဝမလုပ်ဖို့နဲ့ စစ်ဘေးရှောင်ပါက နေအိမ် ချိပ်ပိတ် သိမ်းဆည်းမယ်ဆိုပြီး ပြောဆို၊ ကြေညာခဲ့တာလို့ ဆိုပါတယ်။ 

ဒေသခံ တယောက်က “အမှတ် ၂ ရပ်ကွက် ဈေးဆိပ်မှာ ပြည်သူတွေ စစ်ဘေးကြိုတင်ရှောင်ဖို့ ပစ္စည်းတွေ သယ်ယူနေကြတာကို သူ တွေ့ရတယ်ပေါ့၊ ကြိုတင်စစ်ဘေးမရှောင်ဖို့ သတိပေးချင်တယ်လို့ ပြောတာ။ မလိုက်နာရင် အိမ်သိမ်းမယ်လို့ ခြိမ်းခြောက် တားမြစ်တာ” လို့ ပြောပါတယ်။ 

စစ်ကောင်စီခန့် မြို့နယ်အုပ်ချုပ်ရေးမှူး မင်းဧရာထိုက်က အရပ်သားတွေ စစ်ဘေးမရှောင်ဖို့ တားမြစ်နေပေမဲ့ သာပေါင်းမြို့နယ်ထဲက ကျားခေါင်းရွာနဲ့ သစ်ဝမ်းပူရွာမှာ စစ်ကောင်စီတပ်က စစ်ကြောင်းထိုး တပ်စွဲနေတာကြောင့် အရပ်သားတွေ ထွက်ပြေးနေရတယ်လို့ ဆိုပါတယ်။ 

စစ်ကောင်စီတပ်နဲ့ နီးစပ်သူတယောက်က “စစ်ဘေးမရှောင်ခိုင်းတာက အသက်အသေခံ၊ အိမ်လည်း အပျက်ခံဆိုပြီး စစ်ကောင်စီနဲ့ အပေါင်းအပါတွေက လုပ်ခိုင်းနေတာ။ ကျနော်တို့ အရပ်သားတွေက ကိုယ့်အသိတရားနဲ့ ကိုယ် လုပ်ကြ ကိုင်ကြရမှာပါ” လို့ ပြောပါတယ်။ 

စစ်ကောင်စီခန့် သာပေါင်းမြို့နယ် အုပ်ချုပ်ရေးမှူးက အရပ်သားတွေကို စစ်ဘေးမရှောင်ဖို့ ကန့်သတ်တားမြစ် ပိတ်ပင်နေပေမဲ့ အုပ်ချုပ်ရေးအဖွဲ့ မိသားစုနဲ့ တပ်မိသားစုတချို့က ဇန်နဝါရီ ၂၀ ရက်က စတင်ကြိုတင်ပြောင်းရွှေ့နေတာ တွေ့ရတယ်လို့ ဒေသခံတွေက ဆိုပါတယ်။ 

ဒါ့အပြင် သာပေါင်းမြို့နယ် ရခိုင်ရိုးမနဲ့ ထိစပ်နေတဲ့ ရွာတွေမှာ စစ်ကောင်စီတပ် အင်အား အများအပြားနဲ့ တပ်စွဲထားပြီး နေ့စဉ် စစ်ကြောင်းထိုးနေတယ်လို့ သိရပါတယ်။